*ດິນຟ້າອາກາດແມ່ນມີຄວາມສຳຄັນທີ່ສຸດຕໍ່ການຜະລິດກະສິກຳ, ການຜະລິດກະສິກຳທີ່ດີເປັນມິດຕໍສິ່ງແວດລ້ອມ ກໍເປັນບັນຫາຕົ້ນຕໍໃນການຮັກສາສະພາບດິນຟ້າອາກາດໃຫ້ອຸດົມສົມບູນ. ຍ້ອນເຫັນຄວາມສຳຄັນດັ່ງກ່າວເມື່ອມໍ່ໆມານີ້, ອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ແລະ ຫ້ອງການກະສິກຳ ແລະ ປ່າໄມ້ແຂວງອັດຕະປື (PAFO) ໄດ້ຮ່ວມກັນຈັດຕັ້ງປະຕິບັດໂຄງການ  “ສ້າງຄວາມທົນທານຕໍ່ດິນຟ້າອາກາດ ແລະ ລະບົບກະສິກໍາທີ່ເປັນມິດກັບສ່ິງແວດລ້ອມ ແລະ ການດຳລົງຊີວິດຢູ່ແຂວງອັດຕະປື” (Climate REAL) ເຊິ່ງເປັນໜຶ່ງໃນອົງປະກອບຂອງແຜນງານການເສີມສ້າງຄວາມເຂັ້ມແຂງເພື່ອຮັບມືກັບການປ່ຽນແປງດິນຟ້າອາກາດແບບປະສົມປະສານ (IPCREA) ທີ່ໄດ້ຮັບທຶນຈາກອົງການຮ່ວມມືສາກົນ ສ ເກົາຫລີ (KOICA).

      ທ່ານ ຄໍາບູນ ດວງພະບາງ ຮອງເຈົ້າແຂວງອັດຕະປື, ໃຫ້ຮູ້ວ່າ: ໂຄງການດັ່ງກ່າວໄດ້ຖືກສ້າງຂຶ້ນ ແລະ ຈັດຕັ້ງປະຕິບັດມາແຕ່ເດືອນ ສິງຫາ 2020 ເປັນຕົ້ນມາ ເພື່ອຍົກລະດັບຄວາມທົນທານຕໍ່ດິນຟ້າອາກາດໃຫ້ແກ່ລັດຖະບານ ສປປ ລາວ ແລະ ປະຊາຊົນແຂວງອັດຕະປື ໂດຍສະເພາະຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນປີ 2018 ທັງເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນກວ່າຕອນກ່ອນເກີດໄພພິບັດ, ໂດຍຜ່ານການປັບປຸງຜົນຜະລິດກະສິກໍາ, ການເຮັດກະສິກໍາທີ່ມີຄວາມທົນທານຕໍ່ດິນຟ້າອາກາດ, ການພັດທະນາສີມືແຮງງານ, ການຄຸ້ມຄອງຄວາມສ່ຽງໄພພິບັດທີ່ສອດຄ່ອງກັບບັນດາບູລິມະສິດການພັດທະນາກະສິກໍາຂອງລັດຖະບານ. ຢ່າງໃດກໍ່ຕາມຖ້າບໍ່ຮັບການສະໜັບສະໜູນດ້ານເຕັກນິກຈາກອົງການ FAO ແລະ ການປະກອບສ່ວນດ້ານທຶນຮອນຈາກອົງການ KOICA, ຊີວິດການເປັນຢູ່ຂອງປະຊາຊົນທ່ີດຳລົງຊີວິດຢູ່ໃນເຂດເປ້ົາໝາຍກ່ໍຍາກທີ່ຈະໄດ້ຮັບການຟື້ນຟູໃຫ້ດີຂຶ້ນ.

