ຂປລ
ຂປລ. ດ່ານທ້ອງຖິ່ນປາກຕາພານ ຕັ້ງຢູ່ບ້ານປາກຕາພານ, ເມືອງລະຄອນເພັງ ແຂວງສາລະວັນ ມີປະຕູດ່ານເຊິ່ງໜ້າກັບດ່ານຊາຍແດນຖາວອນປາກແຊງ ອໍາເພີນາຕານ ແຂວງອຸບົນຣາຊະທານີ ຣາຊະອານາຈັກໄທ. ປັດຈຸບັນ, ພາກສ່ວນກ່ຽວຂ້ອງ ກໍຄື ເມືອງລະຄອນເພັງ ແຂວງສາລະວັນ ແມ່ນໄດ້ກຽມຄວາມພ້ອມຮອບດ້ານເພື່ອເປີດດ່ານດັ່ງກ່າວ ເປັນດ່ານສາກົນ.
ຂປລ. ດ່ານທ້ອງຖິ່ນປາກຕາພານ ຕັ້ງຢູ່ບ້ານປາກຕາພານ, ເມືອງລະຄອນເພັງ ແຂວງສາລະວັນ ມີປະຕູດ່ານເຊິ່ງໜ້າກັບດ່ານຊາຍແດນຖາວອນປາກແຊງ ອໍາເພີນາຕານ ແຂວງອຸບົນຣາຊະທານີ ຣາຊະອານາຈັກໄທ. ປັດຈຸບັນ, ພາກສ່ວນກ່ຽວຂ້ອງ ກໍຄື ເມືອງລະຄອນເພັງ ແຂວງສາລະວັນ ແມ່ນໄດ້ກຽມຄວາມພ້ອມຮອບດ້ານ ເພື່ອເປີດດ່ານດັ່ງກ່າວ ເປັນດ່ານສາກົນ.
ທ່ານ ທອງດີ ຈັນທະວົງ ເຈົ້າເມືອງລະຄອນເພັງ ໃຫ້ສໍາພາດຕໍ່ນັກຂ່າວໃນວັນທີ 4 ກັນຍາ 2024 ວ່າ: ກະກຽມຄວາມພ້ອມໃນການເປີດດ່ານສາກົນ ປາກຕະພານ ຕາມດໍາລັດ 558/ລບ ແມ່ນໄດ້ຍົກຍ້າຍສິ່ງກີດຂວາງ ໃນບໍລິເວນດ່ານ ໃຫ້ມີຄວາມສວຍງາມ, ຕິດປ້າຍອໍານວຍ ຄວາມສະດວກ, ເທເບຕົງທາງຍ່າງແຕ່ອາຄານ ເຂົ້າ-ອອກດ່ານ ຫາທາງລົງນໍ້າຂອງ, ປັບປຸງອາຄານສະຖານທີ່ ບ່ອນຄ່ຽນຖ່າຍສິນຄ້າ. ພ້ອມນີ້, ຍັງໄດ້ນໍາພາອົງການປົກຄອງບ້ານ, ພ້ອມດ້ວຍພໍ່ແມ່ປະຊາຊົນ ໂດຍສະເພາະ ບ້ານລຽບຕາມເສັ້ນທາງເລກ 13 ໃຕ້ ສ້າງຂະບວນການອອກງານ ອານາໄມຕາມເສັ້ນທາງ ໄປຫາຈຸດກໍ່ສ້າງຂົວມິດຕະພາບ ລາວ-ໄທແຫ່ງທີ 6 , ສ້ອມແປງດອກໄຟເຍືອງທາງ, ປະດັບປະດາຕິດທຸງຊາດ, ທຸງພັກ, ທຸງທິວ, ມີການຝຶກຊ້ອມສິລະປະ-ວັນນະຄະດີ, ຟ້ອນສາລະວັນຂອງນັກຮຽນ, ກະກຽມສິນຄ້າຫັດຖະກໍາ-ກະສິກໍາ ມາວາງສະແດງ ແລະ ຈໍາໜ່າຍ ເປັນຕົ້ນ ສິນຄ້າໂອດັອບ, ຫັດຖະກໍາ ຈັກສານຫວາຍ, ແຜນແຜໜອງແສງ, ສາດເຕີຍ, ຟອຍທັກ, ປີ້ງໄຂ່, ປີ້ງໄກ່ ແລະ ອື່ນໆ. ພ້ອມທັງໄດ້ຈັດວາງກໍາລັງ ປກຊ-ປກສ, ກອງຫລອນບ້ານ ຕະຫລອດກອງຮ້ອຍຊາຍແດນ ເພື່ອກຽມພ້ອມຮັບໃຊ້ໃນງານຄັ້ງນີ້.
ດ່ານທ້ອງຖິ່ນປາກຕາພານ ໄດ້ນໍາໃຊ້ເປັນດ່ານປະເພນີມາແຕ່ປີ 1988 ເປັນຕົ້າມາ ແລະ ໄດ້ຮັບການປັບປຸງທາງດ້ານພື້ນຖານໂຄງລ່າງ, ດ້ານບຸກຄະລາກອນປະຈໍາດ່ານຕະຫລອດມາ. ດ່ານປາກຕາພານມີເນື້ອທີ່ ທັງໝົດບໍ່ນັບເນື້ອທີ່ບໍລິການ ແລະ ເຂດທຸລະກິດມີ 5 ເຮັກຕາ, ສະເພາະບໍລິເວນດ່ານກວດກາຄົນ ແລະ ສິນຄ້າມີເນື້ອທີ່ 1,5 ເຮັກຕາ, ເນື້ອທີ່ສາງຄ່ຽນຖ່າຍສິນຄ້າມີ 3,5 ເຮັກຕາ.
ຂ່າວ-ພາບ: ຄັດທະນາມ
KPL
