ຂປລ. ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ປິ່ນອ້ອມ ທີ່ ສປປ ລາວ ເປັນເຈົ້າພາບໄດ້ສໍາເລັດລົງໃນວັນທີ ໃນວັນທີ 29 ສິງຫາ 2024 ທີ່ນະຄອນຫລວງວຽງຈັນ, ສປປ ລາວ ໂດຍ ການເປັນປະທານຂອງ ທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ມີທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ມີບັນດາລັດຖະມົນຕີທີ່ຮັບຜິດຊອບວຽກງານ ຕ້ານອາຊະຍາກໍາຂ້າມຊາດປະເທດສະມາຊິກອາຊຽນ, ຕີມໍແລັດສະເຕ, ປະເທດ ຄູ່ຮ່ວມເຈລະຈາ ພ້ອມດ້ວຍຄະນະຜູ້ແທນຮັບຜິດຊອບ ວຽກງານຕ້ານອາຊະຍາກໍາຂ້າມຊາດເຂົ້າຮ່ວມ.

ທ່ານ ພົອ ວິໄລ ຫລ້າຄໍາຟອງ ໄດ້ຖະແຫລງກ່ຽວກັບຜົນສໍາເລັດ ຂອງກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ວ່າ: ໃນໄລຍະທີ່ ສປປ ລາວ ເປັນປະທານອາຊຽນ ປີ 2024. ໃນນີ້, ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມ ວຽກງານຕ້ານອາຊະຍາກຳຂ້າມຊາດ ໃນ 3 ລະດັບ ຄື: ລະດັບວິຊາການ, ລະດັບເຈົ້າໜ້າທີ່ອາວຸໂສ ແລະ ລະດັບລັດຖະມົນຕີ. ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ໄດ້ຈັດຂຶ້ນໃນ ລະຫວ່າງ ວັນທີ 27-29 ສິງຫາ 2024 ທີ່ນະຄອນຫລວງວຽງຈັນ. ກອງປະຊຸມຄັ້ງນີ້ປະກອບມີ 2 ລະດັບຄື: ກອງປະຊຸມເຈົ້າ ໜ້າທີ່ອາວຸໂສ ເພື່ອກະກຽມໃຫ້ແກ່ກອງປະຊຸມລັດຖະມົນຕີ ມີ 5 ກອງປະຊຸມ ແລະ ກອງປະຊຸມ ລັດຖະມົນຕີ ປະກອບມີ 5 ກອງປະຊຸມ ຄື: ກອງປະຊຸມຄົບຄະນະລັດຖະມົນຕີອາຊຽນ, ກອງປະຊຸມລັດຖະມົນຕີອາຊຽນ ບວກ ສາມ, ບວກ ສາທາລະນະລັດ ປະຊາຊົນຈີນ, ບວກ ຍີ່ປຸ່ນ ແລະ ບວກ ສາທາລະນະລັດເກົາຫລີ ໂດຍມີບັນດາຄະນະ ຜູ້ແທນຈາກບັນດາປະເທດສະມາຊິກອາຊຽນ, ປະເທດສັງເກດການ, ກອງເລຂາອາຊຽນ ແລະ ປະເທດຄູ່ຮ່ວມເຈລະຈາ ຈໍານວນ 250 ກ່ວາທ່ານ ເຂົ້າຮ່ວມ.

ກອງປະຊຸມໃນຄັ້ງນີ້ ໄດ້ແລກປ່ຽນທັດສະນະກ່ຽວກັບ ສະພາບການເກີດອາຊະຍາກຳ ແລະ ບົດຮຽນໃນການຕ້ານອາຊະຍາກຳຂ້າມຊາດ ລະຫວ່າງ ປະເທດສະມາຊິກອາຊຽນດ້ວຍກັນ ກໍຄື ລະຫວ່າງ ອາຊຽນ ກັບ ປະເທດຄູ່ຮ່ວມເຈລະຈາ; ທົບທວນຄືນ ການຈັດຕັ້ງປະຕິບັດບັນດາແຜນງານ, ໂຄງການ, ຂໍ້ຕົກລົງຕ່າງໆຂອງກອງປະຊຸມຄັ້ງທີ່ຜ່ານມາ; ພິຈາລະນາ ຮັບຮອງເອົາບັນດາເອກະສານຕ່າງໆ ທີ່ເປັນບ່ອນອີງໃຫ້ແກ່ ການຈັດຕັ້ງປະຕິບັດວຽກງານການຕ້ານອາຊະຍາກຳຂ້າມຊາດໃນຕໍ່ໜ້າ.

