ຂປລ. ໃນໂອກາດການຢ້ຽມຢາມທາງລັດຖະກິດທີ່ ສປປ ລາວ, ວັນທີ 12 ກໍລະກົດ 2024 ນີ້, ສະຫາຍ ໂຕ ເລິມ  ປະທານປະເທດແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ໄປຢ້ຽມຢາມ ໂຮງຮຽນສອງພາສາ ລາວ-ຫວຽດນາມ ຫວງຽນຢູ ໂດຍການຕ້ອນຮັບຂອງ ທ່ານ ນາງ ສີວັນເຮືອງ ເພັງຄໍາໄມ ຜູ້ອໍານວຍການ ໂຮງຮຽນສອງພາສາ ລາວ-ຫວຽດນາມ ຫວງຽນຢູ.

ໂອກາດນີ້, ທ່ານ ນາງ ວັນເຮືອງ ເພັງຄໍາໄມ ໄດ້ໃຫ້ຮູ້ວ່າ:  ໂຮງຮຽນ ສອງພາສາລາວ-ຫວຽດນາມ ຫງວຽນ ຢູ ກ່ອນໜ້ານີ້ແມ່ນໂຮງຮຽນປະຖົມຫງວຽນຢູ 1 ແລະ ຫງວຽນຢູ 2, ໃນປີ 2005 ໄດ້ຮັບຄວາມເອົາໃຈໃສ່ຈາກພັກ ແລະ ລັດຖະບານ ຫວຽດນາມ ໄດ້ມອບທຶນຈໍານວນ 500.000 ກວ່າໂດລາສະຫະລັດ ເພື່ອກໍ່ສ້າງໂຮງຮຽນໃນເນື້ອທີ່ 10.379 ຕາແມັດ ທີ່ລັດຖະບານລາວມອບໃຫ້, ປີ 2008 ໄດ້ສໍາເລັດການກໍ່ສ້າງ ແລະ ໄດ້ເປີດນໍາໃຊ້ມາຈົນເຖິງປັດຈຸບັນ. ໂຮງຮຽນສອງພາສາລາວ-ຫວຽດນາມ ຫງວຽນຢູ ແມ່ນໂຮງຮຽນຂອງສະມາຄົມຊາວຫວຽດນາມ, ດໍາເນີນງານພາຍໃຕ້ ການຄຸ້ມຄອງຂອງ ຄະນະບໍລິຫານງານສະມາຄົມ ຊາວຫວຽດນາມ ນະຄອນຫລວງວຽງຈັນ, ພາຍໃຕ້ການຊີ້ນຳໂດຍກົງ ຂອງສະຖານທູດຫວຽດນາມ ປະຈຳລາວ, ປະຕິບັດຕາມທິດທາງວິຊາການຂອງກະຊວງ, ພະແນກ ແລະ ຫ້ອງການສຶກສາທິການ ແລະ ກິລາລາວ, ເປັນໂຮງຮຽນ ທີ່ບັນດາຜູ້ປົກຄອງທັງສອງຊາດ ລາວ-ຫວຽດນາມ ໄດ້ໃຫ້ຄວາມເຊື່ອຖື ແລະ ໄວ້ວາງໃຈ ຝາກລູກຫລານເຂົ້າສຶກສາຮໍ່າຮຽນ ທີ່ໂຮງຮຽນແຫ່ງນີ້ ເພາະບໍ່ພຽງແຕ່ມີພື້ນຖານ ໂຄງລ່າງທີ່ກວ້າງຂວາງ, ສິ່ງອໍານວຍຄວາມສະດວກ ກໍຄື ຄຸນະພາບທາງດ້ານການສຶກສາ ແລະ ການເຄື່ອນໄຫວ ກິດຈະກໍານອກຫລັກສູດອື່ນໆ. ໂຮງຮຽນແຫ່ງນີ້, ຍາມໃດກໍໄດ້ຮັບການສະໜັບສະໜູນ ຊ່ວຍເລຫືອທາງດ້ານວັດຖຸ, ຈິດ ໃຈຈາກພັກ ແລະ ລັດຫວຽດນາມ, ຊາວຫວຽດນາມ ຢູ່ຕ່າງປະເທດ ກໍຄື ບັນດານັກທຸລະກິດຕ່າງໆ, ພາຍໃຕ້ຄວາມເອົາໃຈໃສ່ຊີ້ນຳ ຢ່າງໃກ້ຊິດ ຂອງສະຖານທູດ ຫວຽດນາມ ປະຈຳລາວ ແລະ ຄະນະບໍລິຫານງານໂຮງຮຽນ, ການສະໜັບສະໜູນ ດ້ານວັດຖຸຂອງລັດຖະບານ ແລະ ບັນດາອົງການພາຍໃນປະເທດ ຫວຽດນາມ, ພ້ອມກັບ ຄວາມມານະພະຍາຍາມ ຢ່າງບໍ່ຢຸດຢັ້ງຂອງຄູອາຈານ ໃນຫລາຍປີຜ່ານມາ, ໂຮງຮຽນໄດ້ບັນລຸ ຜົນສໍາເລັດທີ່ໜ້າພູມໃຈ. ໃນສົກຮຽນ 2021-2022 ໂຮງຮຽນໄດ້ຮັບການຄັດເລືອກ ຈາກກະຊວງສຶກສາທິການຂອງສອງປະເທດ ເປັນໂຮງຮຽນທົດລອງສອນ ພາສາຫວຽດນາມ-ລາວ ແຕ່ຊັ້ນ ປ 1 ຫາ ມ7 ເພື່ອເສີມຂະຫຍາຍຮູບແບບ ການສຶກສານີ້ໃນທົ່ວປະເທດລາວ ໃຫ້ຄົນຮຸ່ນໜຸ່ມລາວ ມີຄວາມເຂົ້າໃຈຢ່າງ ເລິກເຊິ່ງ ກ່ຽວກັບມິດຕະພາບທີ່ເປັນມູນເຊື້ອອັນພິເສດ ລະຫວ່າງປະຊາ ຊົນສອງປະເທດ.

