ຂປລ. ອົງການສົ່ງເສີມການຄ້າ-ການລົງທຶນ ສ ເກົາຫລີ (KOTRA) ວຽງ​ຈັນ ຈັດສຳມະນາວ່າດ້ວຍບົດລາຍງານເທື່ອສຸດທ້າຍ ຂອງໂຄງ​ການ​ແບ່ງ​ປັນ​ຄວາມ​ຮູ້ (KSP) ພາຍ​ໃຕ້ຫົວຂໍ້ “ການປັບປຸງ ນ່ານຟ້າ ແລະ ວົງຈອນບິນຂອງສະໜາມບິນສາກົນຫລວງພະບາງ” ​ໃນ​ວັນ​ທີ 3 ກັນຍາ 2024 ຜ່ານ​ມາ ຢູ່​ນະຄອນຫລວງ​ວຽງ​ຈັນ ໂດຍການສະໜັບສະໜູນຈາກ ກະຊວງເສດຖະກິດ ແລະ ການເງິນ ສ ເກົາ ຫລີ ແນໃສ່ ຍົກລະດັບອຸສາຫະກຳການບິນຂອງລາວ, ສົ່ງເສີມການທ່ອງທ່ຽວ, ແລະ ສົ່ງເສີມການຟື້ນຟູເສດຖະກິດຂອງລາວ.

ທ່ານ ຊອຍ ຍອນ ຊຸງ ທີ່ປຶກສາອາວຸໂສ, ອະດີດເອກອັກຄະລັດຖະທູດ ສ ເກົາຫລີ ປະຈຳປະເທດ ອູຣູກວາຍ ​ໄດ້​ມີ​ຄໍາ​ເຫັນ​​ໂດຍເນັ້ນໜັກເຖິງຄວາມສຳຄັນ ແລະ ຜົນປະໂຫຍດທີ່ໄດ້ຮັບຈາກໂຄງການ ​ໂດຍ​ສະ​ເພາະການປັບປຸງ ສະໜາມບິນສາກົນຫລວງພະບາງ ເພື່ອໃຫ້ໄດ້ ມາດຕະຖານ ແລະ ສາມາດເປີດເສັ້ນທາງການບິນໂດຍກົງ ໄປ ສ ເກົາຫລີ ໄດ້. ໂຄງການ KSP ຄັ້ງນີ້, ຄາດວ່າຈະສາມາດຍົກລະດັບສະໜາມບິນ ໃຫ້ໄດ້ມາດຕະຖານອົງການ ການບິນພົນລະເຮືອນສາກົນ (ICAO), ປັບປຸງຂັ້ນຕອນການບິນ ແລະ ສ້າງສະພາບແວດລ້ອມ ໃນການດໍາເນີນງານ ໃຫ້ມີຄວາມປອດໄພຫລາຍຂຶ້ນ ​ເຊິ່ງການປັບປຸງສິ່ງ​ດັ່ງກ່າວ ຈະດຶງດູດສາຍການບິນຂອງ ສ ເກົາຫລີ ໃຫ້ເປີດເສັ້ນທາງບິນໂດຍກົງ ຈາກສະໜາມບິນສາກົນອິນຊອນ ຫາ ຫລວງພະບາງ ເຊິ່ງເປັນຂີດໝາຍສຳຄັນ ໃນການພັດທະນາການບິນ ແລະ ການເຊື່ອມຕໍ່ສາກົນ ຂອງລາວ.  ຄວາມ​ຄືບ​ໜ້າຄັ້ງ​ນີ້​, ຖື​ວ່າ​ເປັນ​ພື້ນຖານ​ອັນ​ສຳຄັນ​ ໃນ​ການ​ສະໜັບສະໜູນ ​ການ​ພັດທະນາ​ການທ່ອງທ່ຽວ​ ແບບ​ຍືນ​ຍົງ​ຂອງ ສປປ ລາວ.

​ທ່ານ ໄຊສົງຄາມ ມະໂນທຳ ຮອງລັດຖະມົນຕີກະຊວງ ໂຍທາທິການ ​ແລະ ຂົນ​ສົ່ງ ໄດ້​ສະ​ແດງ​ຄວາມ​ຊົມ​ເຊີຍ​ຕໍ່​ການ​ສະໜັບສະໜູນ​ຂອງ​ລັດຖະບານ ສ ເກົາຫລີ ​ໃນ​ການ​ປັບປຸງ​ສິ່ງ​ອຳນວຍ​ຄວາມ​ສະດວກ ​ແລະ ລະບຽບ​ການ​ຂອງ​ສະໜາມ​ບິນ​ ໃຫ້​ທັນ​ສະ​ໄໝ​ຕາມ​ມາດຖານ​ສາກົນ. ພ້ອມ​ນີ້, ທ່ານ​ຍັງໄດ້​ຍົກ​ໃຫ້​ເຫັນ​ຄວາມ​ຈຳ​ເປັນ​ ​ແລະ ຄວາມ​ສຳຄັນ​ໃນ​ການ​ຝຶກ​ອົບຮົມ​ພະນັກງານ​ການບິນ ​ໂດຍ​ທ່ານ​ສະ​ເໜີ​ໃຫ້​ສືບ​ຕໍ່​ໃຫ້ ການ​ສະໜັບສະໜູນ​ດ້ານ​ນີ້ຕື່ມອີກ.

