ຂປລ
ຂປລ. ໃນວັນທີ 8 ພຶດສະພາ 2024 ຜ່ານມານີ້, ສະມາຄົມມິດຕະພາບ ລາວ-ກູບາ ຮ່ວມກັບ ສະຖານເອກອັກຄະລັດຖະທູດ ແຫ່ງ ສ ກູບາ ປະຈໍາ ສປປ ລາວ ແລະ ອົງການປົກຄອງແຂວງຫົວພັນ ຈັດປາຖະກະຖາ ເນື່ອງໃນໂອກາດ ຄົບຮອບ 50 ປີ ແຫ່ງການພົວພັນ ທາງການທູດ ລາວ-ກູບາ
ຂປລ. ໃນວັນທີ 8 ພຶດສະພາ 2024 ຜ່ານມານີ້, ສະມາຄົມມິດຕະພາບ ລາວ-ກູບາ ຮ່ວມກັບ ສະຖານເອກອັກຄະລັດຖະທູດ ແຫ່ງ ສ ກູບາ ປະຈໍາ ສປປ ລາວ ແລະ ອົງການປົກຄອງແຂວງຫົວພັນ ຈັດປາຖະກະຖາ ເນື່ອງໃນໂອກາດ ຄົບຮອບ 50 ປີ ແຫ່ງການພົວພັນ ທາງການທູດ ລາວ-ກູບາ (4/11/1974-4/11/2024) ໂດຍມີ ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ, ມີຄະນະປະຈໍາພັກແຂວງ, ຮອງປະທານສະພາປະຊາຊົນແຂວງຫົວພັນ, ການນໍາຂອງແຂວງ, ຜູ້ຕາງໜ້າຈາກຄະນະພົວພັນຕ່າງ ປະເທດສູນກາງພັກ, ຄະນະບໍລິຫານງານສະມາຄົມມິດຕະພາບ ລາວ-ກູບາ, ສະມາຊິກສະມາຄົມມິດຕະພາບ, ພະ ນັກງານບັນດາພະແນກ ແລະ ຂະແໜງການ ອ້ອມຂ້າງແຂວງຫົວພັນ ເຂົ້າຮ່ວມ.
ໃນພິທີ ທ່ານນາງ ແອນນາ ເອັດເຕວຽງ ວາເດຣ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສ ກູບາ ປະຈໍາ ສປປ ລາວ ໄດ້ໃຫ້ກຽດປາຖະກະຖາ ໂດຍທ່ານໄດ້ ຍົກໃຫ້ເຫັນເຖິງສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ທີ່ໄດ້ໃຫ້ການສະໜັບສະໜູນ ຊ່ວຍເຫລືອເຊິ່ງກັນ ແລະ ກັນ ຕະຫລອດມາ. ພ້ອມນັ້ນ, ຍັງໄດ້ຍົກໃຫ້ເຫັນສະພາບການພົ້ນເດັ່ນ ຂອງ ສ ກູບາ ແລະ ບົດບາດຂອງກູບາ ໃນເວທີສາກົນ ກໍຄື ຜົນງານໄຊຊະນະ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດກູບາ.
ຜ່ານການຮັບຟັງໄດ້ເຮັດໃຫ້ຜູ້ເຂົ້າຮ່ວມໄດ້ຮັບຮູ້ ປະຫວັດສາດແຫ່ງການຕໍ່ສູ້ ປະຕິວັດອັນກ້າແກ່ນ ເປັນຈິດໜຶ່ງໃຈດຽວ ຂອງປະຊາຊົນກູບາ ຕໍ່ສູ້ຕ້ານການປິດລ້ອມຍາວນານກວ່າ 6 ທົດສະວັດ ແລະ ເຂົ້າໃຈແຈ້ງ, ເລິກເຊິ່ງ ເຖິງສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃນໄລຍະການຕໍ່ສູ້ກູ້ຊາດ ກໍຄື ໄລຍະປົກປັກຮັກສາ ແລະ ສ້າງສາປະເທດຊາດ ເຊິ່ງຍັງສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງຢ່າງບໍ່ຢຸດຢັ້ງ ແລະ ນຳເອົາຜົນປະໂຫຍດມາສູ່ປະຊາຊົນ ສອງຊາດ ກູບາ ແລະ ລາວ.
ຂ່າວ-ພາບ: ຄຕພ
KPL