ຂປລ. ໃນຂະບວນການວັນສັກຢາແຫ່ງຊາດ (ວສຊ) ເພື່ອກຳຈັດພະຍາດໝາກແດງນ້ອຍ ແລະ ໝາກແດງໃຫຍ່ ໃນປີນີ້, ເມືອງເຊບັ້ງໄຟ ແຂວງຄໍາມ່ວນ ຈະສູ້ຊົນໃຫ້ບັນລຸເປົ້າໝາຍ ຕາມການເກັບກຳຂໍ້ມູນເດັກໃນກຸ່ມເປົ້າໝາຍ ໃນເກນອາຍຸ 9-59 ເດືອນ ທັງໝົດ 2.375 ຄົນ, ໃນ 45 ບ້ານທົ່ວເມືອງ.

ທ່ານ ລົດວິໄລ ຈັນທະນຸວົງ  ຮອງເຈົ້າເມືອງເຊບັ້ງໄຟ ໄດ້ໃຫ້ສຳພາບຕໍ່ສື່ມວນຊົນ ໃນພິທີເປີດຂະບວນການວັນສັກຢາແຫ່ງຊາດ (ວສຊ) ເພື່ອກຳຈັດພະຍາດໝາກແດງນ້ອຍ ແລະ ໝາກແດງໃຫຍ່ ເມື່ອບໍ່ດົນນີ້ວ່າ: ເພື່ອປະຕິບັດຕາມ 8 ແຜນງານ ແລະ  11 ຕົວຊີ້ບອກຂອງກະຊວງ ສາທາລະນະສຸກວາງອອກ ເປັນວ່າ ໃນປີ 2011 ປະຕິບັດໄດ້ 80% (ບໍ່ບັນລຸ), ປີ 2022 ປະຕິບັດໄດ້ 87%(ບໍ່ບັນ ລຸ), ປີ 2023 ປະຕິບັດໄດ້ 95% (ບັນລຸຕາມຄາດໝາຍ) ແລະ ປີ 2024 ຈະສູ້ຊົນໃຫ້ບັນລຸ 95%.  ເພື່ອບັນບຸຕາມ ຄາດໝາຍສູ້ຊົນດັ່ງກ່າວ, ອົງການປົກຄອງເມືອງເຊບັ້ງໄຟ ໄດ້ປະສານສົມທົບກັບຫ້ອງ ການສາທາລະນະສຸກເມືອງເຊບັ້ງໄຟ ແລະ ພະແນກສາທາລະນະສຸກ ແຂວງຄຳມ່ວນ ເປີດຂະບວນການສັກຢາກັນພະຍາດໝາກແດງນ້ອຍ ແລະ ໝາກແດງໃຫຍ່ ໃນວັນທີ 20-29 ພຶດສະພາ 2024 ທີ່ ເມືອງເຊບັ້ງໄຟ. ພ້ອມນີ້, ເມືອງເຊບັ້ງໄຟ ກໍມີເປົ້າໝາຍຈັດຕັ້ງປະຕິບັດຕາມແຜນງານການກັນພະຍາດ ແລະ ຄວບຄຸມພະຍາດຕິດຕໍ່ ໃນຂະບວນການວັນສັກຢາແຫ່ງຊາດ (ວສຊ) ເພື່ອກຳຈັດພະຍາດໝາກແດງນ້ອຍ ແລະ ໝາກແດງໃຫຍ່ ໂດຍມອບໃຫ້ນາຍບ້ານ ໂຄສະນາເຜີຍແຜ່ຜ່ານທາງໂທລະໂຄ່ງ, ລົງເກັບກຳຂໍ້ມູນເດັກໃນກຸ່ມເປົ້າໝາຍໃນເກນອາຍຸ 9-59 ເດືອນ ລວມທັງໝົດ 2.375 ຄົນ ໃຫ້ໄດ້ຕາມຄາດໝາຍໃນ 45 ບ້ານທົ່ວເມືອງບັນລຸ 95 ສ່ວນຮ້ອຍ ແລະ ທົ່ວແຂວງຄຳມ່ວນ ມີເປົ້າໝາຍໃນການສັກວັກຊິນ ປ້ອງກັນພະຍາດດັ່ງກ່າວ ທັງໝົດ 31.985 ຄົນ.   

 
ໂອກາດນີ້, ທ່ານ ລົດວິໄລ ຈັນທະນຸວົງ ຍັງໄດ້ຮຽກຮ້ອງມາຍັງຜູ້ປົກຄອງ ຈົ່ງໄດ້ນຳລູກຫລານຂອງຕົນເຂົ້າຮ່ວມ ໃນວັນສັກຢາປ້ອງກັນ ພະຍາດໝາກແດງນ້ອຍ-ໝາກແດງໃຫຍ່ ເພື່ອສ້າງພູມຄຸ້ມກັນ, ປ້ອງກັນບໍ່ໃຫ້ລູກຫລານ ເຈັບເປັນດ້ວຍພະຍາດດັ່ງກ່າວ ແລະ ເພື່ອປ້ອງກັນບໍ່ໃຫ້ເກີດ ມີການແພ່ລະບາດ. ພ້ອມນີ້, ຄະນະຮັບຜິດຊອບຂອງເມືອງເຊບັ້ງໄຟ ກໍໄດ້ລົງຕິດຕາມການສັກວັກຊິນ ຢູ່ໂຮງໝໍເມືອງ, ສຸກສາລາ ເພື່ອສັງຮວມລາຍງານຜົນການຈັດຕັ້ງປະຕິບັດ ປະຈຳແຕ່ລະວັນອີກດ້ວຍ.

ສະເພາະຈຸດໃຫ້ບໍລິການຮັບວັກຊິນ ເພື່ອກຳຈັດພະຍາດໝາກແດງນ້ອຍ ແລະ ໝາກແດງໃຫຍ່ ພາຍໃນເມືອງເຊບັ້ງໄຟມີ: ຈຸດບໍລິການກັບທີ່ 7 ຈຸດ (ໂຮງໝໍເມືອງ ແລະ ໂຮງໝໍນ້ອຍ) ແລະ ຈຸດບໍລິ ການເຄື່ອນທີ່ 10 ທີມ(ຈຸດ1 ບໍລິການຕໍ່ 1-2 ບ້ານນ້ອຍ).

ຂ່າວ-ພາບ:ວຽງສະຫວັນ

KPL