ຂປລ
ຂປລ. ບໍລິສັດການບິນຫວຽດເຈັດ (Vietjet) (HOSE: VJC) ໄດ້ອອກຖະແຫລງການກ່ຽວກັບການເງິນໃນໄລຍະ6 ເດືອນຕົ້ນປີ 2024 ຊຶ່ງຜົນປະກອບການຂອງ Vietjet ເພີ່ມຂຶ້ນກວ່າໄລຍະກ່ອນການລະບາດຂອງພະຍາດໂຄວິດ ໃນປີ 2019 ໂດຍສາຍການບິນໄດ້ຂົນສົ່ງຜູ້ໂດຍສານທັງໝົດ 13,1 ລ້ານຄົນ ດ້ວຍ 70.154 ຖ້ຽວບິນທີ່ປອດໄພ, ເຮັດໃຫ້ມີລາຍຮັບສະສົມຈາກການຂົນສົ່ງທາງອາກາດລວມທີ່ 32.893 ພັນຕື້ດົ້ງ (ປະມານ 28 ພັນຕື້ກວ່າກີບ), ເພີ່ມຂຶ້ນ 31% ເມື່ອທຽບໃສ່ໄລຍະດຽວກັນຂອງປີຜ່ານມາ.
ຂປລ. ບໍລິສັດການບິນຫວຽດເຈັດ (Vietjet) (HOSE: VJC) ໄດ້ອອກຖະແຫລງການກ່ຽວກັບການເງິນໃນໄລຍະ6 ເດືອນຕົ້ນປີ 2024 ຊຶ່ງຜົນປະກອບການຂອງ Vietjet ເພີ່ມຂຶ້ນກວ່າໄລຍະກ່ອນການລະບາດຂອງພະຍາດໂຄວິດ ໃນປີ 2019 ໂດຍສາຍການບິນໄດ້ຂົນສົ່ງຜູ້ໂດຍສານທັງໝົດ 13,1 ລ້ານຄົນ ດ້ວຍ 70.154 ຖ້ຽວບິນທີ່ປອດໄພ, ເຮັດໃຫ້ມີລາຍຮັບສະສົມຈາກການຂົນສົ່ງທາງອາກາດລວມທີ່ 32.893 ພັນຕື້ດົ້ງ (ປະມານ 28 ພັນຕື້ກວ່າກີບ), ເພີ່ມຂຶ້ນ 31% ເມື່ອທຽບໃສ່ໄລຍະດຽວກັນຂອງປີຜ່ານມາ. ກໍາໄລກ່ອນຫັກອາກອນໃນຊ່ວງໄລຍະນີ້ຢູ່ທີ່ 1.174 ພັນຕື້ດົ້ງ (ປະມານ 1 ພັນຕື້ກີບ), ເພີ່ມຂຶ້ນເຖິງ 690% ເມື່ອທຽບໃສ່ປີຜ່ານມາ. ລາຍຮັບລວມຂອງ Vietjet ໃນເຄິ່ງປີ2024 ຢູ່ທີ່34.016 ພັນຕື້ດົ້ງ (ປະມານ 30 ພັນຕື້ກີບ), ກໍາໄລກ່ອນຫັກອາກອນແມ່ນ 1.311 ພັນຕື້ດົ້ງ (ປະມານ 1.16 ພັນຕື້ກີບ), ກວມເອົາ 15% ແລະ 433% ເມື່ອທຽບປີຕໍ່ປີ, ກໍາໄລຖືວ່າເກີນຄາດໝາຍທີ່ວາງໄວ້ເຖິງ 21%.
Vietjet ໄດ້ດໍາເນີນງານບໍລິການເສັ້ນທາງການບິນຫລາຍກວ່າ 149 ເສັ້ນທາງພາຍໃນປະເທດຫວຽດນາມ ແລະຕ່າງປະເທດ, ໃນນັ້ນເສັ້ນທາງພາຍໃນປະເທດມີ 38 ເສັ້ນທາງ ແລະ ເສັ້ນທາງລະຫວ່າງປະເທດມີ 111 ເສັ້ນທາງ. ໃນເດືອນກຸມພາ 2024 Vietjet ໄດ້ເປີດສາຍການບິນໃໝ່ ທີ່ເຊື່ອມຕໍ່ນະຄອນໂຮ່ຈີ່ມິນ ກັບນະຄອນຫລວງວຽງຈັນ ດ້ວຍຖ້ຽວບິນໄປກັບ 4 ຖ້ຽວຕໍ່ອາທິດໃນວັນຈັນ, ວັນພຸດ, ວັນສຸກ ແລະ ວັນອາທິດ ເວລາເດີນທາງແມ່ນພຽງແຕ່ 1 ຊົ່ວໂມງ 45 ນາທີ. ອີກທັງໄດ້ເຊື່ອມຕໍ່ເສັ້ນທາງການບິນສຳລັບນັກທ່ອງທ່ຽວຈາກລາວ ທີ່ຈະເດີນທາງຕໍ່ໄປຍັງຈຸດ ໝາຍປາຍທາງອື່ນໆ ບໍ່ວ່າຈະເປັນປະເທດອົດສະຕຣາລີ, ອິນເດຍ, ສ ເກົາຫລີ, ຍີ່ປຸ່ນ, ຈີນ, ອິນໂດເນເຊຍ, ໄທ, ສິງກະໂປ, ມາເລເຊຍ, ກາຊັກສະຖານ ແລະອື່ນໆ.
