ຂປລ
ຂປລ. ອີງຕາມຂໍ້ມູນຈາກ ສູນຂ່າວສານການແພດສຸຂະສຶກສາ ກະຊວງສາທາລະນະສຸກ ໃຫ້ຮູ້ວ່າ: ໃນໄລຍະ 4 ເດືອນຕົ້ນປີ 2024 ນີ້, ນັບແຕ່ວັນທີ 1 ມັງກອນ ຫາ ວັນທີ 7 ພຶດສະພາ 2024 ທົ່ວປະເທດ ມີຕົວເລກໄຂ້ຍຸງລາຍສະສົມທັງໝົດ 2.770 ຄົນ.
ຂປລ. ອີງຕາມຂໍ້ມູນຈາກ ສູນຂ່າວສານການແພດສຸຂະສຶກສາ ກະຊວງສາທາລະນະສຸກ ໃຫ້ຮູ້ວ່າ: ໃນໄລຍະ 4 ເດືອນຕົ້ນປີ 2024 ນີ້, ນັບແຕ່ວັນທີ 1 ມັງກອນ ຫາ ວັນທີ 7 ພຶດສະພາ 2024 ທົ່ວປະເທດ ມີຕົວເລກໄຂ້ຍຸງລາຍສະສົມທັງໝົດ 2.770 ຄົນ. ໃນນັ້ນ, ແຂວງທີ່ມີການລະບາດຫລາຍກວ່າໝູ່ ແມ່ນແຂວງເຊກອງ 881 ຄົນ, ເສຍຊີວິດ 1 ຄົນ, ນະຄອນຫລວວຽງຈັນ 566 ຄົນ, ເສຍຊີວິດ 2 ຄົນ, ຫລວງນໍ້າທາ 293 ຄົນ, ສະຫວັນນະເຂດ 158 ຄົນ, ບໍ່ມີຜູ້ເສຍຊີວິດ ແລະ ແຂວງອື່ນໆ ກໍມີການລະບາດເຊັ່ນດຽວກັນ.
ປັດຈຸບັນ ພວມກ້າວເຂົ້າສູ່ ໄລຍະລະດູຝົນ, ທຸກຄົນໃນສັງຄົມ ຈົ່ງຮ່ວມແຮງຮ່ວມໃຈກັນ ປ້ອງກັນພະຍາດໄຂ້ຍຸງລາຍ ໂດຍການກຳຈັດແຫລ່ງເພາະພັນ ໜອນນໍ້າ-ຍຸງລາຍ ສິ່ງສຳຄັນຕ້ອງປະຕິບັດຫລັກການ 5 ປ ທີ່ກະຊວງສາທາລະນະສຸກ ວາງອອກຢ່າງເຂັ້ມງວດ ເປັນຕົ້ນຕ້ອງປິດພາຊະນະຕ່າງໆ ຢູ່ພາຍໃນບ້ານເຮືອນ ແລະ ນອກເຮືອນໃຫ້ດີ; ປ່ຽນພາຊະນະທີ່ມີນໍ້າອັ່ງຂັງໂດຍສະເພາະຖັງ, ຖາດຮອງຕີນຕູ້ ແລະ ອື່ນໆ; ປ່ອຍປາຫາງນົກຍຸງເພື່ອກິນໜອນນໍ້າ, ປັບປຸງສະພາບແວດລ້ອມ, ສະຖານທີ່ຢູ່ອາໄສຂອງຕົນ ໃຫ້ສະອາດງາມ ຕາຢູ່ສະເໝີ ແລະ ປະຕິບັດເປັນປະຈຳທຸກໆອາທິດ. ພ້ອມນັ້ນ, ອົງການຈັດຕັ້ງເມືອງ ແລະ ບ້ານຕ້ອງເປັນເຈົ້າການປຸກລະດົມ ໂຄສະນາໃຫ້ປະຊາຊົນມີຄວາມເຂົ້າໃຈ, ຮັບຮູ້ວິທີປ້ອງກັນຕົນເອງຕໍ່ພະຍາດດັ່ງກ່າວ ໂດຍຜ່ານທາງໂທລະໂຄ່ງ ແລະ ອື່ນໆ.
ຢ່າງໃດກໍຕາມ, ຖ້າທ່ານ ຫລື ຄົນໃນຄອບຄົວ ຮູ້ສຶກບໍ່ສະບາຍ ຫລື ມີອາການຄ້າຍຄື ເປັນພະຍາດໄຂ້ຍຸງລາຍ ບໍ່ຄວນຊື້ຢາມາກິນເອງ, ຄວນໄປພົບແພດໝໍໂດຍດ່ວນ ເປັນຕົ້ນ ໂຮງໝໍເມືອງ, ແຂວງ, ສູນກາງ, ສຸກສາລາໃກ້ບ້ານທ່ານ ຫລື ສະຖານທີ່ໃຫ້ບໍລິການຕ່າງໆ ເພື່ອຈະໄດ້ກວດໃຫ້ຮູ້ອາການພະຍາດ ພ້ອມກິນຢາຕາມແພດສັ່ງ ແລະ ປິ່ນປົວໃຫ້ທັນເວລາ.
ຂ່າວ: ທະນູທອງ
ຂໍ້ມູນ-ພາບ: ໜັງສືພິມປະຊາຊົນ
KPL
