*ສປປ ລາວ ແມ່ນໜຶ່ງໃນບັນດາ10 ປະເທດສະມາຊິກອາຊຽນ ຍັງເພີ່ງພາອາໃສພາກອຸດສາຫະກໍາທ່ອງທ່ຽວ ເປັນບຸລິມະສິດສໍາຄັນອັນດັບຕົ້ນໆຂອງປະເທດ ເພື່ອຂັບເຄື່ອນການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ຫລຸດຜ່ອນຄວາມທຸກຍາກ ຕາມແຜນລວມຂອງພາກລັດຕັ້ງເປົ້າໝາຍໄວ້ວ່າໝົດປີ 2024 ຈະສູ້ຊົນດຶງດູດນັກທ່ອງທ່ຽວໃຫ້ໄດ້ຢ່າງໜ້ອຍ 3 ລ້ານກວ່າຄົນຂຶ້ນໄປ, ສ້າງລາຍຮັບໃຫ້ ໄດ້ 500 ລ້ານໂດລາສະຫະລັດ. ອີງຕາມບົດລາຍງານສະພາບລວມ ໂດຍຫຍໍ້ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີລະຫວ່າງກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໄຂຂຶ້ນໃນວັນທີ 10 ມິຖຸນາ 2024 ນີ້ວ່າ ຜ່ານການຈັດຕ້ັງປະຕິບັດແຜນພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກ ແລະ ວຽກສໍາຄັນອື່ນໆປິ່ນອອ້ມມີທັງພົ້ນເດັ່ນ, ຄືບໜ້າໄປໃນທິດທາງບວກ ແນ່ນອນບາງວຽກຍັງສືບຕໍ່ປະຕິບັດ ແລະ ມີຄວາມຫຍຸ້ງຍາກບໍ່ໜ້ອຍ ແຕ່ຂະແໜງການທ່ອງທ່ຽວເປັນໜຶ່ງໃນຂະແໜງການທີ່ພົ້ນເດັ່ນ ຖ້າປຽບທຽບກັບຂະແໜງການອື່ນໆ ດັ່ງຕົວຢ່າງວຽກງານໂຄສະນາ ແລະ ສົ່ງເສີມການທ່ອງທ່ຽວນ້ັນເຫັນວ່າໄດ້ດໍາເນີນໄປຢ່າງເປັນຂະບວນຟົດຟື້ນ ແລະ ສາມາດດຶງນັກທ່ອງທ່ຽວໄດ້ເຖິງ 1,3 ລ້ານກວ່າຄົນ ພາຍໃນ 3 ເດືອນຕົ້ນປີ, ຄາດວ່າໝົດປີ ຈະບັນລຸບໍ່ຕໍ່າກວ່າ 3,5 ລ້ານຄົນ ແລະ ສ້າງລາຍຮັບເຂົ້າປະເທດເຖິງ 500 ລ້ານກວ່າໂດລາເທ່ົາກັບ 68,10% ຂອງແຜນ.

    ກອງປະຊຸມເວທີສາກົນເພື່ອໂຄສະນາການທ່ອງທ່ຽວລາວ ໄດ້ຈັດຂຶ້ນໃນລະຫວ່າງ 27-30 ພຶດສະພາ 2024 ຢູ່ ແຂວງອຸດົມໄຊ ໂດຍຜູ້ເຂົ້າຮ່ວມໄດ້ຍົກໃຫ້ເຫັນວ່າປັດຈຸບັນນີ້ບັນຍາກາດການທ່ອງທ່ຽວຄຶກຄັກເປັນພິເສດ ພາຍຫລັງພະຍາດໂຄວິດ-19 ໄດ້ຈາງຫາຍ ແລະ ໝົດໄປ ແລະ ໄດ້ປະກາດເປີດປະເທດໃນຕົ້ນປີ 2022, ໂດຍສ່ວນໃຫຍ່ນັກທ່ອງທ່ຽວໄດ້ເດີນທາງມາຈາກທາງບົກຫລາຍກວ່າການເດີນທາງມາຈາກອາກາດ (ຂີ່ເຮືອບິນ) ຜ່ານຈຸດຕ່າງໆຕາມຊາຍແດນລະຫວ່າງປະເທດ. ໃນນັ້ນ, ສິ່ງທີ່ພົ້ນເດັ່ນທີ່ສຸດນັກທ່ອງທ່ຽວຈະມາໃຊ້ບໍລິການຂີ່ລົດຫລາຍທີ່ສຸດເພື່ອຂຶ້ນໄປທ່ອງທ່ຽວທາງພາກເໜືອ ແລະ ມາຈາກພາກເໜືອລົງສູ່ພາກກາງ-ພາກໃຕ້ຂອງລາວ.

