ຂປລ
ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ແຂວງຫລວງພະບາງ ຮັບຮອງ ເມືອງຈອມເພັດ ເປັນເມືອງຢຸດຕິການຖ່າຍຊະຊາຍ ເມືອງທີ 11 ຂອງແຂວງ ໃນວັນທີ 23 ກໍລະກົດ 2024
![](https://kpl.gov.la/Media/Upload/News/Thumb/2024/07/24/240724--600.gif)
ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ແຂວງຫລວງພະບາງ ຮັບຮອງ ເມືອງຈອມເພັດ ເປັນເມືອງຢຸດຕິການຖ່າຍຊະຊາຍ ເມືອງທີ 11 ຂອງແຂວງ ໃນວັນທີ 23 ກໍລະກົດ 2024 ໂດຍການເຂົ້າຮ່ວມຂອງທ່ານ ບຸນເລື່ອມ ມະນີວົງ ຮອງເຈົ້າແຂວງ ຜູ້ຊີ້ນໍາຂົງເຂດ ວຽກງານ ວັດທະນະທໍາ-ສັງຄົມ ຂອງແຂວງຫລວງພະບາງ, ທ່ານ ສາຍສະໜອນ ສາລິວົງ ເຈົ້າເມືອງໆຈອມເພັດ, ທ່ານ ດຣ. ຄໍາສອນ ພົງສະຫວັດດີ ຫົວໜ້າພະແນກ ສາທາລະນະສຸກແຂວງ ພ້ອມດ້ວຍພະແນກການຂັ້ນແຂວງ, ພະນັກງານ-ລັດຖະກອນ ແລະ ອົງການປົກຄອງບ້ານ ພາຍໃນເມືອງຈອມເພັດ ເຂົ້າຮ່ວມ. ທ່ານ ບຸນເພັງ ພົມມະວົງ ຫົວໜ້າຫ້ອງການ ສາທາລະນະສຸກເມືອງ ໄດ້ລາຍງານວ່າ: ເມືອງຈອມເພັດ ປະກອບມີ 69 ບ້ານ, ມີພົນລະເມືອງທັງໝົດ 35.523 ຄົນ ຍິງ 17.148 ຄົນ. ປະກອບມີ 3 ເຜົ່າໃຫຍ່ອາໄສຢູ່ຮ່ວມກັນ. ຜ່ານການນໍາພາ-ຊີ້ນຳຂອງຄະນະພັກ-ອົງການປົກຄອງເມືອງຈອມເພັດ ໃນແຕ່ລະໄລຍະ ໂດຍປະຕິບັດຕາມບົດແນະນໍາ ການຈັດຕັ້ງປະຕິບັດ ວຽກງານຊຸມຊົນເປັນເຈົ້າດ້ານສຸຂາອະນາໄມ (ຢຸດຕິການຖ່າຍຊະຊາຍ) ສະບັບເລກທີ 477/ພສຂ.ຊຍ, ລົງວັນທີ 28 ກຸມພາ 2020 ວ່າດ້ວຍການສ້າງບ້ານ ແລະ ເມືອງຢຸດຕິການຖ່າຍຊະຊາຍ ໃຫ້ບັນລຸຄາດໝາຍ ໃນປີ 2025 ໄດ້ກໍານົດໃຫ້ໄດ້ປະກາດຮັບຮອງເມືອງຈອມເພັດ ເປັນເມືອງຢຸດຕິການຖ່າຍຊະຊາຍໃນປີ 2024. ປັດຈຸບັນ, ທົ່ວເມືອງມີໂຮງໝໍ ຊຸມຊົນ 1 ແຫ່ງ, ໂຮງໝໍນ້ອຍ 9 ແຫ່ງ, ມີບ້ານແບບຢ່າງສາທາລະນະສຸກ 69 ບ້ານ ເທົ່າກັບ 100%, ອັດຕາການຊົມໃຊ້ນໍ້າສະອາດ 100%, ອັດຕາການຊົມໃຊ້ວິດຖ່າຍ ເທົ່າກັບ 100%. ຄຽງຄູ່ກັນນັ້ນ ວຽກງານສາທາລະນະສຸກ ເມືອງຈອມເພັດ ຍັງໄດ້ສຸມໃສ່ໃນການຈັດຕັ້ງປະຕິບັດ 11 ຕົວຊີ້ບອກ ຕິດພັນກັບວຽກງານສຸຂາພິບານ ແລະ ສ້າງບ້ານຢຸດຕິການຖ່າຍຊະຊາຍ, ສ້າງບ້ານ ສາທາລະນະສຸກແບບຢ່າງ 10 ມາດຖານ 30 ຕົວຊີ້ວັດ ແລະ ສະໜອງນໍ້າສະອາດໃຊ້ ໃຫ້ພຽງພໍກັບຄວາມຕ້ອງການ ຊຶ່ງສາມາດບັນລຸຕົວຊີ້ບອກສໍາເລັດ 100%. ໃນພິທີດັ່ງກ່າວ, ຍັງໄດ້ມອບໃບຍ້ອງຍໍ ໃຫ້ 69 ບ້ານ ພາຍໃນເມືອງຈອມເພັດ ທີ່ມີຜົນງານດີເດັ່ນ ໃນການຈັດຕັ້ງປະຕິບັດ ຊຸມຊົນເປັນເຈົ້າການ ວຽກງານຢຸດຕິການຖ່າຍຊະຊາຍ ຕາງໜ້າມອບໂດຍທ່ານ ບຸນເລື່ອມ ມະນີວົງ.
ຂ່າວ: ຕາດຳ ກະເສີມສຸກ
KPL