      ຂະນະທີ່ ທ່ານນາງ ຄະຢອງ ມີຄິມຜູ້ຕາງໜ້າອົງການ FAO ປະຈຳ ສປປ ລາວ, ໄດ້ຍົກໃຫ້ເຫັນວ່າໂຄງການ Climate REAL ໄດ້ຖືກອອກແບບມາໂດຍສະເພາະ ເພື່ອຊຸກຍູ້ທຸລະກິດກະສິກຳຂະໜາດນ້ອຍ ໂດຍຜ່ານຕ່ອງໂສ້ມູນຄ່າລວມພ້ອມທັງສະໜັບສະໜູນຊຸມຊົນເພື່ອປັບປຸງ ແລະ ຄຸ້ມຄອງການເຂົ້າເຖິງນ້ຳ, ການນຳໃຊ້ທີ່ດິນ ແລະ ປັບປຸງຄຸນນະພາບຂອງດິນຢ່າງຍືນຍົງ. ໂຄງການນີ້ຍັງໄດ້ເສີມຂະຫຍາຍຄວາມອາດສາມາດຂອງລັດຖະບານທ້ອງຖິ່ນ ແລະ ຊຸມຊົນໃນການຄຸ້ມຄອງຄວາມສ່ຽງຈາກໄພພິບັດ ແລະ ການປັບຕົວເຂົ້າກັບການປ່ຽນແປງດິນຟ້າອາກາດໃນຂະແໜງກະສິກຳ, ທີ່ນໍາໄປສູ່ການຫລຸດຜ່ອນຄວາມສ່ຽງ ແລະ ເພີ່ມທະວີການກຽມຄວາມພ້ອມຮັບມືກັບໄພພິບັດ.

     ໂຄງການດັ່ງກ່າວໄດ້ຮັບການຜັນຂະຫຍາຍຢ່າງສຳເລັດຜົນຢູ່ໃນ 31 ບ້ານເປົ້າໝາຍ ໃນ 3 ເມືອງຂອງ ແຂວງອັດຕະປື (ເມືອງສາມັກຄີໄຊ, ເມືອງໄຊເສດຖາ, ເມືອງສະໜາມ ໄຊ), ໂດຍມີການປະສານສົມທົບກັນຢ່າງແໜ້ນແຟ້ນກັບໜ່ວຍງານລັດ ຂັ້ນສູນກາງ ແລະ ທ້ອງຖິ່ນ. ເຖິງແມ່ນວ່າຈະມີການຊັກຊ້າໃນການເລີ່ມຕົ້ນການຈັດຕັ້ງປະຕິບັດໂຄງການເນື່ອງຈາກສະພາບການ COVID- 19, ແຕ່ໄດ້ສ້າງຜົນປະໂຫຍດໃຫ້ແກ່ຊາວກະສິກອນ 2. 641 ຄົວເຮືອນ (ລວມທັງຊາວກະສິກອນຕົວແບບ 307 ຄົນ) ແລະ ພະນັກງານລັດ ແລະ ອໍານາດການປົກຄອງບ້ານຈາກການຈັດຕັ້ງປະຕິບັດຂອງໂຄງການ. ໃນທາງອ້ອມ, ໂຄງການ Climate REAL ໄດ້ສ້າງຜົນປະໂຫຍດໃຫ້ແກ່ 7.873 ຄົວເຮືອນ, ປະມານ 37.091  ຄົນ ໃນ 31 ບ້ານ ໂດຍ ຜ່ານພື້ນຖານໂຄງລ່າງຂອງຊຸມຊົນ ແລະ ການສ້າງຂີດຄວາມອາດສາມາດ, ລວມທັງພະນັກງານຂອງລັດໃນຂັ້ນສູນກາງ ແລະ ທ້ອງຖິ່ນປະມານ 235 ຄົນ ໂດຍຜ່ານການສ້າງຂີດຄວາມອາດສາມາດ.

    ກອງປະຊຸມສະຫລຸບໂຄງການ ດັ່ງກ່າວໄດ້ຮັບກຽດເຂົ້່າຮ່ວມໂດຍ ທ່ານນາງ ຮັງທິທັນ ຟາມ ຫົວໜ້າຊ່ຽວຊານ-ອົງການ FAO ປະຈໍາຫ້ອງການພາກພື້ນອາຊີ ແລະ ປາຊີຟິກ (RAP); ທ່ານ ສຸລະພອນ ອິນ ທະວົງ ຮອງຫົວໜ້າກົມແຜນການ ແລະ ການຮ່ວມມື (MAF); ຕາງໜ້າຈາກບັນດາພະແນກ, ເຈົ້າເມືອງສາມັກຄີໄຊ, ເຈົ້າເມືອງໄຊເສດຖາ, ເຈົ້າເມືອງສະໜາມໄຊ, ເຈົ້າເມືອງຊານໄຊ ແລະ ເຈົ້າເມືອງພູວົງ; ຕົວແທນຈາກອົງການ KOICA; ແລະ ຊາວກະສິກອນຕົວແບບດ້ານການປູກເຂົ້າ, ປູກພືດຜັກ, ລ້ຽງປາ ແລະ ປູກໝາກໂມ.

ໂດຍ: ຢ່າຕົ່ງ

KPL