ກອງປະຊຸມ ໄດ້ຮັບຟັງການລາຍງານກ່ຽວກັບ ສະພາບການທີ່ພົ້ນເດັ່ນ ແລະ ຜົນສໍາເລັດຂອງກອງປະຊຸມ ທີ່ຂຶ້ນກັບກົນໄກກອງປະຊຸມ ລັດຖະມົນຕີອາຊຽນວ່າດ້ວຍ ການຕ້ານອາຊະຍາກຳຂ້າມຊາດ; ກອງປະຊຸມເຫັນວ່າບັນຫາອາຊະຍາກຳຂ້າມຊາດ ເປັນຕົ້ນແມ່ນ ການຄ້າຂາຍຢາເສບຕິດ, ການຄ້າມະນຸດ, ການຄ້າອາວຸດ, ອາຊະຍາກຳທາງຄອມພິວເຕີ ແລະ ອື່ນໆ ຍັງສືບຕໍ່ເພີ່ມຂຶ້ນ ແລະ ເປັນໄພຂົ່ມຂູ່ຕໍ່ຄວາມສະຫງົບປອດໄພ ໃນພາກພື້ນອາຊຽນ; ກອງປະຊຸມເຫັນໄດ້ເຖິງຄວາມຈຳເປັນ ໃນການເພີ່ມທະວີການຮ່ວມມື, ຊ່ວຍເຫລືອເຊິ່ງກັນ ແລະ ກັນ, ການແລກປ່ຽນ ຂໍ້ມູນກ່ຽວກັບ ບັນຫາອາຊະຍາກຳ ເພື່ອປ້ອງກັນ ແລະ ສະກັດກັ້ນບັນຫາດັ່ງກ່າວ. ພິເສດ, ກອງປະຊຸມໄດ້ຮັບຮອງເອົາຫລາຍເອກະສານ ທີ່ຈໍາເປັນສໍາລັບການຮ່ວມມືໃນຕໍ່ໜ້າ. ໃນນັ້ນ, ມີເອກະສານກ່ຽວກັບ ການສ້າງຕັ້ງກອງປະຊຸມໜ່ວຍງານ ວິຊາການວ່າດ້ວຍ ການຕ້ານການລັກລອບນໍາ ຄົນເຂົ້າ-ອອກເມືອງ ແລະ ເອກະສານບຸລິມະສິດຂອງປະທານກອງປະຊຸມ ປີ 2024 ຈຳນວນ 6 ສະບັບ ຄື: ຖະແຫລງການວຽງຈັນ ວ່າດ້ວຍການເພີ່ມທະວີການຮ່ວມມື ປະຕິບັດກົດໝາຍຕ້ານການ ຫລອກລວງຈ້າງງານທາງອອນລາຍ; ລະບຽບການ ວ່າດ້ວຍການປະສານງານ ທີ່ມີປະສິດທິພາບ ຂອງຈຸດປະສານງານກອງ ປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ; ລະບຽບການປະຕິບັດ ແລະ ພິທີການສໍາລັບກອງປະຊຸມ ລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ;  ເອກະສານໂຄງຮ່າງບົດສະເໜີໂຄງການ ສໍາລັບການຈັດຕັ້ງປະຕິບັດຂໍ້ລິເລີ່ມ ພາຍໃຕ້ ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ; ເອກະສານພາລະບົດບາດ ຂອງກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາ ຊະຍາກຳຂ້າມຊາດ; ຖະແຫລງການຜູ້ນໍາອາຊຽນ ວ່າດ້ວຍການເພີ່ມທະວີການຮ່ວມມື ຕ້ານການລັກລອບຄ້າຂາຍຢາເສບຕິດ ແລະ ສານເຄມີຕົ້ນ, ເອກະສານສະບັບນີ້ ຈະໄດ້ສືບຕໍ່ນໍາສະເໜີຮັບຮອງໃນ ກອງປະຊຸມສຸດຍອດອາຊຽນ ໃນເດືອນ ຕຸລາ 2024 ນີ້.

ໃນວາລະສຸດທ້າຍຂອງການດໍາເນີນ ກອງປະຊຸມໄດ້ມີພິທີມອບຮັບໜ້າທີ່ ໃນການເປັນປະທານກອງປະຊຸມ ລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາ ຂ້າມຊາດໃນຄັ້ງຕໍ່ໄປ (ຄັ້ງທີ 19) ທີ່ປະເທດມາເລເຊຍ ຈະເປັນເຈົ້າພາບ ໂດຍການກ່າວມອບຂອງ ທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ໂດຍທ່ານໄດ້ສະແດງຄວາມຮູ້ສຶກເປັນກຽດ ແລະ ພາກພູມໃຈ ຢ່າງຍິ່ງທີ່ ສປປ ລາວ ໄດ້ເປັນເຈົ້າພາບ ແລະ ປະທານກອງປະຊຸມລະດັບລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ກໍຄື ກອງປະຊຸມຂອງເຈົ້າໜ້າທີ່ອາວຸໂສ ແລະ ກອງປະຊຸມໜ່ວຍງານວິຊາການທີ່ກ່ຽວຂ້ອງ ໃນປີ 2024 ນີ້.

ຜ່ານການປະຕິບັດໜ້າທີ່ປະທານ ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມທີ່ກ່ຽວຂ້ອງ, ເກືອບໜຶ່ງປີຜ່ານມາ ເຫັນວ່າພວກເຮົາສາມາດຍາດໄດ້ ຜົນສໍາເລັດຫລາຍດ້ານ, ນໍາຜົນປະໂຫຍດຕົວຈິງ ມາສູ່ບັນດາປະເທດ ສະມາຊິກອາຊຽນ. ພ້ອມນີ້, ທ່ານຍັງສະແດງຄວາມເຊື່ອໝັ້ນວ່າ ພາຍໃຕ້ການເປັນປະທານ ຂອງປະເທດມາເລເຊຍ, ກອງປະຊຸມອາຊຽນ ລະດັບຕ່າງໆ ຈະສາມາດຍົກສູງບົດບາດຂອງຕົນ ໃນການຕ້ານອາຊະຍາກຳຂ້າມຊາດ ເປັນການປະກອບສ່ວນເຂົ້າໃນ ການຮັກສາຄວາມສະຫງົບປອດໄພ ສ້າງເງື່ອນໄຂອຳນວຍຄວາມສະດວກ ໃຫ້ແກ່ການພັດທະນາປະເທດຊາດ ຍົກລະດັບຊີວິດການເປັນຢູ່ ຂອງປະຊາຊົນ ໃນພາກພື້ນອາຊຽນໃຫ້ນັບມື້ດີຂຶ້ນ.

ຂ່າວ: ສົມຫວັງ

ພາບ: ອ່າຍຄໍາ

KPL