​ໂອກາດ​ນີ້, ບໍລິສັດ  Moon Engineering Co., Ltd ແລະ ບໍລິສັດ Korean Airport Corporation ຈາກ ສ ເກົາຫລີ ໄດ້ນຳສະເໜີສິ່ງທ້າທາຍທີ່ໄດ້ພົບພໍ້ ແລະ ແນວທາງໃນການພັດທະນາ ເຊິ່ງລວມມີ ການປັບຮູບແບບພື້ນທີ່ຄວບຄຸມ Terminal(TMA), ການປັບປຸງການ ອອກແບບພື້ນທີ່ນ່ານຟ້າ ແລະ ການປບປຸງວົງຈອນບິນ ຂອງສະໜາມບິນສາກົນຫລວງພະບາງ ໃນຂົງເຂດ TMA. ນອກນັ້ນ, ທັງສອງບໍລິສັດ ຍັງໄດ້ຍົກໃຫ້ເຫັນ ແນວຄວາມຄິດ ການອອກແບບໃໝ່ ສໍາລັບສະໜາມບິນສາກົນຫລວງພະບາງ ລວມທັງນຳສະເໜີ ລາຍລະອຽດຕ່າງໆ ຂອງແຜນການໃນປີຕໍ່ໄປ ເຊິ່ງລວມມີ ວຽກງານການອອກແບບເພີ່ມຕື່ມ ແລະ ການຈັດຝຶກອົບຮົມໃຫ້ ຜູ້ຄຸ້ມຄອງການບິນຂອງລາວ.

ພ້ອມກັນ​ນີ້, ທ່ານ ຈອງ ຢອງຊູ (Jung Yung Soo) ເອກອັກ​ຄະ​ລັດ​ຖະທູດ ສ ເກົາຫລີ ປະຈຳລາວ ​ໄດ້ສະ​ແດງ​ຄວາມ​ເຊື່ອ​ໝັ້ນ​ວ່າ: ການຮ່ວມມືຄັ້ງນີ້, ​ຈະ​ເພີ່ມ​ທະວີ​ຄວາມ​ປອດ​ໄພ​ ດ້ານ​ການ​ຂົນ​ສົ່ງ​ທາງ​ອາກາດ​ຢູ່​ລາວ ​ແລະ ​ເພີ່ມ​ທະວີ​ການ​ພົວພັນ​ດ້ານ​ເສດຖະກິດ​ ລະຫວ່າງ​ສອງ​ປະ​ເທດ ໂດຍສະເພາ ແມ່ນ​ໃນ​ຂົງ​ເຂດ​ການທ່ອງທ່ຽວ.

ທ່ານ ພາກ ຈອງຄິວ ຜູ້ອຳນວຍການ​ໃຫຍ່ ອົງການສົ່ງເສີມການຄ້າ-ການລົງທຶນ ສ ເກົາຫລີ (KOTRA) ວຽງ​ຈັນ ​ໄດ້ກ່າວວ່າ: ການ​ປັບ​ປຸງ​ການ​ຄຸ້ມຄອງ ນ່ານຟ້າ​ຜ່ານ​ໂຄງ​ການ KSP ສາ​ມາດ​ໃຫ້​ສົມ​ບູນ​ຂຶ້ນ​ໄດ້ ໂດຍ​ການ​ຍົກ​ລະ​ດັບ ການປະຕິບັດງານຂອງສະໜາມບິນ, ປັບປຸງແສງ​ສະ​ຫວ່າງໃນອາຄານຜູ້​ໂດຍ​ສານ ແລະ ບັນດາ​ໂຄງ​ລ່າງ​ພື້ນ​ຖານ​ທີ່​ສໍາ​ຄັນ​ອື່ນໆ. ການ​ປັບປຸງດັ່ງກ່າວ​ ສາມາດ​ບັນລຸ​ໄດ້​ໂດຍ​ການ ​ຮ່ວມ​ມື​ພາກ​ລັດ-​ເອກະ​ຊົນ (PPP), ການ​ພັດທະນາ​ດັ່ງກ່າວ​ ບໍ່​ພຽງ​ແຕ່​ຈະ​ປັບປຸງ​ຄວາມ​ປອດ ​ໄພ ​ແລະ ປະສິດທິພາບ​ການ​ຂົນ​ສົ່ງ ​ທາງ​ອາກາດ​ເທົ່າ​ນັ້ນ, ຫາກ​ຍັງ​ຊ່ວຍ​ຊຸກຍູ້​ການພັດທະນາ​ເສດຖະກິດ ​ແລະ ຮັດ​ແໜ້ນ​ສາຍ​ພົວພັນ ​ທາງ​ເສດຖະກິດ​ລະຫວ່າງ ສ ​ເກົາຫລີ ​ແລະ ລາວ.

KPL