ຂປລ. ໃນວັນທີ 7 ມິຖຸນາ 2024 ຜ່ານມານີ້, ທ່ານ ວອນເກີ ເຕີກ (Volker Türk) ຂ້າຫລວງໃຫຍ່ອົງການສະຫະປະຊາຊາດ (ສປຊ) ເພື່ອສິດທິມະນຸດ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ເຊິ່ງເປັນການຢ້ຽມຢາມ ຄັ້ງທໍາອິດ ຂອງເຈົ້າໜ້າທີ່ຂັ້ນສູງ ດ້ານສິດທິມະນຸດຂອງອົງການ ສປຊ ເຊິ່ງການຢ້ຽມຢາມລາວ ຂອງຂ້າຫລວງໃຫຍ່ ສປຊ ເພື່ອສິດທິມະນຸດນີ້ ແມ່ນມີຂຶ້ນໃນຂະນະທີ່ ສປປ ລາວ ເປັນປະທານອາຊຽນ 2024 ແລະ ເປັນປະທານຄະນະກໍາມາທິການ ລະຫ່ວາງລັດຖະບານອາຊຽນ ວ່າດ້ວຍ ສິດທິມະນຸດ ໃນລະຫວ່າງການຢ້ຽມຢາມລາວ, ຂ້າຫລວງໃຫຍ່ ສປຊ ເພື່ອສິດທິມະນຸດ ໄດ້ເຂົ້າຢ້ຽມຂໍ່ານັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ, ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.

ໃນໂອກາດພົບປະໂອ້ລົມກັບ ການນໍາຂັ້ນສູງຂອງ ສປປ ລາວ, ຂ້າຫລວງໃຫຍ່ ສປຊ ເພື່ອສິດທິມະນຸດ ໄດ້ຕີລາຄາສູງຕໍ່ການຮ່ວມມືທີ່ດີ ລະຫວ່າງ ລັດຖະບານລາວ ແລະ ຫ້ອງການຂ້າຫລວງໃຫຍ່ ສປຊ ເພື່ອສິດທິມະນຸດ ໃນໄລຍະຜ່ານມາ ແລະ ສະແດງຄວາມຊົມເຊີຍຕໍ່ ຄວາມພະຍາຍາມ ແລະ ຜົນສໍາເລັດເປັນກ້າວໆມາ ຂອງວຽກງານການສົ່ງເສີມ ແລະ ປົກປ້ອງສິດທິມະນຸດຢູ່ ສປປ ລາວ ໂດຍສະເພາະ ການຈັດຕັ້ງປະຕິບັດພັນທະ, ຄໍາໝັ້ນສັນຍາສາກົນ ພາຍໃຕ້ສົນທິສັນຍາດ້ານສິດທິມະນຸດ ທີ່ ສປປ ລາວ ເປັນພາຄີ ກໍຄື ພາຍໃຕ້ກົນໄກທົບທວນປະຈໍາໄລຍະ (UPR) ລວມທັງການສ້າງ ແລະ ປ້ອງກັນ ບົດລາຍງານແຫ່ງຊາດຂອງ ສປປ ລາວ. ພ້ອມທັງ ຊົມເຊີຍຕໍ່ບົດບາດຂອງ ສປປ ລາວ ໃນການເປັນປະທານອາຊຽນ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ນອກນັ້ນ, ກໍໄດ້ແລກປ່ຽນຄໍາຄິດເຫັນ ກ່ຽວກັບການສົ່ງເສີມບົດບາດ ຍິງ-ຊາຍ, ການປະຕິ ບັດກົດໝາຍທີ່ກ່ຽວຂ້ອງກັບສິດທິມະນຸດ ແລະ ສິດທິທາງດ້ານເສດຖະກິດ, ສັງຄົມ ແລະ ວັດທະນະທໍາ.

