ເມືອງຄຳເກີດ ປັກດຳເຂົ້ານາປີ ສຳເລັດ 60%

10/07/2024 17:14
Email Print 525
ຂປລ ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ເມືອງຄຳເກີດ ແຂວງບໍລິຄຳໄຊ ມີເນື້ອທີ່ປູກເຂົ້ານາປີທັງໝົດ 6.893 ເຮັກຕາ, ມາຮອດປັດຈຸບັນ ກະສິກອນ ສາມາດປັກດຳເຂົ້ານາປີ ສຳເລັດແລ້ວ 4.135,8 ເຮັກຕາ

  

   ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ເມືອງຄຳເກີດ ແຂວງບໍລິຄຳໄຊ ມີເນື້ອທີ່ປູກເຂົ້ານາປີທັງໝົດ 6.893 ເຮັກຕາ, ມາຮອດປັດຈຸບັນ ກະສິກອນ ສາມາດປັກດຳເຂົ້ານາປີ ສຳເລັດແລ້ວ 4.135,8 ເຮັກຕາ, ເທົ່າກັບ 60% ຂອງເນື້ອທີ່ທັງໝົດ ແລະ ຄາດວ່າຈະໃຫ້ສຳເລັດໃນທ້າຍເດືອນກໍລະກົດນີ້.
   ທ່ານ ວັນນະເສີມ ແກ້ວປັນຍາ ຮອງຫົວໜ້າຫ້ອງການ ກະສິກຳ ແລະ ປ່າໄມ້ ເມືອງຄຳເກີດ ໃຫ້ສຳພາດ ເມື່ອບໍ່ດົນມານີ້ວ່າ: ຫ້ອງການກະສິກຳ ແລະ ປ່າໄມ້ເມືອງ ໄດ້ໃຫ້ຄວາມສຳຄັນຕໍ່ກັບວຽກງານດັ່ງກ່າວນີ້ ເພື່ອເປັນການຊຸກຍູ້ສົ່ງເສີມການປູກເຂົ້ານາປີ ກໍຄືການປູກພືດລະດູຝົນ
ໃຫ້ເປັນຂະບວນການຟົດຟື້ນ ທັງນີ້, ກໍແມ່ນເພື່ອເຮັດໃຫ້ພາຍໃນເມືອງມີເຂົ້າກຸ້ມກິນ ພ້ອມທັງເປັນສິນຄ້າສົ່ງອອກ. ສຳລັບແຜນສູ້ຊົນ ສະມັດຕະພາບການປູກເຂົ້ານາປີທີ່ວາງໄວ້ໃນແຜນ 5 ປີ ຂອງກອງປະຊຸມໃຫຍ່ໜ່ວຍພັກຫ້ອງການ ແມ່ນໃຫ້ໄດ້ 4,5 ໂຕນ/ເຮັກຕາ ທຽບໃສ່ປີຜ່ານມາໄດ້ 4,1 ໂຕນ/ເຮັກຕາ. ສ່ວນວຽກງານໃນການຊຸກຍູ້ ໄດ້ເອົາໃຈໃສ່ນໍາພາ-ຊີ້ນໍາ ພະນັກງານວິຊາສະເພາະ ລົງເຄື່ອນໄຫວຕິດຕາມ ຢ່າງຕໍ່ເນື່ອງນັບມື້ຕົກກ້າ, ປັກດໍາ ແລະ ການບົວຮັກສາ, ການໃສ່ຝຸ່ນ-ປຸ໋ຍ ລວມເຖິງວຽກງານປ້ອງພະຍາດຂອງພືດ. ນອກນີ້, ວຽກງານການສະໜອງນໍ້າ ກໍເປັນວຽກງານໜຶ່ງ ທີ່ນອນໃນແຜນຕ້ານແລ້ງຕ້ານຖ້ວມ, ເຊິ່ງຄະນະຫ້ອງການ ແລະ ວິຊາການທີ່ກ່ຽວຂ້ອງ ໄດ້ປຸກລະດົມຂົນຂວາຍ ກະສິກອນ ອະນາໄມອ່າງຮັບນໍ້າ, ຄອງລະບາຍນໍ້າ ເພື່ອສະໜອງນໍ້າເຂົ້ານາ. ທົ່ວເມືອງມີຊົນລະປະທານທັງໝົດ 314 ແຫ່ງ ສາມາດສະໜອງນໍ້າໃນລະດູຝົນໄດ້ 3.543 ເຮັກຕາ.
  ທ່ານ ວັນນະເສີມ ແກ້ວປັນຍາ ກ່າວຕື່ມວ່າ: ສຳລັບການປູກພືດລະດູຝົນ ແຜນການທີ່ວາງໄວ້
4.699 ເຮັກຕາ ຮອດປັດຈຸບັນ ປະຕິບັດໄດ້ 3.524,2 ເຮັກຕາ ເທົ່າກັບ 75% ໃນນີ້, ພືດທີ່ເດັ່ນກວ່າໝູ່ ແມ່ນມັນຕົ້ນ ກວມເອົາ 90% ຮອງລົງມາແມ່ນສາລີ, ໝາກນັດ, ໝາກເຜັດ, ຖົ່ວດິນ ແລະ ພືດຜັກອື່ນໆ. ນອກຈາກນີ້, ຍັງໄດ້ເອົາໃຈໃສ່ຊຸກຍູ້ສົ່ງເສີມປະຊາຊົນ ປູກຜັກເຮືອນຮົມ ຢູ່ບ້ານນາຫາດ ໃຫ້ມີການຜະລິດຢ່າງຕໍ່ເນື່ອງ ທັງໃນລະດູແລ້ງ ແລະ ລະດູຝົນ. ປັດຈຸບັນໄດ້ ຂະຫຍາຍເຮືອນຮົມປູກຜັກ ຢູ່ບ້ານວັງຜາ ກຳນົດກຸ່ມປູກຜັກ ໄດ້ 10 ຄອບຄົວ ພ້ອມທັງຈັດສົ່ງວິຊາການນໍາພາ ສ້າງເຮືອນຮົມ ສໍາເລັດແລ້ວ 07 ຫລັງ ແລະ ບ້ານປຸ່ງປ່າຕ່າວ 36 ຫລັງ 18 ຄອບຄົວ. ສ່ວນການປູກຢາງພາລາ ໃນທົ່ວເມືອງເຫັນວ່າເປັນຂະບວນຟົດຟື້ນ ແລະ ມີເນື້ອທີ່ປູກເພີ່ມຂຶ້ນ, ໃນປີ 2023 ເນື້ອທີ່ປູກຢ່າງພາລາມີ 223 ເຮັກຕາ ແລະ ຄາດວ່າໃນປີ 2024 ຈະມີເນື້ອທີ່ປູກຢາງພາລາເພີ່ມຂຶ້ນ ປະມານ 280-300 ເຮັກຕາ ໂດຍໄດ້ເປັນທ່າແຮງໜຶ່ງ ໃນການສ້າງລາຍຮັບໃຫ້ກະສິກອນ ໃນຕໍ່ໜ້າ. ສຳລັບແຜນຊຸກຍູ້ ແມ່ນສຸມໃສ່ ບ້ານທີ່ເປັນເຂດພູດອຍ ເຊັ່ນ: ບ້ານແກ້ວແສນຄໍາ ແລະ ບ້ານທ່າສາລາ.

ຂ່າວ: ສີວັນ
KPL

ຂ່າວອື່ນໆ

ads
ads

Top