ຂປລ. ສາຍການບິນຫວຽດເຈັດ (VietJet) ແລະ ແອບັດ (Airbus) ໄດ້ລົງນາມຢ່າງເປັນທາງການໃນສັນຍາຊື້ເຮືອບິນ A330neo (A330-900) ລຸ້ນໃໝ່ຈໍານວນ 20 ລໍາ, ລວມມູນຄ່າ 7,4 ຕື້ໂດລາຕາມລາຄາຂອງລາຍຊື່ຜູ້ຜະລິດ ຢູ່ທີ່ງານວາງສະແດງການບິນສາກົນ Farnborough. ​ລົງ​ນາມ​ໃນ​ສັນຍາ​ດັ່ງກ່າວ​ມີ​ ທ່ານ Nguyen Thi Phuong Thao ປະທານບໍລິສັດສາຍການບິນ VietJet ແລະ ທ່ານ Christian Scherer ຄະນະບໍລິຫານສູງສຸດຂອງບໍລິສັດ Airbus Commercial Aircraft.

ການລົງນາມສັນຍາຄັ້ງນີ້ສະແດງໃຫ້ເຫັນເຖິງວິໄສທັດຂອງສາຍການບິນ VietJet ໃນການພັດທະນາສູ່ຄຸນນະພາບ ເຊິ່ງ VietJet ຈະ​ເອົາມາທົດ​ແທນ​ເຮືອ​ບິນ A330-300 ເປັນເຮຶອບິນປັດຈຸບັນຂອງ VietJet ທັງເປັນການເພີ່ມຄຸນນະພາບດ້ານການບໍລິການທີ່ທັນສະໄໝຂອງສາຍການບິນ VietJet ແລະ​ ສະ​ໜັບ​ສະ​ໜູນ​ແຜນ​ຍຸດ​ທະ​ສາດ​ຂອງ​ສາຍ​ການ​ບິນ​ໃນ​ການ​ຂະ​ຫຍາຍ​ເຄືອ​ຂ່າຍສາຍການບິນຂ້າມ​ທະ​ວີບ​. ທ່ານ ​Nguyen Thi Phuong Thao ປະທານບໍລິສັດສາຍການບິນ VietJet ກ່າວ​​ວ່າ: “ເຮືອ​ບິນ A330neo ລຸ້ນ​ໃໝ່ຈະຊ່ວຍ​ເພີ່ມ​ທະ​ວີ​ການ​ພັດ​ທະ​ນາ​ການ​ບິນ​ຂອງ VietJet ພ້ອມທັງຊຸກ​ຍູ້​ຄວາມ​ສາ​ມາດການ​ດຳ​ເນີນ​ງານ​ຂອງ​ສາຍ​ການ​ບິນທີ່ພວມຂະ​ຫຍາຍ​ຕົວ​ທົ່ວ​ໂລກ. ເຮືອບິນ A330neo ເປັນເຮືອບິນທີ່ທັນສະໄໝ ແລະ ປະຢັດນໍ້າມັນ ຊຶ່ງຖືກກັບຍຸດທະສາດການພັດທະນາແບບຍືນຍົງແລະ ເປັນເປົ້າໝາຍ ESG ຂອງພວກເຮົາ ໂດຍມີເປົ້າໝາຍປ່ອຍມົນລະພິດໃຫ້ເປັນສູນ (Net-Zero) ໃນປີ 2050ຜູ້ໂດຍສານຈະໄດ້ຮັບຄວາມສະດວກສະບາຍໃນການເດີນທາງໄກ ທີ່ປອດໄພ ແລະ ທັນສະໄໝ”.