ພ້ອມກັນນັ້ນ, ການນໍາຂັ້ນສູງຂອງ ສປປ ລາວ ໄດ້ຍົກໃຫ້ເຫັນຜົນສໍາເລັດເປັນກ້າວໆມາ ໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ການສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ, ການຈັດຕັ້ງປະຕິບັດເປົ້າໝາຍ ການພັດທະນາແບບຍືນຍົງລວມທັງເປົ້າ ໝາຍສະເພາະ ສໍາລັບ ສປປ ລາວ ກ່ຽວກັບ ການແກ້ໄຂຜົນກະທົບ ຂອງລະເບີດບໍ່ທັນແຕກ ເຊິ່ງເປັນສິ່ງກີດຂວາງອັນສໍາຄັນ ຕໍ່ການພັດທະນາ ເສດຖະກິດ-ສັງຄົມ, ຕໍ່ການລຶບລ້າງຄວາມທຸກຍາກ ກໍຄື ຕໍ່ການຊົມໃຊ້ສິດ ທິມະນຸດ ຂອງປະຊາຊົນລາວບັນດາເຜົ່າ. ສປປ ລາວ ຍາມໃດກໍມີຄວາມພະຍາມຍາມໃນການ ຈັດຕັ້ງຜັນຂະຫຍາຍພັນທະສາກົນ ພາຍໃຕ້ສົນທິສັນຍາສາກົນ ດ້ານສິດທິມະນຸດທີ່ ສປປ ລາວ ເຂົ້າເປັນພາຄີ ເຂົ້າໃນລະບົບກົດໝາຍຂອງ ສປປ ລາວ ດ້ວຍການບັນຍັດ ສິດທິພື້ນຖານ ແລະ ພັນທະຂອງປະຊາຊົນລາວ ໄວ້ໃນລັດຖະທໍາມະນູນ, ກົດໝາຍ ແລະ ນິຕິກໍາຫລາຍໆສະບັບ, ພ້ອມທັງ ເອົາໃຈໃສ່ໃນການສ້າງ ຄວາມຮັບຮູ້ ແລະ ຄວາມເຂົ້າໃຈຢ່າງຖືກຕ້ອງກ່ຽວກັບ ສິດທິມະນຸດ ໃຫ້ພະນັກງານ ແລະ ເຈົ້າຫນ້າທີ່ຂັ້ນສູນກາງ, ຂັ້ນທ້ອງຖິ່ນ ກໍຄື ອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ ແລະ ປະຊາຊົນ. ໃນຖານະເປັນປະທານອາຊຽນປີ 2024 ທັງເປັນປະທານຄະນະກໍາມາທິການລະຫວ່າງລັດ ຖະບານອາຊຽນ ວ່າດ້ວຍ ສິດທິມະນຸດ ສປປ ລາວ ໄດ້ຕັ້ງໜ້າປະກອບສ່ວນ ເຂົ້າໃນສົ່ງເສີມການຮ່ວມມື ວຽກງານສິດທິມະນຸດ ໃນອາຊຽນບົນພື້ນຖານຈຸດພິເສດ ແລະ ຄວາມເປັນຈິງຂອງອາຊຽນ ແລະ ຂອງແຕ່ລະປະເທດສະມາຊິກອາຊຽນ. ໄດ້ແຕ່ງຕັ້ງຜູ້ຕາງໜ້າພິເສດ ຂອງປະທານອາຊຽນ ກ່ຽວກັບ ມຽນມາ ເພື່ອອໍານວຍຄວາມສະດວກ ແລະ ຊ່ວຍມຽນມາໃນການປະຕິບັດ 5 ຂໍ້ຕົກລົງຂອງຜູ້ນໍາອາຊຽນ ເພື່ອຊອກຫາວິທີທາງແກ້ໄຂແບບກວມລວມ, ສັນຕິວິທີ ແລະ ຍືນຍົງຕໍ່ສະຖານະການພາຍໃນມຽນມາ ບົນພື້ນຖານມຽນມາເປັນເຈົ້າການ ແລະ ນໍາພາ.

ໃນໂອກາດມາຢ້ຽມຢາມ ສປປ ລາວ ໃນຄັ້ງນີ້, ຂ້າຫລວງໃຫຍ່ ສປຊ ເພື່ອສິດທິມະນຸດ ຍັງໄດ້ພົບປະກັບ ທ່ານ ອາລຸນແກ້ວ ກິດຕິຄຸນ ຜູ້ຕາງໜ້າພິເສດປະທານອາຊຽນຂອງ ສປປ ລາວ ສໍາລັບມຽນມາ, ພົບປະສົນທະນາກັບ ທ່ານ ທູດຢົ້ງ ຈັນທະລັງສີ ຜູ້ຕາງໜ້າ ສປປ ລາວ ປະຈໍາ ຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍ ສິດທິມະນຸດ, ພົບປະກັບກົມສົນທິສັນຍາ ແລະ ກົດໝາຍ ກະ ຊວງການຕ່າງປະເທດ ເຊິ່ງເປັນທັງກອງເລຂາຄະນະກໍາມະການແຫ່ງຊາດ ວ່າດ້ວຍ ສິດທິມະນຸດ  ແລະ ເຂົ້າຮ່ວມກອງປະຊຸມສໍາມະນາ ຫົວຂໍ້ ສິດທິມະນຸດ ແລະ ສິ່ງແວດລ້ອມ ໂດຍເນັ້ນເຖິງສິດທິ ໃນການມີສິ່ງແວດລ້ອມທີ່ສະອາດ, ປອດໄພ ແລະ ຍືນຍົງ ທີ່ໄດ້ຈັດຂຶ້ນທີ່ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໂດຍມີຄູອາຈານ, ນັກສຶກສາ, ຜູ້ຕາງໜ້າຈາກອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ ເຂົ້າຮ່ວມ.

ຂ່າວ: ກຕທ

ພາບ: ຂັນໄຊ

KPL