ທ່ານ ນາງ ວັນເຮືອງ ເພັງຄໍາໄມ ຍັງກ່າວອີກວ່າ: ການພົບປະຂອງທ່ານປະທານປະເທດ ກັບໂຮງຮຽນໃນມື້ນີ້ ໄດ້ຢືນຢັນເຖິງຄວາມເອົາໃຈໃສ່ຂອງພັກ ແລະ ລັດ ທີ່ມີຕໍ່ປະຊາຊົນຊາວ ຫວຽດນາມຢູ່ຕ່າງປະເທດ ແລະ ລູກຫລານປະຊາຊົນຂອງສອງຊາດ ລາວ-ຫວຽດນາມ. ຕາງໜ້າຄະນະ ອໍານວຍການໂຮງຮຽນ, ຂໍໃຫ້ຄໍາໝັ້ນສັນຍາວ່າ ຂ້າພະເຈົ້າພ້ອມດ້ວຍພະນັກງານ, ຄູ-ອາຈານ ຈະສືບຕໍ່ເສີມຂະຫຍາຍ ບັນດາຜົນງານທີ່ບັນລຸໄດ້, ຜ່ານຜ່າທຸກຄວາມຫຍຸ້ງຍາກ, ມີຄວາມຕັ້ງໃຈນໍາພາໂຮງຮຽນບັນລຸເປົ້າໝາຍ ເປັນໂຮງຮຽນທີ່ມີ ຄຸນນະພາບການສຶກສາ, ເປັນໂຮງຮຽນທີ່ສະແດງ ໃຫ້ເຫັນນ້ຳໃຈ ມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ, ປະຕິບັດໜ້າທີ່ຂອງຕົນເປັນຜູ້ທູດ ວັດທະນະທຳ ແລະ ເສີມຂະຫຍາຍພາສາຫວຽດນາມ ຢູ່ປະເທດລ້ານຊ້າງທີ່ສວຍງາມແຫ່ງນີ້.

ຂ່າວ: ສົມຫວັງ

ພາບ: ເກດສະໜາ

KPL