ພ້ອມນີ້, ທ່ານ Benoît de Saint-Exupéry ຮອງປະທານຜູ້ບໍລິຫານຝ່າຍຂາຍAirbus Commercial Aircraft ກ່າວວ່າ: “ ເຮືອບິນ A330neo ມີຄວາມທັນສະໄໝ ແລະ ເປັນມິດກັບສິ່ງແວດລ້ອມ, ມີຫ້ອງໂດຍສານ Airspace ໄດ້ຮັບລາງວັນທີ່ເປັນເອກະລັກຫ້ອງໂດຍສານມີລະບົບໄຟສາຍໃໝ່, ມີບ່ອນເກັບກະເປົາເດີນທາງທີ່ໃຫຍ່ຂຶ້ນ ແລະ ການເຂົ້າເຖິງລະບົບການບັນເທີງ ຊຶ່ງຈະຊ່ວຍໃຫ້ VietJet ສາມາດສະໜອງປະສົບການການບິນທີ່ດີທີ່ສຸດໃຫ້ກັບຜູ້ໂດຍສານໂດຍສາມາດປັບຕົວເຂົ້າກັບແຕ່ລະຮູບແບບທຸລະກິດໄດ້ຢ່າງສົມບູນ ນີ້​ຈະ​ເປັນສິ່ງ​ທີ່​ສົມບູນແບບ​ສຳລັບ VietJet ທີ່ສະໜອງຄວາມສະດວກສະບາຍໃຫ້​ຜູ້​ໂດຍສານໃນການເດີນທາງທີ່​ໄກຂຶ້ນ ​ແລະ ລາຄາ​ທີ່ປະຢັດ ໃນຂະນະດຽວກັນຍັງຫລຸດຜ່ອນ​ການ​ຊົມ​ໃຊ້​ນ້ຳມັນ​ເຊື້ອ​ໄຟ ​ແລະ ການ​ປ່ອຍ​ອາຍພິດ​ກາກ​ບອນອີກດ້ວຍ ທີ່ຂັບເຄື່ອນດ້ວຍເຄື່ອງຈັກ Rolls-Royce Trent 7000 ລຸ້ນຫລ້າສຸດ ເຮັດໃຫ້ A330-900 ສາມາດບິນໄດ້ 7.200 nm / 13.300 ກິໂລແມັດແບບບໍ່ຢຸດ”.

ປັດຈຸບັນ VietJet ກຳລັງຂະຫຍາຍສາຍການບິນຂ້າມທະວີບ ໂດຍການພັດທະນາເຮືອບິນໃຫ້ທັນສະໄໝ ໂດຍຮ່ວມມືກັບຄູ່ຮ່ວມທີ່ມີຍຸດທະສາດລະດັບໂລກເຊັ່ນ: Airbus. ເມື່ອໄວໆນີ້ບໍລິສັດ VietJet​ ລົງນາມບົດບັນທຶກຄວາມເຂົ້າໃຈ ກັບ​ກະຊວງ​ໂຍທາ​ທິການ ​ແລະ ຂົນ​ສົ່ງ​ຂອງປະເທດລາວ ​ເພື່ອ​ຂະຫຍາຍ​ຫລາຍ​ໂຄງການ​ກ່ຽວ​ກັບ​ການບິນ. ​ໃນ​ນັ້ນ​, ມີ​ການ​ສ້າງ​ຕັ້ງ​ສູນ​ສ້ອມ​ແປງ​ບຳລຸງ​ຮັກສາ (MRO) ໃນປະເທດລາວ ໂຄງການ​ເຫລົ່າ​ນີ້ຄາດ​ວ່າ​​ຈະ​ສ້າງ​ວຽກ​ເຮັດ​ງານ​ທຳ​ໃໝ່​ໄດ້ເຖິງ 2.500 ຄົນ​ໃນ​ຂະ​ແໜງ​ການບິນ​ຂອງ​ປະ​ເທດລາວ​ໃນ​ອະນາຄົດ. ສຳລັບນັກເດີນທາງຈາກປະເທດລາວ ສາຍການບິນ VietJet ໄດ້ເປີດເສັ້ນທາງໃໝ່ ໃນຕົ້ນປີນີ້ ໂດຍເຊື່ອມຕໍ່ນະຄອນຫລວງວຽງຈັນ ຫານະຄອນໂຮ່ຈີມິນ ຊຶ່ງເປັນນະຄອນໃຫຍ່ທີ່ສຸດຂອງປະເທດຫວຽດນາມ ໂດຍມີຖ້ຽວບິນໄປກັບ 4 ຖ້ຽວຕໍ່ອາທິດໃນວັນຈັນ, ວັນພຸດ, ວັນສຸກ ແລະ ວັນອາທິດ, ໃຊ້ເວລາເດີນທາງພຽງແຕ່ 1 ຊົ່ວໂມງ 45 ນາທີ. ຈາກຈຸດເຊື່ອມຕໍ່ໃນປະເທດຫວຽດນາມ ນັກທ່ອງທ່ຽວລາວ ສາມາດເດີນທາງໄປເຖິງສະຖານທີ່ທ່ອງທ່ຽວອື່ນໆໃນອາຊີຕາເວັນອອກສຽງໃຕ້ ແລະຕາເວັນອອກສຽງເໜືອ, ອົດສະຕຣາລີ, ອິນເດຍ ແລະ ອື່ຶນໆ ຜ່ານເຄືອຂ່າຍການບິນຂອງ VietJet.

KPL