ຂປລ
ຕະຫລອດ 69 ປີແຫ່ງການເຕີບໃຫຍ່ຂະຫຍາຍຕົວຂອງແມ່ຍິງລາວ ພາຍໃຕ້ການນໍາພາຂອງພັກ, ລັດຖະບານກໍຄື ອົງການຈັດຕັ້ງສະຫະພັນແມ່ຍິງລາວ, ເອື້ອຍນ້ອງແມ່ຍິງໃນຂອບເຂດທົ່ວປະເທດໄດ້ຮັບການພັດທະນາຕໍ່ເນື່ອງ ແລະ ເຂັ້ມແຂງຮອບດ້ານ.
*ຕະຫລອດ 69 ປີແຫ່ງການເຕີບໃຫຍ່ຂະຫຍາຍຕົວຂອງແມ່ຍິງລາວ ພາຍໃຕ້ການນໍາພາຂອງພັກ, ລັດຖະບານກໍຄື ອົງການຈັດຕັ້ງສະຫະພັນແມ່ຍິງລາວ, ເອື້ອຍນ້ອງແມ່ຍິງໃນຂອບເຂດທົ່ວປະເທດໄດ້ຮັບການພັດທະນາຕໍ່ເນື່ອງ ແລະ ເຂັ້ມແຂງຮອບດ້ານ. ໃນໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ ມາເຖິງໃນໄລຍະສ້າງສາພັດທະນາປະເທດຊາດ ໃນປັດຈຸບັນ, ແມ່ຍິງລາວບັນດາເຜົ່າໃນທົ່ວປະເທດ ຍາມໃດກໍຄຽງບ່າຄຽງໄຫລ່ຮ່ວມກັບອ້າຍນ້ອງຊາຍ ໃນການປະຕິບັດວຽກງານທີ່ຕົນເອງຮັບຜິດຊອບດ້ວຍນໍ້າໃຈຮັກຊາດອັນສູງສົ່ງເຊິ່ງເຫັນໄດ້ມີຜົນງານອັນໂດດເດັ່ນ ແລະ ໃຫຍ່ຫລວງ, ຫລາຍທ່ານກາຍເປັນນັກຮົບແຂ່ງຂັນແລະວິລະຊົນແຫ່ງຊາດ.
ທ່ານ ອາລຸນໄຊ ສູນນະລາດເຈົ້າແຂວງແຂວງຈໍາປາສັກ ໄດ້ໃຫ້ສໍາພາດເມື່ອບໍ່ດົນມານີ້ວ່າ: ພາຍໃຕ້ການນໍາພາຂອງພັກ ເອື້ອຍນ້ອງແມ່ຍິງມີສິດສະເຫມີພາບສູງຂຶ້ນ, ໃນຂະນະດຽວກັນ ເອື້ອຍນ້ອງແມ່ຍິງ ກໍມີພັນທະຫລາຍຂຶ້ນ ຖ້າທຽບໃສ່ເອື້ອຍນ້ອງແມ່ຍິງກ່ອນມີການນໍາພາຂອງພັກ, ແມ່ຍິງສະໄຫມນັ້ນໄດ້ຖືກກົດຂີ່ຂູດຮີດບໍ່ໜ້ອຍ ຍ້ອນຮີດຄອງປະເພນີທີ່ບໍ່ສອດຄ່ອງ ແລະ ຍ້ອນການປົກຄອງໃນເວລານັ້ນເຮັດໃຫ້ແມ່ຍິງມີຂໍ້ຈໍາກັດຫລາຍຢ່າງເປັນຕົ້ນ ແມ່ຍິງຕ້ອງເປັນແມ່ເຮືອນແມ່ຊານ, ຜົວເປັນຊ້າງທ້າວໜ້າ ສ່ວນເມຍເປັນຊ້າງທ້າວຫລັງ. ນອກນັ້ນ, ຍັງມີຄວາມເຊື່ອວ່າແມ່ຍິງບໍ່ສາມາດຫາເງິນໄດ້, ຕ້ອງເຝົ້າແຕ່ເຮືອນ. ແຕ່ພາຍຫລັງທີ່ມີພັກນໍາພາເອື້ອຍນ້ອງແມ່ຍິງໄດ້ປະກອບສ່ວນເຂົ້າໃນວຽກງານຕ່າງໆ ມາຮອດປັດຈຸບັນ, ແມ່ຍິງໄດ້ກາຍເປັນການນໍາຫລາຍຂຶ້ນ, ກາຍເປັນກົມການເມືອງ, ຮອງປະທານປະເທດ, ລັດຖະມົນຕີ, ເຈົ້າເມືອງ, ເປັນນາຍທະຫານ, ເປັນນັກການທູດ, ເປັນນັກບໍລິຫານ, ແມ່ຍິງໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ. ສະເພາະແຂວງຈໍາປາສັກ ເຫັນວ່າແມ່ຍິງ ໄດ້ດໍາລົງຕໍາແໜ່ງເປັນຄະນະປະຈໍາ, ຄະນະພັກ, ເຈົ້າເມືອງເຊິ່ງໄດ້ສ່ອງແສງໃຫ້ເຫັນວ່າ ເອື້ອຍນ້ອງແມ່ຍິງ ລ້ວມແລ້ວແຕ່ມີຄວາມຮູ້, ຄວາມສາມາດ, ແມ່ຍິງໃນຍຸກປັດຈຸບັນຍັງມີຄວາມອົບອຸ່ນຂຶ້ນ, ແມ່ຍິງມີຄວາມສົດໃສຂຶ້ນ, ແມ່ ຍິງມີສິດເສລີພາບສູງຂຶ້ນ, ແມ່ຍິງມີບົດບາດຫລາຍຂຶ້ນ ບໍ່ວ່າຈະເປັນບົດບາດໃນເວທີພາຍໃນ ຫລື ເວທີສາກົນ.
ໂອກາດນີ້, ທ່ານ ອາລຸນໄຊ ສູນນະລາດ ຍັງຝາກເຖິງເອື້ອຍນ້ອງແມ່ຍິງລາວໃນຂອບເຂດທົ່ວປະເທດຈົ່ງຮັກສາມູນເຊື້ອອັນດີງາມຂອງຕົນຄືກັບຮັກສາແກ້ວຕາຂອງຕົນໂດຍສະເພາະຄວາມເປັນແມ່ຍິງລາວ ໃນການນຸ່ງສິ້ນທີ່ເປັນເອກະລັກ, ໃຫ້ສືບຕໍ່ຮັກສາ ແລະ ອະນຸລັກໄວ້ ໂດຍສະເພາະແມ່ຍິງຮຸ່ນໜຸ່ມ, ແມ່ຍິງຕ້ອງເຊື່ອໝັ້ນຕໍ່ການນໍາພາຂອງພັກ, ເຄົາລົບ ແລະ ປະຕິບັດກົດໝາຍ, ເຂົ້າຮ່ວມໃນການປະຕິບັດສິດເອກະລາດເປັນເຈົ້າຕົນເອງເນື່ອງຈາກແມ່ຍິງ ໄດ້ມີບົດບາດຫລາຍຢູ່ໃນຄົວເຮືອນ ໃນການສ້າງເສດຖະກິດຄອບຄົວ.
ໂດຍ: ກິດຕາ
KPL