   ໃນນ້ັນ, ແຂວງທ່ີນັກທ່ອງທ່ຽວນິຍົມໄປຫລາຍທີ່ສຸດອັນດັບທີ 1 ແມ່ນເມືອງມໍລະດົກຫລວງພະບາງ, ອັນດັບທີ 2 ແມ່ນນະຄອນຫລວງວຽງຈັນ, ອັນດັບທີ 3 ເມືອງວັງວຽງ-ເມືອງເຟືອງ ແຂວງວຽງຈັນ, ອັນດັບທີ 4 ແມ່ນແຂວງຈໍາປາສັກ ແລະ ອື່ນໆ. ຜູ້ເຂົ້າຮ່ວມກອງປະຊຸມຄັ້ງນີ້ຍັງຍິບ ຍົກບາງປະເດັນໃຫ້ເຫັນພາບລວມວ່າ: ສິ່ງທີ່ນັກທ່ອງທ່ຽວຢາກເຂົ້າມາລາວ ເປັນຜົນມາຈາກຄ່າຄອງຊີບຖືກກວ່າປະເທດອື່ນໆ ຖ້າປຽບທຽບກັບຄ່າເງິນລະຫວ່າງປະເທດໂດຍສະເພາະຄ່າອາຫານ, ຄ່າເຮືອນພັກ-ໂຮງແຮມ, ຄ່າໂດຍສານຍັງຕ່ໍາ ເຖິງແມ່ນຄົນພາຍໃນປະເທດເຮົາຈະຮູ້ສຶກວ່າຄອງຄ່າຊີບແພງກໍຕາມ. ນອກຈາກນັ້ນສິ່ງນັກທ່ອງທ່ຽວ ໃຫ້ຄວາມສົນໃຈກໍຄືປະເທດລາວຍັງມີແຫລ່ງທ່ອງທ່ຽວທໍາມະຊາດຍັງບໍ່ຖືກທໍາລາຍຫລາຍ, ວິຖີຊີວິດຂອງຄົນລາວຍັງມີຮ່ອງຮອຍຄວາມເປັນວິຖີຊາວບ້ານດັ້ງເດີມ, ມີພ້ືນຖານໂຄງລ່າງເສັ້ນທາງລົດໄຟເຊື່ອມໂຍງເຊື່ອມຈອດກັນລະຫວ່າງອາຊຽນ-ຈີນ ໂດຍລາຄາສົມເຫດສົມຜົນ, ເປັນປະເທດທີ່ມີຄວາມສະຫງົບ ແລະ ທັດສະນະຄະຕິຂອງຄົນລາວຍັງເປັນມິດຮັບຕ້ອນແຂກ ຄົນດ້ວຍຮອຍຍິ້ມເບີກບາກມ່ວນຊື່ນເປັນມິດຕໍ່ທຸກຄົນ.

