ຂປລ
ພິທີສະເຫລີມ ສະຫລອງ ວັນໄຊຊະນະ ຂອງສົງຄາມ ປ້ອງກັນປິຕຸພູມ ສະຫະພາບໂຊວຽດ ຄົບຮອບ 80 ປີ ໄດ້ຈັດຂຶ້ນ ຢ່າງຍິ່ງໃຫຍ່ ຢູ່ນະຄອນຫລວງ ມົດສະກູ ປະເທດຣັດເຊຍ ເມື່ອບໍ່ດົນມານີ້.
ຂປລ.ວິທະຍຸ ສາກົນແຫ່ງ ສປ ຈີນ, ພິທີສະເຫລີມ ສະຫລອງ ວັນໄຊຊະນະ ຂອງສົງຄາມ ປ້ອງກັນປິຕຸພູມ ສະຫະພາບໂຊວຽດ ຄົບຮອບ 80 ປີ ໄດ້ຈັດຂຶ້ນ ຢ່າງຍິ່ງໃຫຍ່ ຢູ່ນະຄອນຫລວງ ມົດສະກູ ປະເທດຣັດເຊຍ ເມື່ອບໍ່ດົນມານີ້.ໂດຍມີ ທ່ານ ສີ ຈິ້ນຜິງ ປະທານປະເທດຈີນ ພ້ອມກັບຜູ້ນຳ 20ກວ່າປະເທດ ກໍຄື ອົງການຈັດຕັ້ງສາກົນ ໄດ້ເຂົ້າຮ່ວມພິທີ ດັ່ງກ່າວຕາມຄຳເຊີນ. ຫາງສຽງ ຣັດເຊຍ ເຫັນວ່າ: ທ່ານ ສີ ຈິ້ນຜິງ ປະທານປະເທດຈີນ ເຂົ້າຮ່ວມ ພິທີຄັ້ງນີ້ ແມ່ນມີຄວາມໝາຍສຳຄັນ ດ້ານປະຫວັດສາດ, ເຊິ່ງສະແດງໃຫ້ເຫັນເຖິງ ສະຕິ ແລະ ຄວາມຕັດສິນໃຈອັນເດັດດ່ຽວຂອງ ສປ ຈີນ ແລະ ຣັດເຊຍ ທີ່ຮ່ວມກັນປົກປ້ອງໝາກຜົນ ແຫ່ງໄຊຊະນະ ຂອງສົງຄາມໂລກຄັ້ງທີ 2, ກໍຄື ປົກປັກຮັກສາຄວາມຍຸຕິທຳ ແລະ ຄວາມເປັນທຳໃນສາກົນ. ຄົນຈີນມັກເວົ້າວ່າ “ຖືປະຫວັດສາດ ເປັນແວ່ນແຍງ”. ບົດຮຽນທາງລົບທີ່ໜ້າເຈັບແສບ ຈາກສົງຄາມໂລກຄັ້ງທີ 2 ເຕືອນໃຫ້ຊາວໂລກວ່າ: ຄວາມເຫັນອະຄະຕິ ແລະ ການດູໝິ່ນຈຳແນກ, ຄວາມຄຽດແຄ້ນ ແລະ ສົງຄາມ ພຽງແຕ່ຈະນຳມາເຊິ່ງໄພພິບັດ ແລະ ຄວາມເຈັບປວດເທົ່ານັ້ນ; ການເຄົາລົບກັນ ຢູ່ຮ່ວມກັນຢ່າງສະເໝີພາບ ພັດທະນາໂດຍສັນຕິ ແລະ ຈະເລີນຮຸ່ງເຮືອງຮ່ວມກັນ, ຈຶ່ງເປັນເສັ້ນທາງທີ່ຖືກຕ້ອງຂອງໂລກມະນຸດ. ແຕ່ສິ່ງທີ່ໜ້າເສຍໃຈຄື: ຫຼັງຈາກສົງຄາມໂລກຄັ້ງທີ 2 ສິ້ນສຸດລົງເປັນເວລາ 80 ປີ ຄືໃນປັດຈຸບັນນີ້, ບາງຄົນໄດ້ຫລົງລືມ ປະຫວັດສາດ, ຊູຊີເຮັດລັດທິຝ່າຍດຽວ ລັດທິເຈົ້າອຳນາດ ແລະ ການເມືອງມະຫາອຳນາດ, ປັ້ນແຕ່ງຖ້ອຍຄຳ ທີ່ເອີ້ນວ່າ “ອົງການ ສະຫະ ປະຊາຊາດ ໄຮ້ຄຸນປະໂຫຍດ” ຫລື ຖ້ອຍຄຳທີ່ເອີ້ນວ່າ “ກົດໝາຍສາກົນບໍ່ມີຜົນບັງຄັບໃຊ້”. ນອກນີ້, ບາງປະເທດເຈຕະນາສະແຫວງຫາຄວາມເປັນເຈົ້າອຳນາດ ແລະ ຜົນປະໂຫຍດສ່ວນຕົວ, ໄດ້ບິດເບືອນໝາກຜົນ ແຫ່ງໄຊຊະນະຂອງສົງຄາມໂລກ ຄັ້ງທີ 2. ເມື່ອມວນມະນຸດ ໄດ້ຢືນຢູ່ ທາງແຍກ ແຫ່ງປະຫວັດສາດ ອີກຄັ້ງໜຶ່ງ, ຈີນ ແລະ ຣັດເຊຍໃນຖານະເປັນປະເທດໃຫຍ່ ທັງເປັນສະມາຊິກຖາວອນໃນສະພາ ຄວາມໝັ້ນຄົງ ອົງການ ສະຫະປະຊາຊາດ ໄດ້ອອກໜ້າອີກຄັ້ງໜຶ່ງ. ໃນເວລາພົບປະກັນຢູ່ນະຄອນຫຼວງມົສກູໃນຄັ້ງນີ້, ປະມຸກລັດສອງປະເທດຈີນ - ຣັດເຊຍເປັນເອກະພາບກັນເຫັນດີວ່າ ຮ່ວມກັນສົ່ງເສີມ ທັດສະນະ ປະຫວັດສາດ ອັນຖືກຕ້ອງ ກ່ຽວກັບ ສົງຄາມໂລກຄັ້ງທີ 2, ປົກປ້ອງ ຄວາມສັກສິດ ແລະ ຖານະບົດບາດຂອງອົງການສະຫະປະຊາຊາດ, ປົກປັກຮັກສາ ຄວາມຍຸຕິທຳ ແລະ ຄວາມເປັນທຳໃນສາກົນ, ເຊິ່ງໄດ້ຊີ້ແຈງທິດທາງໃຫ້ແກ່ ປະຊາຄົມໂລກ ໃນການປົກປັກຮັກສາໝາກຜົນ ແຫ່ງໄຊຊະນະ ຂອງສົງຄາມໂລກຄັ້ງທີ 2, ຮັບມືກັບຄວາມສ່ຽງ ແລະ ສິ່ງທ້າທາຍ ຫລາຍປະການ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
