ຂປລ
ສປປ ລາວ ເປີດສາຍການບິນລະຫວ່າງປະເທດຈາກນະຄອນປາກເຊ ແຂວງຈໍາປາສັກ ໄປເຖິງກວາງໂຈ່ວ, ສປ ຈີນ ເພື່ອສົ່ງເສີມການທ່ອງທ່ຽວລາວ ແລະ ຍັງເປັນການຊຸກຍູ້ການພັດທະນາເສດຖະກິດ-ສັງຄົມພາຍໃນແຂວງດັ່ງກ່າວ ຈະສາມາດເຊື່ອມໂຍງເຊື່ອມຈອດພາກໃຕ້ຂອງ ສປປ ລາວ ກັບ ປະເທດ ກໍາປູເຈຍ, ໄທ, ຫວຽດນາມ.
*ສປປ ລາວ ເປີດສາຍການບິນລະຫວ່າງປະເທດຈາກນະຄອນປາກເຊ ແຂວງຈໍາປາສັກ ໄປເຖິງກວາງໂຈ່ວ, ສປ ຈີນ ເພື່ອສົ່ງເສີມການທ່ອງທ່ຽວລາວ ແລະ ຍັງເປັນການຊຸກຍູ້ການພັດທະນາເສດຖະກິດ-ສັງຄົມພາຍໃນແຂວງດັ່ງກ່າວ ຈະສາມາດເຊື່ອມໂຍງເຊື່ອມຈອດພາກໃຕ້ຂອງ ສປປ ລາວ ກັບ ປະເທດ ກໍາປູເຈຍ, ໄທ, ຫວຽດນາມ. ບໍລິສັດ ການບິນລາວ ຈະເລີ່ມຖ້ຽວບິນໂດຍກົງ ລະຫວ່າງ ເມືອງປາກເຊ ຫາ ກວາງໂຈ່ວ ໃນວັນອາທິດ ມີ 19 ພຶດສະພາ 2024 ນີ້, ເປັນການຕອບສະໜອງອີກທາງເລືອກໜຶ່ງ ໃນການເດີນທາງໃນໄລຍະປີທ່ອງທ່ຽວ ລາວ ປີ 2024.
![](https://kpl.gov.la/Media/Upload/News/Thumb/2024/05/22/ກບ2.jpg)
ເຮືອບິນ Airbus A320 ຈະໃຫ້ບໍລິການເສັ້ນທາງນີ້, ໂດຍມີຖ້ຽວບິນໜຶ່ງຖ້ຽວຕໍ່ອາທິດອອກເດີນທາງຈາກປາກເຊ ໃນວັນອາທິດ ເວລາ 23:15 ໂມງ ແລະ ຮອດກວາງໂຈ່ວ ໃນເວລາ 02:05 ໂມງ ເຊົ້າຂອງວັນຈັນ. ຖ້ຽວບິນຂາກັບອອກຈາກກວາງໂຈ່ວ ເວລາ 03:05 ໂມງເຊົ້າ ຂອງວັນຈັນ, ຮອດເມືອງປາກເຊ ເວລາ 04:05 ໂມງເຊົ້າ. ຫລຸດລາຄາພິເສດ 2.888.000 ກີບ ສຳລັບປີ້ໄປກັບໃນຖ້ຽວບິນປະຖົມມະເລີກເທົ່ານັ້ນ. ບໍລິສັດການບິນລາວຍັງໄດ້ກຳນົດເສັ້ນທາງການບິນໃໝ່ຈາກ ວຽງຈັນ ຫາ ພະນົມເປັນ ຂອງກຳປູເຈຍ ແລະ ກ່ອນໜ້ານີ້ໄດ້ເລີ່ມຖ້ຽວບິນລະຫວ່າງຫລວງພະບາງກັບ ເມືອງສາງຊາ ຂອງຈີນ ຄືນໃໝ່. ໃນຂະນະທີ່ VietJet ໄດ້ລິເລີ່ມຖ້ຽວບິນລະຫວ່າງ ນະຄອນຫລວງວຽງຈັນ ແລະ ໂຮ່ຈີມິງ, ໃນຂະນະທີ່ AirAsia ໄດ້ເລີ່ມຖ້ຽວບິນ ລະຫວ່າງ ວຽງຈັນ ແລະ ມາເລເຊຍ. ໃນເດືອນແລ້ວນີ້, ສາຍການບິນຮົງກົງ ໄດ້ເລີ່ມຖ້ຽວບິນປະຈໍາອາທິດມາລາວເພື່ອຕອບສະໜອງຄວາມຕ້ອງການການເດີນທາງທີ່ເພີ່ມຂຶ້ນ ແລະ ສ້າງຄວາມເຂັ້ມແຂງ ເຄືອຂ່າຍການຂົນສົ່ງທາງອາກາດໃນພາກພື້ນ. ຖ້ຽວບິນໃໝ່ເຫລົ່ານີ້ , ຈະຊຸກຍູ້ຈຳນວນ ນັກທ່ອງທ່ຽວທີ່ມາລາວ ໂດຍະເພາະແມ່ນຈາກພາກໃຕ້ຂອງຈີນ. ຈຳນວນນັກທ່ອງທ່ຽວ ຈີນ ທ່ີມາທ່ຽວ ລາວໄດ້ເພ່ີມຂ້ຶນຢ່າງຫລວງຫລາຍໃນປີນີ້. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໃຫ້ຮູ້ວ່າ: ໃນປີ 2022 ມີນັກທ່ອງທ່ຽວຈີນປະມານ 45.000 ຄົນເຂົ້າມາລາວ, ເພີ່ມຂຶ້ນເປັນ 641.314 ຄົນ ໃນປີ 2023, ແລະ ໃນ 3 ເດືອນຕົ້ນປີ 2024 ນີ້, ນັກທ່ອງທ່ຽວຈີນເຂົ້າມາທ່ຽວຢູ່ລາວມີ 242.193 ຄົນ.
ໂດຍ: ເກີດຂວັນໃຈ ມາລີຈັນສີ
KPL