*ແຂວງໄຊສົມບູນ ເປັນແຂວງໜຶ່ງທີ່ຕັ້ງຢູ່ທາງພາກກາງຕອນເໜືອ ຂອງ ສປປ ລາວ ສ້າງຕັ້ງຂຶ້ນໃນປີ 2013 ປະກອບມີ 5 ເມືອງຄື: ເມືອງ ອະນຸວົງ, ເມືອງລ້ອງຊານ, ເມືອງ ລ້ອງແຈ້ງ, ເມືອງຮົ່ມ ແລະ ເມືອງທ່າໂທມ. ຕະຫລອດໄລຍະ 10 ປີແຫ່ງ ການພັດທະນາເສດຖະກິດແຂວງ ໄຊສົມບູນ ໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.

    ທ່ານ ພອຍຄຳ ຮຸ່ງບຸນຍວງ ເລຂາພັກແຂວງ ເຈົ້າແຂວງໄຊສົມບູນ ໄດ້ໃຫ້ສຳພາດຕໍ່ສື່ມວນຊົນຈາກສູນກາງ ແລະ ທ້ອງຖິ່ນເມື່ອບໍ່ດົນມານີ້ວ່າ: ຕະຫລອດໄລຍະ 10 ປີ ຜ່ານມາ ແຂວງໄຊສົມບູນໄດ້ເອົາໃຈໃສ່ປົກປັກຮັກສາ ແລະ ສ້າງສາພັດທະ ນາ ເສດຖະກິດແຂວງໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ. ເບື້ອງຕົ້ນແຂວງໄຊສົມບູນ ຍັງພົບຄວາມຫຍຸ້ງຍາກຫລາຍດ້ານດ້ວຍເຫດຜົນດັ່ງກ່າວກົມການເມືອງສູນກາງພັກ ຈຶ່ງມີມະຕິເລກທີ 055 ວ່າດ້ວຍການຮັບຮອງເອົາຍຸດທະສາດການພັດທະນາເສດຖະກິດ ແຂວງໄຊສົມບູນ. ຫລັງຈາກນັ້ນ, ລັດຖະບານໄດ້ຄົ້ນຄວ້າອອກດຳລັດເລກທີ 414 ວ່າດ້ວຍການພັດທະນາເສດຖະກິດແຂວງໄຊສົມບູນ.

   ພ້ອມນັ້ນ, ສະພາແຫ່ງຊາດ ໄດ້ອອກມະຕິເລກທີ 016 ວ່າດ້ວຍການຮັບຮອງເອົາມະຕິ, ດຳລັດຂອງລັດຖະບານໃນການພັດທະນາເສດຖະກິດແຂວງໄຊສົມບູນ ຜ່ານການຈັດຕັ້ງປະຕິບັດແຕ່ປີ 2014 ເຖິງປັດຈຸບັນເຮັດໃຫ້ແຂວງ ໄຊສົມບູນ ປະຕິບັດໄດ້ວຽກງານອັນພົ້ນເດັ່ນຫລາຍດ້ານ ເປັນຕົ້ນສາມາດແກ້ໄຂຄວາມຫຍຸ້ງຍາກໄດ້ ໂດຍພື້ນຖານທີ່ມີມາແຕ່ດົນນານ; ໄດ້ເອົາໃຈໃສ່ຈັດຕັ້ງປະຕິບັດຕາມທິດນໍາຂອງພັກທີ່ວ່າ: ເອົາການພັດທະນາເສະຖະກິດ-ສັງຄົມຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສາ ມາດແກ້ໄຂປະກົດການຫຍ້ໍທໍ້ຕ່າງໆໄດ້ເທື່ອລະກ້າວ.

   ພ້ອມນັ້ນ, ລັດຖະບານໄດ້ຕັດສິນໃຈກໍ່ສ້າງເສັ້ນທາງ ເພື່ອອຳນວຍຄວາມສະດວກໃນການໄປ-ມາຫາສູ່ລະຫວ່າງແຂວງຕໍ່ແຂວງ, ເມືອງຕໍ່ເມືອງໜຶ່ງໃນນັ້ນ ໄດ້ກໍ່ສ້າງເສັ້ນທາງແຕ່ເທສະບານແຂວງໄຊສົມບູນ ໄປຫາບ້ານວຽງທອງ ເມືອງທ່າໂທມ. ຄຽງຄູ່ກັນ ນັ້ນ, ການດຳລົງຊີວິດຂອງປະຊາຊົນໃນເມື່ອກ່ອນແມ່ນອາໄສທຳມະຊາດເປັນຕົ້ນຕໍ ແຕ່ປັດຈຸບັນໄດ້ເລີ່ມມີໜໍ່ແໜງການຜະລິດເປັນສິນຄ້າເພື່ອແກ້ໄຂຊີວິດການເປັນຢູ່ຂອງປະຊາຊົນ ສິ່ງທີ່ຢັ້ງຢືນໃຫ້ເຫັນໂດຍສະເພາະປະຊາຊົນເມືອງລ້ອຊານ, ປະຊາຊົນເມືອງຮົ່ມໄດ້ສຸມໃສ່ປູກຢາງພາລາ, ການລ້ຽງສັດໃຫຍ່, ການປູກພືດເປັນສິນຄ້າເປັນຕົ້ນປູກໝາກນັດ, ກາເຟ, ໝາກກ້ຽງເປັນສິນຄ້າ, ປູກມັນເພື່ອສະໜອງໃຫ້ໂຮງງານປຸງແຕ່ງ, ປູກພືດຜັກຕ່າງໆ.

   ສຳລັບເມືອງທ່າໂທມໄດ້ສຸມໃສ່ການລ້ຽງສັດ, ປູກມັນຕົ້ນ, ສາລີ, ພືດຜັກ ແລະ ອື່ນໆເປັນສິນຄ້າສົ່ງຂາຍອອກທັງພາຍໃນ ແລະ ຕ່າງປະເທດ. ປັດຈຸບັນທົ່ວແຂວງມີເນື້ອທີ່ທຳການຜະລິດທັງໝົດ 10 ພັນກວ່າເຮັກຕາ ຊຶ່ງມີນັກລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນຢູ່ແຂວງເພີ່ມຂຶ້ນ. ພ້ອມນັ້ນ, ແຂວງໄຊສົມບູູນໄດ້ກຳນົດເອົາ 5 ທ່າແຮງການພັດທະນາເສດຖະກິດຂອງແຂວງຄື: ການພັດທະນາກະສິກຳ-ປ່າໄມ້, ໄຟຟ້າ-ພະລັງງານນໍ້າ, ພັດທະນາບໍ່ແຮ່, ການທ່ອງທ່ຽວ ແລະ ເປັນໃຈກາງຜ່ານ. ທ່ານ ພອຍຄຳ ຮຸ່ງບຸນຍວງ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດແຜນພັດທະນາເສດຖະກິດແຂວງ ເຮັດໃຫ້ການຄຸ້ມຄອງຫົວໜ່ວຍການຜະລິດ ແລະ ຈັດເກັບລາຍຮັບຂອງແຂວງມີບາດກ້າວດີຂຶ້ນ ໂດຍສະເພາະ 5 ເດືອນຕົ້ນປີ 2024 ລັດຖະບານມອບໃຫ້ແຂວງໄຊສົມບູນ ເກັບລາຍຮັບໃຫ້ໄດ້ 704 ຕື້ກີບ ແຕ່ສາມາດເກັບລາຍຮັບໄດ້ຕົວຈິງ 824 ຕື້ກີບ ເຮັດໃຫ້ເກີນແຜນ 14%.

ໂດຍ: ວັນເພັງ

KPL