*ລາຍນາກ ເປັນລາຍທີ່ມີຄວາມໂດດເດັ່ນ ແລະ ງົດງາມໃນແຜ່ນແພລາວ ທີ່ສ່ອງແສງເຖິງເອກະລັກຂອງຄົນລາວເປັນຢ່າງດີ. ນັບແຕ່ສະໄໝບູຮານການດຳລົງຊີວິດຂອງຄົນລາວແມ່ນຕິດພັນກັບທຳມະຊາດ, ຮີດຄອງປະເພນີ, ຄວາມເຊື່ອ ແລະ ສາສະໜາ ວິຖີຊີວິດດັ່ງກ່າວມີການສືບທອດຈາກຮຸ່ນສູ່ຮຸ່ນ. ດັ່ງນັ້ນ, ຄົນລາວເຊື້ອຊາດລາວບໍ່ວ່າຈະຢູ່ແຫ່ງຫົນໃດກໍຍັງຮັກສາເອກະລັກຂອງຄວາມເປັນຊາດໄວ້ຢ່າງໝັ້ນຄົງ. ໃນສະໄໝບູຮານຄົນລາວ ມີຄວາມເຊື່ອວ່າພະຍານາກແມ່ນສິ່ງສັກສິດທີ່ຄອຍປົກປັກຮັກສາໃຫ້ຄວາມຢູ່ເຢັນເປັນສຸກປາສະຈາກສິ່ງບໍ່ດີ.

    ສະນັ້ນ, ຊາວຊ່າງຫັດຖະກຳລາວ ຈຶ່ງຄົ້ນຄິດລວດລາຍຈາກຈິດສຳນຶກຂອງຕົນຂຶ້ນມາແລ້ວ ບັນຈົງລົງໃນຜືນຜ້າໂດຍຜ່ານຂັ້ນຕອນ ແລະ ກຳມະວິທີອັນປານີດພິຖີພິຖັນຈຶ່ງໄດ້ລວດລາຍທີ່ງົດງາມສະດຸດຕາທ່ີພວກເຮົາເຫັນໃນທຸກວັນນີ້. ການຕໍ່າລາຍນາກ ກໍ່ບໍ່ແມ່ນເລື່ອງງ່າຍຕ້ອງໄດ້ໃຊ້ຄວາມປານິດ ແລະ ຄວາມອົດທົນພະຍາມຍາມເພາະການຕໍ່າ ມີຫລາຍຂັ້ນຕອນ ເລີ່ມຈາກການສາວເສັ້ນໄໝແລ້ວນໍາໄປຍ້ອມສີທໍາມະຊາດ ຈຶ່ງນໍາມາຕໍ່າເປັນລວດລາຍທີ່ສວຍງາມ ດັ່ງທີ່ເຮົາເຫັນຕາມຜືນຜ້ານັ້ນເອງ. ການຕໍ່າລາຍນາກຕາມປະເພນີແລ້ວ ໂຕນາກຈະໃຊ້ຝ້າຍຂາວ, ສ່ວນຫົວນາກຈະໃສ່ສີທີ່ມີຄວາມໂດດເດັ່ນ ເພື່ອສະແດງເຖິງພະລັງອໍານາດ. ສະນັ້ນ, ການຍ້ອມສີຕ້ອງໄດ້ກະກຽມສີຄື: ສີແດງ, ສີຂຽວ, ສີທອງ ແລະ ການຕໍ່າກໍ່ໄດ້ໃຊ້ຫລາຍວິທີເຊັ່ນ: ການຈົກ, ການຂິດ , ການມັດມ່ີ ແລະ ອ່ືນໆ ຫລາຍຂັ້ນຕອນກ່ອນຈະອອກມາເປັນຜ້າແພລວດລາຍຕ່າງໆ.

    ໃນປັດຈຸບັນ ເມື່ອສັງຄົມມີການພັດນາລວດລາຍໃນຜືນຜ້າກໍມີການປ່ຽນແປງໄປຕາມຍຸກສະໄໝ ແຕ່ກໍຍັງຄົງຮັກສາໄດ້ເອກະລັກ ແລະ ຄວາມເປັນຊາດລາວຈາກບັນພະບູລຸດ ແລະ ໄດ້ຮັບການສືບທອດຈາກຄົນຮຸ່ນໜຶ່ງໄປອີກຮຸ່ນໜຶ່ງຢ່າງຕໍ່ເນື່ອງ, ພ້ອມທັງໄດ້ຮັບການປະດິດສ້າງ ແລະ ປັບປຸງໃຫ້ແທດເໝາະກັບສະພາບແວດລ້ອມສັງຄົມໃໝ່, ຕິດພັນກັບທຳມະຊາດອ້ອມຂ້າງ ແລະ ຢູ່ບົນພື້ນຖານປະຫວັດສາດຂອງຊາດ. ແນວໃດກໍດີເຊື່ອວ່າການຮັບຮອງລາຍນາກ ໃຫ້ເປັນມໍລະດົກວັດທະນະທຳ ທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດໂລກ ແມ່ນມີຄວາມໝາຍ ແລະ ຄວາມສຳຄັນຕໍ່ການອະນຸລັກ, ປົກປັກຮັກສາມໍລະດົກອັນລໍ້າຄ່າຂອງຊາດໃຫ້ມີຄວາມຍືນຍົງ ທັງເປັນການປະກອບສ່ວນເຂົ້າໃນການສົ່ງເສີມວຽກງານເສດຖະກິດຂອງຊາດ, ເປັນການຕໍ່ຍອດໃຫ້ແກ່ຜະລິດຕະພັນຫັດຖະກຳຂອງລາວ ໃຫ້ມີບາດກ້າວຂະຫຍາຍຕົວອັນໃໝ່ ແລະ ເປັນທີ່ຮັບຮູ້ຈາກສາກົນຫລາຍຂຶ້ນ.

    ດັ່ງໃນປັດຈຸບັນກໍມີຊ່າງຫັດຖະກໍາ ແລະ ຜູ້ປະກອບການດ້ານຫັດຖະກໍາຕໍ່າແຜ່ນຫລາຍທ່ານທີ່ຍຶດຖືອາຊີບນີ້ແລ້ວປະສົບຜົນສຳເລັດ, ສາມາດສ້າງລາຍຮັບເຂົ້າຄອບຄົວ, ປະກອບສ່ວນສົ່ງເສີມການຜະລິດໃຫ້ປະຊາຊົນໃນຊຸມຊົນ ແລະ ການສົ່ງອອກໄປຕ່າງປະເທດເພື່ອສ້າງວຽກເຮັດງານທໍາໃຫ້ແມ່ຍິງ, ຜູ້ດ້ອຍໂອກາດ, ທັງສາມາດຖ່າຍທອດຄວາມຮູ້ການຕ່ຳຫູກທໍໄໝ ໃຫ້ຄົນຮຸ່ນໃໝ່ໄດ້ສືບທອດໃຫ້ຄົງຢູ່ຄູ່ກັບຄົນລາວເຊື້ອຊາດລາວຕະຫລອດໄປ.

ໂດຍ: ໄໝຄຳ ຍ້ອມສິນ