ຂປລ
ຄໍລໍາສົ່ງເສີມທຸລະກິດສະບັບນປ່ຽນບັນຍາກາດຈາກຮ້ານອາຫານ ມາເປັນຮ້ານເຂົ້າໜົມແຊບເຊິ່ງມີຊື່ສຽງອີກຮ້ານໜ່ຶງໃນນະຄອນຫລວງ ວຽງຈັນ ທີ່ຫລາຍຄົນຕ້ອງຮູ້ຈັກ.
*ຄໍລໍາສົ່ງເສີມທຸລະກິດສະບັບນປ່ຽນບັນຍາກາດຈາກຮ້ານອາຫານ ມາເປັນຮ້ານເຂົ້າໜົມແຊບເຊິ່ງມີຊື່ສຽງອີກຮ້ານໜ່ຶງໃນນະຄອນຫລວງວຽງຈັນ ທີ່ຫລາຍຄົນຕ້ອງຮູ້ຈັກ ເປັນຂາປະຈໍາຢູ່ແລ້ວເພາະຮ້ານປັງປີ້ງສີຫອມ ເປັນອີກຮ້ານໜຶ່ງທີ່ໄດ້ຮັບຄວາມນິຍົມຊົມຊອບຂອງຊາວນະຄອນຫລວງວຽງຈັນ ແລະ ຕ່າງແຂວງ ເນ່ືອງຈາກວ່າປັດຈຸບັນມີບໍລິການສົ່ງຕ່າງແຂວງສະນັ້ນ,ຈຶ່ງເຮັດໃຫ້ຮ້ານຂະໜົມດັ່ງກ່າວນັບມື້ເປັນທີ່ຮູ້ຈັກຫລາຍຂຶ້ນດ້ວຍຄວາມແຊບທີ່ມີເອກະລັກສະເພາະ ແລະ ມີຫລາຍເມນູໃຫ້ເລືອກຈຶ່ງເຮັດໃຫ້ຮ້ານປັງປີ້ງສີຫອມຄອງໃຈລູກຄ້າຍາວນານ.
ນາງ ວາດສະໜາ ເຫງົ້າວົງສາ ເຈົ້າຂອງຮ້ານປັງປີ້ງສີຫອງເວົ້າສູ່ຟັງວ່າ: ຈຸດເລີ່ມຕົ້ນຂອງອາຊີບນີ້ແມ່ນຄວາມມັກກິນເຂົ້າໜົມຢູ່ແລ້ວ ຈຶ່ງຢາກເປີດຮ້ານເຂົ້າໜົມເປັນຂອງໂຕເອງ ແຕ່ຍັງຄິດບໍ່ໄດ້ວ່າຈະເຮັດຫຍັງຈຶ່ງຕັດສິນໃຈເຮັດສອງຢ່າງຄື ຕອນເຊົ້າເປີດຮ້ານຂາຍເຝີ, ຕອນ ແລງເປີດຮ້ານເຂົ້າໜົມແຕ່ປີ2020 ເປັນຕົ້ນມາເຊິ່ງເລີ່ມເປີດທໍາອິດຜົນຕອບຮັບດີເກີນຄາດມື້ໜຶ່ງຂາຍໄດ້ 100-200 ແຕ່ຂາຍມາໄດ້ 4-5 ເດືອນຍອດຂາຍກັບຫລຸດລົງ. ສະນັ້ນ, ເພື່ອສ້າງຄວາມແປກໃໝ່ໃຫ້ລູກຄ້າຈຶ່ງໄດ້ໄປຮຽນເຮັດເຂົ້າໜົມ ປະເພດເບເກີລີ້ຈາກປະເທດເພື່ອນບ້ານ ແລ້ວນໍາມາປັບໃຊ້ຈົນເປັນ ຮ້ານປັງປິ້ງໃນປັດຈຸບັນເຊິ່ງໄດ້ມີກະແສຕອບຮັບດີຫລາຍ ເນື່ອງຈາກວ່າສິ່ງທີ່ເຮົາເລືອກເຮັດແມ່ນເປັນເມນູທີ່ບ້ານເຮົາຍັງບໍ່ມີຫລາຍ ຖ້າມີກໍ່ມີໜ້ອຍເປັນຕົ້ນ: ເຂົ້າໜົມບ້າບີ່ນທອງມ້ວນແມ່ນໄດ້ຂາຍດີຫລາຍ ຈົນໄດ້ຈໍາກັດການຊື້ຄືຜູ້ໜຶ່ງຊື້ໄດ້ 5 ກ໋ອງເນື່ອງຈາກວ່າຢາກໃຫ້ທຸກຄົນທີ່ມາຊື້ໄດ້ກິນນໍາກັນໂດຍການຂາຍໃນປັດຈຸບັນນອກຈາກຂາຍຢູ່ໜ້າຮ້ານແລ້ວຍັງສົ່ງຕ່າງແຂວງມື້ລະ 200-300 ກ໋ອງຍ້ອນຕິດອົກຕິດໃຈໃນລົດຊາດ ໃນແຕ່ລະເມນູ ເນື່ອງຈາກວ່າຂ້າພະເຈົ້າ ເປັນຄົນເຮັດເອງທຸກຂັ້ນຕອນການຜະລິດ ສ່ວນພະນັກງານຈະເປັນຄົນ ໃສ່ສ່ວນປະກອບໃນແຕ່ລະເມນູ ເພື່ອໃຫ້ເຂົ້າໜົມປັງໜ້າກິນຫລາຍຂຶ້ນ.
ສໍາລັບເມນູຂອງຮ້ານມີເຂົ້າໜົມບ້າບີ່ນທອງມ້ວນ, ເອວມ້ອນ,ຄົວຊອງ, ຄອບໂຟ້, ທິບເບີລີ, ເອແຄ, ເຄັກ ຫລາກຫລາຍໜ້າໃຫ້ເລືອກຕາມ ຄວາມມັກຂອງລູກຄ້າ ບອກໄດ້ເລີຍວ່າເຂົ້າໜົມແຕ່ລະເມນູ ແມ່ນຖືກໃຈລູກຄ້າທັງພາຍໃນ ແລະ ຕ່າງແຂວງມາເປັນເວລາຫລາຍປີ ແລະ ຕົນເອງຄິດວ່າຮ້ານເຮົາຈະຍັງຄົງຢູ່ໃນໃຈລູກຄ້າຕະຫລອດໄປ.ນາງວາດສະໜາເວົ້າຕື່ມວ່າ: ຫົວໃຈສໍາຄັນຂອງການເຮັດອາຊີບ ນີ້ແມ່ນຄຸນນະພາບຂອງຜະລິດຕະ ພັນບໍ່ວ່າຮ້ານຈະໄດ້ຂາຍດີຫລາຍ ປານໃດແຕ່ຄຸນນະພາບຍັງບໍ່ປ່ຽນ ຈຶ່ງຈະມັດໃຈລູກຄ້າໄດ້ແລະນີ້ກໍເປັນອີກສາເຫດໜຶ່ງທີ່ຕົນເອງບໍ່ຂາຍ ແຟນຊາຍໃຫ້ຄົນອື່ນເຖິງວ່າຈະມີຄົນມາຖາມຊື້ຈໍານວນຫລາຍກໍ່ຕາມ ເພາະຢ້ານຫລາຍຄົນທີ່ຊື້ໄປແລ້ວບໍ່ສາມາດຮັກສາລົດຊາດຂອງຮ້ານເຮົາໄດ້ ກໍຈະເຮັດໃຫ້ລູກຄ້າຂາດຄວາມເຊື້ອໝັ້ນ ແລະ ຮ້ານປັງປີ້ງ ສີຫອມຕັ້ງຢູ່ບ້ານ ຫາຍໂສກເມືອງ ຈັນທະບູລີ ນະຄອນຫລວງວຽງຈັນ ຫລື ຖ້າທ່ານໃດບໍຮູ້ກໍສາມາດຕິດຕໍ່ ໄດ້ທີເບີ02055575789.
ໂດຍ:ມາລີດາ
KPL
