ຂປລ. ແຫລ່ງຂ່າວຈາກ ແຂວງ ຄຳມ່ວນ ໃຫ້ຮູ້ວ່າ: ໂຮງງານນໍ້າດື່ມ ພົງເທບ ໄດ້ຜະລິດນໍ້າດື່ມ ໂດຍເນັ້ນໃສ່ຄຸນນະພາບ, ຄວາມສະອາດ ແລະ ປອດໄພ ເພື່ອອອກຈໍາໜ່າຍບໍລິການຮັບໃຊ້ສັງຄົມ ໂດຍໃຊ້ເຄ່ືອງມືລະບົບການກັ່ນຕອງທີ່ທັນສະໄໝ ແລະ ຮຽກຮ້ອງໃຫ້ສັງຄົມຈົ່ງໃຫ້ການສະໜັບສະໜູນ ແລະ ຊົມໃຊ້ຜະລິດຕະພັນພາຍໃນ ເວົ້າລວມເວົ້າສະເພາະຜະລິດຕະພັນຂອງຄໍາມ່ວນ ກໍຄືນໍ້າດື່ມພົງເທບໃຫ້ຫລາຍເພື່ອຄວາມຍືນຍົງຕະຫລອດໄປ.

    ທ່ານ ພົງເທບ ວິໄລສັກ ເຈົ້າຂອງໂຮງງານນໍ້າດື່ມພົງເທບໄດ້ໃຫ້ສໍາພາດເມື່ອບໍ່ດົນມານີ້ວ່າ: ໂຮງງານນໍ້າດື່ມພົງເທບ ເລີ່ມຜະລິດນໍ້າດື່ມເພື່ອບໍລິການແກ່ສັງຄົມແຕ່ປີ  2016,  ຊ່ຶງສາມາດຕອບສະໜອງຕາມຄວາມຕ້ອງການຂອງສັງຄົມໄດ້ດີສົມຄວນ, ຂັ້ນຕອນ ແລະ ຂະບວນການຜະລິດ ນໍ້າດື່ມຂອງໂຮງງານ ໄດ້ເນັ້ນໃສ່ຄຸນນະພາບ, ຄວາມສະອາດ ແລະ ຄວາມປອດໄພເປັນຫລັກ ຊຶ່ງໂຮງງານໄດ້ມີເຄື່ອງມືລະບົບການກັ່ນຕອງທີ່ທັນສະໄໝ. ໃນປັດຈຸບັນ ໄດ້ຜະລິດນໍ້າດື່ມ 4 ຂະໜາດຄື:  200ml, 350ml, 600ml ແລະ 1.500ml, ສາມາດຜະລິດນໍ້າດ່ືມໄດ້ 500 ແພັກ ຫລື 3.000 ຕຸກຕໍ່ຂະໜາດຕໍ່ວັນ (ຜະລິດລວມໃນ 4 ຂະໜາດເທ່ົາກັບ 12.000 ຕຸກຕ່ໍວັນ). ໂອກາດນີ້, ທ່ານ ພົງເທບ ວິໄລສັກ ກ່າວຕື່ມ ວ່າ: ສຳລັບແຜນການໃນການຜະລິດນໍ້າດື່ມໃນຕໍ່ໜ້າ ຈະໄດ້ຂະຫຍາຍໂຮງານຜະລິດນໍ້າກ້ອນ ແລະ ຜະລິດນ້ໍາຫວານອອກມາບໍລິການຮັບໃຊ້ສັງຄົມຕື່ມອີກ ເພື່ອສ້າງວຽກເຮັດງານທຳ ໃຫ້ສັງຄົມຫລາຍຂຶ້ນ ແລະ ສືບຕໍ່ພັດທະນາໂຮງງານໃຫ້ມີຄຸນນະພາບສູງຂ້ຶນໄປເລ້ືອຍໆ ພ້ອມນີ້, ຍັງໄດ້ສະແດງຄວາມຂອບໃຈຕໍ່ຜູ້ບໍລິໂພກ ທີ່ໄດ້ໃຫ້ການອຸ້ມຊູຍູ້ໜູນນໍ້າດື່ມພົງເທບຕະຫລອດໄລຍະ 8 ປີກວ່າທີ່ຜ່ານມາ ແລະ ຮຽກຮ້ອງໃຫ້ສັງຄົມ ຈົ່ງໃຫ້ການສະໜັບສະໜູນ ແລະ ຊົມໃຊ້ຜະລິດຕະພັນ ພາຍໃນເວົ້າລວມເວົ້າສະເພາະ ຜະລິດຕະພັນຂອງຄໍາມ່ວນ ກໍຄືນໍ້າດ່ືມ ພົງເທບ ໃຫ້ຫລາຍເພື່ອຄວາມຍືນຍົງຕະຫລອດໄປ.

     ທ່ານ ວົງໄຊຊະນະ ໄຊຍະກຸມມານ ຫົວໜ້າຂະແໜງອຸດສາຫະກຳ ພະແນກອຸດສາຫະກຳ ແລະ ການຄ້າ ໄດ້ຢັ້ງຢືນວ່າ: ໂຮງງານນໍ້າດື່ມ ພົງເທບ ເປັນໂຮງງານຜະລິດນໍ້າດື່ມຂະໜາດໃຫຍ່ອັນດັບຕົ້ນໆ ຂອງແຂວງຄຳມ່ວນ, ເປັນໂຮງງານທີ່ມີ ຄຸນນະພາບ ແລະ ໄດ້ມາດຕະຖານ,  ມີຂະບວນການຜະລິດທີ່ຖືກຕ້ອງຕາມຫລັກອະນາໄມ, ຊຶ່ງພະແນກ ອຸດສາຫະກຳ ແລະ ການຄ້າແຂວງ ກໍຄືຂະແໜງອຸດສາຫະກຳ ໄດ້ຮ່ວມກັບຂະແໜງອາຫານ ແລະ ຢາ ພະແນກສາທາລະນະສຸກແຂວງ ແລະ ພາກສ່ວນກ່ຽວຂ້ອງລົງຕິດຕາມ, ກວດກາການຜະລິດຂອງໂຮງງານຢ່າງເປັນປົກກະຕິ, ນໍ້າດື່ມພົງເທບ ເປັນນໍ້າດື່ມທີ່ໄດ້ຮັບຄວາມນິຍົມຊົມຊອບຈາກສັງຄົມພາຍໃນແຂວງ ແລະ ມີການຜະລິດພຽງພໍກັບຄວາມຕ້ອງການຂອງສັງຄົມ ຢູ່ພາຍໃນແຂວງໃນປັດຈຸບັນ.

ຂ່າວ-ພາບ: ກອງຄຳຂ່າວ-ພາບ: ກອງຄຳ

KPL