ຂປລ. ທ່ານ ພັນໂທ ບຸນຈັນ ມະນີສອນ ຄະນະພັກກອງພັນໃຫຍ່ ຫົວໜ້າພະແນກເສນາທິການກອງພັນໃຫຍ່ 202 ລົງພົບ​ປະ​ໂອ້​ລົມ​ພະນັກງານ​-ນັກຮົບ ກອງພັນທີ 2 ຂຶ້ນກັບກອງພັນໃຫຍ່ 202 ກອງພົນທີ 2 ໃນວັນທີ 23 ກໍລະກົດ 2024 ໂດຍມີີບັນດາຂະແໜງວິຊາການທີ່ກ່ຽວຂ້ອງ, ຄະນະພັກ-ຄະນະບັນຊາ ກອງພັນ, ກອງຮ້ອຍ ແລະ ພະນັກງານ-ນັກຮົບ ທົ່ວກອງພັນທີ 2 ເຂົ້າຮ່ວມ.
  ທ່ານ ພັນໂທ ສຸທີ ສີສະອາດ ຮອງເລຂາຄະນະພັກຮາກຖານ ຫົວໜ້າການທະຫານກອງພັນທີ 2 ໄດ້ກ່າວວ່າ: ໃນໄລຍະຜ່ານມາ, ຄະນະພັກ-ຄະນະບັນຊາ ໄດ້ຖືເອົາວຽກງານສຶກສາອົບຮົມ ການເມືອງນຳພາແນວຄິດເປັນບັນຫາສຳຄັນ, ຈັດຕັ້ງເຜີຍແຜ່ບັນດາຂໍ້ກຳນົດກົດລະບຽບ, ບັນດາມະຕິຄຳສັ່ງຂອງຂັ້ນເທິງ ໃຫ້ພະນັກງານສະມາຊິກພັກ-ນັກຮົບ ໄດ້ຮັບຮູ້ເຊື່ອມຊຶມ ແລະ ເຂົ້າໃຈແຈ້ງຕໍ່ແນວທາງນະໂຍບາຍ ຂອງພັກ-ລັດຢ່າງເລິກເຊິ່ງ, ເອົາໃຈໃສ່ວຽກງານອົບຮົມຫັດແອບຮ່ຳຮຽນ, ເອົາໃຈໃສ່ເພີ່ມທະວີລະບົບປະຈຳການຢ່າງເຂັ້ມງວດ, ຈັດຕັ້ງກຳລັງກຽມພ້ອມກອບກູ້ໄພພິບັດ ເປັນກຳລັງເຄື່ອນທີ່ໄວໃຫ້ກອງພັນໃຫຍ່ 202. ນອກນັ້ນ, ຍັງໄດ້ເອົາໃຈໃສ່ວຽກງານການປັບປຸງກໍ່ສ້າງກົມກອງ, ວຽກງານການປູກຝັງ-ລ້ຽງສັດ ແກ້ໄຂຊີວິດການເປັນຢູ່, ວຽກງານການກຽມພ້ອມສູ້ຮົບ ເຮັດໃຫ້ສະພາບຂອບເຂດກົມກອງຮັບຜິດຊອບ ມີຄວາມສະຫງົບໂດຍພື້ນຖານ.
  ໂອກາດນີ້, ທ່ານ ພັນໂທ ບຸນຈັນ ມະນີສອນ ໄດ້ຍົກໃຫ້ເຫັນສະພາບການ ພາກພື້ນ ເສດຖະກິດ-ສັງຄົມ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດທີ່ກົມກອງຍາດມາໄດ້ ໃນໄລຍະຜ່ານມາ, ​ພ້ອມເນັ້ນໜັກ​ໃຫ້​ຄະນະ​ພັກ-​ຄະນະ​ບັນຊາແຕ່ລະຂັ້ນ ຕ້ອງເປັນເຈົ້າການຍົກສູງບົດບາດ ການນຳພາ-ບັນຊາຂອງຕົນ, ເອົາໃຈໃສ່ສືບຕໍ່ວຽກງານສຶກສາອົບຮົມ ການເມືອງ ນໍາພາແນວຄິດໃຫ້ເປັນປົກກະຕິ, ​ເພີ່ມທະວີຄວາມສາມັກຄີ ໃຫ້ແໜ້ນແຟ້ນ, ສືບຕໍ່ປັບປຸງແບບແຜນວິທີເຮັດວຽກ, ເຮັດວຽກເປັນໝູ່ຄະນະ, ແບ່ງບຸກຄົນຮັບຜິດຊອບ, ເອົາໃຈໃສ່ປະຕິບັດ 7 ລະບອບ 18 ວຽກຂອງກອງທັບໃຫ້ເຂັ້ມງວດ, ມີສະຕິລະວັງຕົວ ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ, ເສີມຂະຫຍາຍມູນເຊື້ອອັນດີງາມຂອງຊາດ, ຂອງພັກ, ຂອງກອງທັບ, ເອົາໃຈໃສ່ປັບປຸງວຽກງານການກຽມພ້ອມສູ້ຮົບ, ກອບກູ້ໄພພິບັດ, ວຽກງານປັບປຸງກໍ່ສ້າງກົມກອງ ໄປຄຽງຄູ່ກັບວຽກງານເພີ່ມພູມຜະລິດຜົນ ປູກຝັງ-ລ້ຽງສັດ ແກ້ໄຂຊີວິດການເປັນຢູ່ ໃຫ້ດີຂຶ້ນຕາມທິດນຳ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕິດພັນກັບຂະບວນການ ສ້າງກອງ 3 ປອດ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ຂອງກະຊວງປ້ອງກັນປະເທດ ວາງອອກ ໃຫ້ປະກົດຜົນເປັນຈິງ.

KPL