ເມື່ອບໍ່ດົນນີ້, ບໍລິສັດ Vietjet ແລະ ກະຊວງໂຍທາທິການ ແລະ ຂົນສົ່ງ ໄດ້ປະກາດຂໍ້ຕົກລົງຊຸກຍູ້ການເຊື່ອມຕໍ່ທາງອາກາດ ລະຫວ່າງ ຫວຽດນາມ ແລະ ລາວ. ໃນປັດຈຸບັນສາຍການບິນກຳລັງດຳເນີນການສ້າງສູນບຳລຸງຮັກສາເຮືອບິນທີ່ທັນສະໄໝໃນລະດັບພາກພື້ນ ໂດຍຮ່ວມມືກັບ ສາຍການບິນລາວ ຢູ່ທີ່ສະໜາມບິນສາກົນວັດໄຕ. ຂະນະດຽວກັນ Vietjet Aviation Academy (VJAA) ໄດ້ຍຶດໝັ້ນຍຸດທະສາດ ແລະ ສ້າງວິໄສທັດ ພັດທະນາບຸກຄາລະກອນດ້ານການບິນຕາມມາດຕະຖານສາກົນ. ໃນເຄິ່ງປີທຳອິດ VJAA ໄດ້ຝຶກອົບຮົມໃຫ້ບຸກຄະລາກອນຫລາຍກວ່າ 43.000 ຄົນໃນ 3.898 ຫລັກສູດ, ລວມມີຫລັກສູດນັກບິນ ແລະ ວິສະວະກອນເຮືອບິນ (CRS). ສະຖາບັນຍັງໄດ້ມອບໃຫ້ຫ້ອງນັກບິນຈໍາລອງເພື່ອເສີມຂະຫຍາຍສະຖານະພາບເປັນສູນຝຶກອົບຮົມນັກບິນສາກົນອັນດັບຕົ້ນຂອງພາກພື້ນ. Vietjet ໄດ້ຕ້ອນຮັບນັກສຶກສາຝຶກ ງານຫລາຍຄົນ ມາສຶກສາສະພາບແວດລ້ອມໃນການເຮັດວຽກລະດັບປະເທດ, ເພື່ອມອບຄວາມຮູ້ ແລະ ປະສົບການຕົວຈິງໃຫ້ກັບເຂົາເຈົ້າ. ສາຍການບິນຍັງໄດ້ກຽມຄວາມພ້ອມກັບບັນດາມະຫາວິທະຍາໄລກ່ຽວກັບການປະຖົມນິເທດການເຮັດວຽກໃຫ້ກັບນັກສຶກສາ, ໂດຍແນະນໍາກາລະໂອກາດເຮັດວຽກຢູ່ Vietjet.
ເພື່ອສະໜັບສະໜູນການຂະຫຍາຍຕົວການບິນທົ່ວໂລກ, Vietjet ໄດ້ລົງນາມກັບບໍລິສັດ Airbus ສັ່ງຊື້ເຮືອບິນ A330neo ຈຳນວນ 20 ລຳ ມູນຄ່າ 7,4 ຕື້ໂດລາສະຫະລັດ ທີ່ງານວາງສະແດງການບິນສາກົນ (Farnborough) ໃນເດືອນ ກໍລະກົດ 2024 ທີ່ຜ່ານມາ. ພ້ອມນີ້ Vietjet ຍັງໄດ້ຮັບກຽດຈາກວາລະສານການເງິນສາກົນ International Finance ໃຫ້ເປັນ “ສາຍການບິນລາຄາທີ່ປະຢັດທີ່ດີທີ່ສຸດໃນອາຊີຕາເວັນອອກສຽງໃຕ້” ແລະ “ສາຍການບິນດີທີ່ສຸດດ້ານການບໍລິຫານການເງິນ ການບິນຂອງຫວຽດນາມ”; “ສາຍການບິນລາຄາທີ່ປະຢັດສຸດພິເສດ”ແລະ “ສາຍການບິນດ້ານການບໍລິການເທິງຖ້ຽວບິນໃນລາຄາດີທີ່ສຸດ” ໂດຍຈັດອັນດັບໃນ AirlineRatingsແລະ ຕິດຢູ່ໃນລາຍຊື່ 50 ບໍລິສັດທີ່ດີທີ່ສຸດຂອງ Forbes ໃນຫວຽດນາມປະຈຳປີ 2024.
KPL
