ຂປລ
ຂປລ. ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ (ທຫລ) ຈັດກອງປະຊຸມປຶກສາຫາລືສົ່ງເສີມການນໍາໃຊ້ເງິນກີບ ແລະ ວຽກງານຄຸ້ມຄອງເງິນຕາຕ່າງປະເທດ ໃນຂົງເຂດການສຶກສາ (ການຕິດຕາມກວດກາ ການໂຄສະນາ ການຊຳລະ ແລະ ການຮັບໃຊ້ຊໍາລະຄ່າ ບໍລິການການສຶກສາ) ໃນວັນທີ 1 ສິງຫາ 2024
ຂປລ. ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ (ທຫລ) ຈັດກອງປະຊຸມປຶກສາຫາລືສົ່ງເສີມການນໍາໃຊ້ເງິນກີບ ແລະ ວຽກງານຄຸ້ມຄອງເງິນຕາຕ່າງປະເທດ ໃນຂົງເຂດການສຶກສາ (ການຕິດຕາມກວດກາ ການໂຄສະນາ ການຊຳລະ ແລະ ການຮັບໃຊ້ຊໍາລະຄ່າ ບໍລິການການສຶກສາ) ໃນວັນທີ 1 ສິງຫາ 2024 ທີ່ສໍານັກງານ ທຫລ ໂດຍການເປັນປະທານຂອງ ທ່ານ ສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ແລະ ທ່ານ ນາງ ດາລາວອນ ສິດທິພັນ ຫົວໜ້າຫ້ອງການກະຊວງສຶກສາທິການ ແລະ ກິລາ, ມີຄະນະກົມກ່ຽວຂ້ອງ ກະຊວງສຶກສາທິການ ແລະ ກິລາ, ສະ ມາຄົມການສຶກສາພາກເອກະຊົນ ແລະ ສະຖາບັນການສຶກສານາໆຊາດ ຢູ່ນະຄອນຫລວງວຽງຈັນ ເຂົ້າຮ່ວມ.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ພ້ອມກັນແລກປ່ຽນບົດຮຽນຫລາຍບັນຫາ ແລະ ໄດ້ຮັບຟັງການເຜີຍ ເອກະສານສໍາຄັນຫລາຍສະບັບ ເປັນຕົ້ນກົດໝາຍ, ນິຕິກໍາ ແລະ ຄຳສັ່ງຂອງນາຍົກລັດຖະມົນຕີ ວ່າດ້ວຍການຄຸ້ມຄອງເງິນຕາຕ່າງປະເທດ ຈາກພະແນກກ່ຽວຂ້ອງ ຂອງກົມຄຸ້ມຄອງ ເງິນຕາຕ່າງປະເທດ ເພື່ອເຮັດໃຫ້ຜູ້ເຂົ້າຮ່ວມໄດ້ເຂົ້າໃຈຫລາຍຂຶ້ນ ກ່ຽວກັບບັນຫາດັ່ງກ່າວ ເພື່ອເປັນການຊຸກຍູ້ສົ່ງເສີມການຊົມໃຊ້ເງິນກີບ ໃນການໃຊ້ຈ່າຍຕ່າງໆ ພາຍໃນປະເທດ. ສະເພາະຂົງເຂດການສຶກສາ ກໍເປັນຂົງເຂດໜຶ່ງ ທີ່ລະດົມໃຫ້ໃຊ້ຈ່າຍເປັນເງິນກີບ ໃນການເສຍຄ່າໂຮງຮຽນ, ຈ່າຍເງິນເດືອນໃຫ້ພະນັກງານຄູອາຈານ ແລະ ການຈັດຊື້ອຸປະກອນ ການຮຽນ-ການສອນຕ່າງໆ ເນື່ອງຈາກຜ່ານມາອາດມີບາງສະຖາບັນການສຶກສາ ທີ່ເກັບຄ່າຮຽນເປັນເງິນຕາຕ່າງປະເທດ ທີ່ສ້າງຄວາມຫຍຸ້ງຍາກ ໃຫ້ແກ່ຜູ້ປົກຄອງນັກຮຽນ ທີ່ບໍ່ມີເງິນຕາຕ່າງປະເທດ ຕ້ອງໄດ້ເອົາເງິນກີບ ໄປແລກປ່ຽນເອົາ ເງິນຕາຕ່າງປະເທດ ມາຈ່າຍຄ່າຮຽນ.
ການຈັດກອງປະຊຸມຄັ້ງນີ້, ເປັນການປຸກລະດົມທຸກຂົງເຂດວຽກງານ ແລະ ທຸກພາກສ່ວນໃນສັງຄົມ, ພ້ອມກັນໃຊ້ເງິນກີບ ແລະ ຫລຸດຜ່ອນການໃຊ້ຈ່າຍເງິນຕາຕ່າງປະເທດ ເພື່ອເປັນການແກ້ໄຂບັນ ຫາເຄັ່ງຮ້ອນ ຂອງລັດຖະບານ. ໃນໄລຍະຜ່ານມາ ກົມຄຸ້ມຄອງເງິນຕາຕ່າງປະເທດ ກໍໄດ້ຈັດກອງປະ ຊຸມແບບນີ້ມາແລ້ວຫລາຍຂົງເຂດ ໃນນັ້ນ, ກໍມີຂົງເຂດຖະແຫລງຂ່າວ ວັດທະນະທຳ ແລະ ທ່ອງທ່ຽວທີ່ຊຸກຍູ້ໃຫ້ນັກທ່ອງທ່ຽວ ໃຊ້ຈ່າຍເປັນເງິນກີບ. ໂດຍລວມແລ້ວ ທຫລ ມີເປົ້າໝາຍການຈະແກ້ໄຂບັນຫາໃດໜຶ່ງ ໄດ້ນັ້ນມັນຕ້ອງອາໄສທຸກພາກສ່ວນໃນສັງຄົມລາວ ເປັນເຈົ້າການນໍາກັນ ແລະ ພ້ອມກັນຈັດຕັ້ງປະຕິບັດຈະມີຜົນສຳເລັດໃນຕໍ່ໜ້າຢ່າງແນ່ນອນ.
ຂ່າວ: ໜັງສືພິມວຽງຈັນໃໝ່
KPL