   ຫລ້າສຸດ ອີງຕາມແຫລ່ງຂ່າວຈາກກອງທຶນການເງິນສາກົນ (IMF) ໄດ້ສະຫລຸບພາບລວມຜົນການປະເມີນເສດຖະກິດມະຫາພາກຂອງ ສປປ ລາວ ປະຈໍາປີ 2024 ໂດຍຄາດຄະເນວ່າເສດຖະກິດ ສປປ ລາວ ຈະເຕີບໂຕຢ່າງແຂງແຮງຈາກການທ່ອງທ່ຽວ, ແຕ່ຍັງມີສິ່ງທ້າທາຍຮອບດ້ານ ໂດຍສະເພາະບັນຫາໜີ້ສາທາລະນະໃນນັ້ນເສດຖະກິດມະຫາພາກ ຂອງ ສປປ ລາວ ໂດຍ IMF ໄດ້ເຜີຍແຜ່ໃນວັນທີ 22 ພຶດສະພາ 2024 ຜ່ານມານີ້ໄດ້ລະບຸໃຫ້ເຫັນພາບລວມດັ່ງນີ້: ເຖິງວ່າ ສປປ ລາວ ຈະມີການລຶບລ້າງການຂາດດຸນງົບປະມານເບື້ອງຕົ້ນ, ໜີ້ສິນສາທາລະນະໄດ້ເພີ່ມຂຶ້ນຕື່ມອີກ. ໂດຍ ສປປ ລາວ ມີໜີ້ສາທາລະນະ ແລະ ໜີ້ທີ່ຄໍ້າປະກັນ ໂດຍລັດ ຫລື Public And Publicly Guaranteed debt (PPG) ເພີ່ມຂຶ້ນ 16.4% ຂອງ GDP ແຕ່ປີ 2020 ຫາ 2021 ແລະ ເພີ່ມຂຶ້ນອີກ 36.2 % ຂອງ GDP ແຕ່ປີ 2021 ຫາ 2022 ໂດຍສ່ວນໃຫຍ່ແມ່ນຍ້ອນການອ່ອນ ຄ່າຂອງເງິນກີບ.

   ພ້ອມດຽວກັນນີ້, ທະນາຄານໂລກ (World bank) ຍັງໄດ້ເຜີຍແຜ່ບົດລາຍງານເສດຖະກິດ ສປປ ລາວ ເຊັ່ນກັນວ່າຄາດຄະເນເສດຖະກິດລາວ ຈະເຕີບໂຕໃນລະດັບ 4,1% ໃນປີ 2024,  ແຕ່ສິ່ງທ້າທາຍຍັງຄົງຢູ່ຮອບດ້ານຍ້ອນໄພເງິນເຟີ້ທີ່ຖີບໂຕຂຶ້ນສູງ, ໜີ້ສິນພາຍນອກ ແລະ ການຂາດເຂີນແຮງງານ.ທະນາຄານໂລກຍັງລະບຸວ່າ: ທ່າແຮງທີ່ເຮັດໃຫ້ເສດຖະກິດຟື້ນຟູກັບມາສ່ວນໃຫຍ່ ແມ່ນຍ້ອນການເຄື່ອນໄຫວທາງດ້ານການທ່ອງທ່ຽວ, ການບໍລິການດ້ານຂົນສົ່ງ ແລະ ການລົງທຶນຈາກຕ່າງປະເທດຫລາຍຂຶ້ນ, ແຕ່ອັດຕາການເຕີບໂຕຍັງຕ່ຳກວ່າທີ່ຄາດໄວ້ໃນເມື່ອກ່ອນ; ສິ່ງຕ້ອງລະວັງ ແລະ ຕັ້ງໃຈສັງເກດເບິ່ງຄື: ຄ່າເງິນກີບໄດ້ສືບຕໍຕົກຕໍ່າລົງໃນໄລຍະປີ 2023, ຫລຸດລົງ 29% ທຽບກັບເງິນບາດຂອງໄທ ແລະ 21% ທຽບກັບເງິນໂດລາສະຫະລັດ ຈົນເຖິງເດືອນຕຸລາ ເຊິ່ງສາເຫດແມ່ນຍ້ອນຄວາມບໍ່ສອດຄ່ອງກັນ ລະຫວ່າງ ຄວາມຕ້ອງການເງິນຕາຕ່າງປະເທດ ແລະ ຄວາມສາມາດໃນການສະໜອງ ໄດ້ສົ່ງຜົນກະທົບຕໍ່ເສດຖະກິດຂອງລາວໂດຍກົງ, ປັດຈຸບັນນີ້ ອັດຕາເງິນເຟີ້ຂອງ ສປປ ລາວ ເດືອນພຶດສະພາ 2024, ຍັງສືບຕໍ່ເໜັງຕີງເພີ່ມສູງຂຶ້ນຢູ່ໃນລະດັບ 25.8% (ເດືອນເມສາ 2024 ຢູ່ໃນລະດັບ 24.9%) ຈາກການສືບຕໍ່ອ່ອນຄ່າຂອງເງິນກີບ ແລະ ການເພີ່ມຂຶ້ນຂອງລາຄາສິນຄ້າກະສິກຳ.

ໂດຍ: ເກີດຂວັນໃຈ ມາລີຈັນສີ

KPL