ຂປລ. ໃນຊ່ວງເວລາທີ່ຕະຫລາດການບິນທົ່ວໂລກປະສົບກັບບັນຫາ ແລະ ຄວາມຕ້ອງການການເດີນທາງທີ່ເພີ່ມຂຶ້ນນັ້ນ,ສາຍການບິນຫວຽດເຈັດ (VietJet ) ມີແຜນຍົກລະດັບການບໍລິການໃຫ້ສູງຂຶ້ນ ໂດຍວາງແຜນຈະຮັບມອບເຮືອບິນໃໝ່ເຖິງ 10ລຳໃນທ້າຍປີ 2024. ການຂະຫຍາຍຕົວນີ້ຈະຊ່ວຍສ້າງຄວາມເຂັ້ມແຂງໃຫ້ກັບສາຍການບິນທີ່ທັນສະໄໝໃຫ້ສອດຄ່ອງກັບເປົ້າໝາຍການພັດທະນາ ແລະ ຊ່ວຍຍົກລະດັບປະສົບການ ການເດີນທາງຂອງຜູ້ໂດຍສານໃນເຄືອຂ່າຍເສັ້ນທາງທີ່ກວ້າງຂວາງ ລວມທັງການບໍລິການຢູ່ລາວ.

ເຮືອບິນໃໝ່ສ່ວນໃຫຍ່ມີກຳນົດການຮັບມອບຕັ້ງແຕ່ເດືອນສິງຫາ ປີ 2024ເປັນຕົ້ນ ລຸ້ນ A321neo ACF (Airbus Cabin Flex) ເປັນລຸ້ນຫລ້າສຸດຈາກ Airbus. ​ໃນ​ປີ 2019, VietJet ​ແມ່ນ​ບໍລິສັດ​ສາຍການບິນ​ທຳ​ອິດ​ຂອງ​ໂລກ​ທີ່​ໃຫ້ບໍລິການການບິນດ້ວຍ ACF.ເຮືອບິນລຸ້ນ A321neo ACF ມີການອອກແບບຫ້ອງໂດຍສານທີ່ໄດ້ຮັບການປັບປຸງໃໝ່, ຮັບປະກັນໄດ້ເລີຍວ່າຂະໜາາດຂອງບ່ອນນັ່ງ ແລະ ໄລຍະຫ່າງລະຫວ່າງບອ່ນນັ່ງທີ່ໄດ້ມາດຕະຖານຈະມອບປະສົບການທີ່ດີທີ່ສຸດສໍາລັບຜູ້ໂດຍສານ. ເຮືອບິນເຫລົ່ານີ້ຍັງປະຢັດນໍ້າມັນເຊື້ອໄຟຢ່າງໜ້ອຍ 16%, ຫລຸດຜ່ອນສຽງລົບກວນເຖິງ 75%ແລະ ຫລຸດຜ່ອນການປ່ອຍອາຍມົນລະພິດລົງເຖິງ 50%.

ເມື່ອບໍ່ດົນມາ​ນີ້, VietJet ​ໄດ້​ສັ່ງຊື້ເຮືອບິນລຳໃຫຍ່​ກັບ Airbus A330neo (A330-900) ລຸ້ນ​ໃໝ່ຈຳນວນ 20ລຳ, ດ້ວຍ​ມູນ​ຄ່າປະມານ 7,4ຕື້ໂດລາ (163 ຕື້ກີບ). ໃນໄວໆນີ້ນັກທ່ອງທ່ຽວຈະສາມາດເດີນທາງດ້ວຍເຮືອບິນເຫລົ່ານີ້ໃນການເດີນທາງໄກ ແລະ ໄດ້ຮັບປະສົບການໃນການເດີນທາງທີ່ປອດໄພ, ມີຄວາມສະດວກສະບາຍ ແລະ ສິ່ງອໍານວຍຄວາມສະດວກທີ່ທັນສະໄໝທີ່ສຸດ.

ປັດຈຸບັນ, VietJet ມີການດຳເນີນການບິນຫລາຍກວ່າ 100ລຳ, ລວມທັງເຮືອບິນລຸ້ນທີ່ມີຄວາມທັນສະໄໝ ແລະ ປອດໄພທີ່ສຸດໃນໂລກເຊັ່ນ: A320, A321ceo, A321neo ແລະ A321neo ACF ແລະ A330. ສາຍ​ການ​ບິນ​ຍັງມຸ່ງ​ໝັ້ນ​ໃນ​ການ​ປົກ​ປັກ​ຮັກ​ສາ​ສິ່ງ​ແວດ​ລ້ອມ ​ແລະ ​ປະ​ສິດ​ທິ​ພາບການໃຊ້​ນ້ຳ​ມັນ​ເຊື້ອ​ໄຟ ໂດຍ​ມີ​ເປົ້າ​ໝາຍ​ທີ່ຈະຫລຸດການ​ປ່ອຍ​ອາຍມົນ​ພິດ​ໃຫ້ເປັນສູນພາຍ​ໃນ​ປີ 2050. VietJet ຍັງໄດ້​ຂົນ​ສົ່ງ​ຜູ້​ໂດຍ​ສານ​ໄປແລ້ວກວ່າ 200ລ້ານ​ຄົນ, ໃນນັ້ນລວມທັງຜູ້ໂດຍສານຫລາຍລ້ານຄົນທີ່ເດີນທາງດ້ວຍເຮືອບີນເປັນຄັ້ງທໍາອິດ. ໃນ​ຊ່ວງທຳ​ອິດ​ຂອງ​ປີ 2024, VietJet ​ໄດ້​ບໍລິການ​ຜູ້​ໂດຍສານ 13,1ລ້ານ​​ຄົນ ​ແລະ ດຳ​ເນີນ​ຖ້ຽວ​ບິນ 70.154ຖ້ຽວ. ລາຍຮັບລວມຂອງສາຍການບິນມີຢູ່ທີ່ 34.016ພັນຕື້ດົ້ງ (ປະມານ 29.835ພັນຕື້ກີບ) ໂດຍມີອາກອນກ່ອນຫັກອາກອນກຳໄລເຖິງ 1.311ພັນຕື້ດົ້ງ (ປະມານ 1.149ພັນຕື້ກີບ)ເຊິ່ງເພີ່ມຂຶ້ນ 15%ແລະ 433%ຕໍ່ປີ. ກໍາໄລໄດ້ເກີນເປົ້າໝາຍໃນເຄິ່ງປີເຖິງ 21%. ນອກນັ້ນ, VietJet ໄດ້ຈ່າຍຄ່າພາສີອາກອນ ແລະ ຄ່າທຳນຽມທາງກົງທາງອ້ອມຢູ່ທີ່ 3.687ພັນຕື້ດົ້ງ (ປະມານ 3.243ພັນຕື້ກີບ).

ເຮືອບິນໃໝ່ 10ລຳທີ່ເຂົ້າມາພາຍໃນປີ 2024, Vietjet ຈະໃຊ້ໃນການຂະຫຍາຍເຄືອຂ່າຍທັງຢູ່ຫວຽດນາມ ແລະ ຕ່າງປະເທດ, ພາຍຫລັງທີ່ເພີ່ມຈຸດໝາຍປາຍທາງໃໝ່ຢູ່ອົດສະຕຣາລີ, ອິນເດຍ, ຈີນ, ຍີ່ປຸ່ນ, ສ ເກົາຫລີ, ອິນໂດເນເຊຍ, ໄທ, ສິງກະໂປ, ມາເລເຊຍ, ລາວ, ກໍາປູເຈຍແລະ ອື່ນໆ. ໂດຍສະເພາະປະເທດລາວ, ສາຍການບິນແມ່ນມີຖ້ຽວບິນຈາກນະຄອນຫລວງວຽງຈັນ ຫາ ນະຄອນໂຮ່ຈີມິນ, ໂດຍມີ 4 ຖ້ຽວບິນໄປກັບຕໍ່ອາທິດໃນວັນຈັນ, ວັນພຸດ, ວັນສຸກແລະ ວັນອາທິດ ເຊິ່ງໃຊ້ເວລາບິນພຽງແຕ່ 1ຊົ່ວໂມງ 45ນາທີ. ນອກຈາກ​ນີ້, ນັກ​ທ່ອງ​ທ່ຽວ​ສາມາດເດີນທາງ​ໄປ​ເຖິງ​ຈຸດ​ເຊື່ອມຕໍ່ສະຖານທີ່​​ອື່ນໆ​ໃນ​ພາກ​ຕາ​ເວັນ​ອອກ​ສຽງ​ໃຕ້ ​ແລະ ​ພາກ​ຕາ​ເວັນ​ອອກສຽງ​ເໜືອ​ຂອງ​ອາຊີ​. ເມື່ອໄວໆນີ້, ບໍລິສັດສາຍການບິນ Vietjet ໄດ້ປະກາດບົດບັນທຶກຄວາມເຂົ້າໃຈ (MOU) ກັບກະຊວງໂຍທາທິການ ແລະ ຂົນສົ່ງ ລາວ ເພື່ອຈັດຕັ້ງປະຕິບັດບັນດາໂຄງການທີ່ກ່ຽວຂ້ອງກັບການບິນ.ໃນນັ້ນມີການຈັດຕັ້ງສູນສ້ອມແປງລະບົບບຳລຸງຮັກສາ (MRO) ຢູ່ລາວ. ຄາດ​ວ່າ​ໂຄງການ​ເຫລົ່າ​ນີ້​ຈະ​ຊ່ວຍສ້າງ​ວຽກ​ເຮັດ​ງານ​ທຳ​ໃໝ່​ໃຫ້​ເຖິງ 2.500ຄົນ​ໃນ​ຂະ​ແໜງ​ການ​ການບິນ​ຂອງ​ປະ​ເທດ​ໃນ​ອານາຄົດ.ການເພີ່ມເຮືອບິນໃນຄັ້ງນີ້ຄາດວ່າຈະຕອບສະໜອງຄວາມຕ້ອງການຂອງນັກທ່ອງທ່ຽວ ພ້ອມທັງມອບປະສົບການການບິນທີ່ດີເລີດອີກດ້ວຍ. ຖ້ຽວ​ບິນ​ທີ່​ປອດ​ໄພ​ຂອງ Vietjet ​ມີການເຊື່ອມໂຍງຕໍ່ກັບບັນດາ​ປະ​ເທດ, ວັດທະນະທຳ ​ແລະ ທະວີບອື່ນໆ ເພື່ອຊຸກຍູ້​ການ​ພັດທະນາ​ເສດຖະກິດ, ​ແລກປ່ຽນ​ວັດທະນະທຳ ແລະ ການທ່ອງ​ທ່ຽວ.

KPL