*ກິດຈະກຳສົ່ງເສີມໃຫ້ປະຊົນລ້ຽງສັດເປັນສິນຄ້າເປັນອີກໂຄງການໜ່ຶງທ່ີກອງທຶນຫລຸດຜ່ອນຄວາມທຸກຍາກ (ທລຍ) ເອົາໃຈໃສ່ໃນການຈັດຕັ້ງປະຕິບັດເນື່ອງຈາກວ່າກິດຈະກຳດັ່ງກ່າວ ເປັນທ່າແຮງຂອງຫລາຍທ້ອງຖິ່ນຍ້ອນມີສະພາບພ້ືນທີ່ເອື້ອຍອຳນວຍຊຶ່ງຜ່ານການຈັດຕັ້ງປະຕິບັດ ກໍເຫັນວ່າຫລາຍຄອບຄົວເຮັດໄດ້ດີ ແລະ ມີຊີວິດການເປັນຢູ່ຍ້ອນການລ້ຽງສັດເໝືອນດັ່ງຄອບຄົວນາງ ນິດ ທີ່ອາໃສຢູ່ບ້ານ ພຽງດ້າງ, ຂຶ້ນກັບກຸ່ມບຸນຖິ່ນ, ເມືອງຄໍາ ແຂວງຊຽງຂວາງ ຊຶ່ງບ້ານດັ່ງກ່າວຫ່າງຈາກຕົວເມືອງ 84 ກິໂລແມັດ ແລະ ເປັນບ້ານເປົ້າໝາຍຊຸດທີ່ 1 ຂອງໂຄງການ ທລຍ 3 ໄລຍະເພີ່ມທຶນ.

    ຄອບຄົວນາງ ນິດ ມີສະມາຊິກ ທັງໝົດ 4 ຄົນ (ຍິງ 2 ຄົນ). ນາງ ນິດ ແລະ ຜົວຂອງລາວໄດ້ມີໂອກາດເຂົ້າຮ່ວມຮັບຟັງການແນະນໍາກຽວກັບໂຄງການ ທລຍ ໂດຍສະເພາະການສ້າງຕັ້ງກຸ່ມຊ່ວຍເຫລືອ ກັນ (ກຊກ) ແລະ ເຮັດໃຫ້ ນາງ ນິດ ແລະ ຜົວເຂົ້າໃຈເຖິງຈຸດປະສົງຂອງໂຄງການ ທລຍ ທີ່ຈະສະໜັບສະໜູນຊ່ວຍຄອບຄົວທຸກຍາກພາຍໃນບ້ານ ໃຫ້ຫລຸດພົ້ນຈາກຄວາມທຸກຍາກ. ຫລັງຈາກນັ້ນ ນາງ ນິດ ແລະ ຄອບຄົວໄດ້ຕົກລົງກັນເຂົ້າເປັນສະມາຊິກ ກຊກ. ນັບແຕ່ຕົ້ນປີ 2021 ເປັນຕົ້ນມາ, ນາງ ນິດ ໄດ້ເຂົ້າຮ່ວມກອງປະຊຸມ ກຊກ ແລະ ຝາກເງິນກັບກອງທຶນ ກຊກ ຢ່າງເປັນປົກກະຕິຊຶ່ງມາຮອດປັດຈຸບັນ ນາງ ນິດ ໄດ້ຝາກເງິນກັບກອງທຶນ ກຊກ ທັງໝົດ 355.000 ກີບ. ນອກຈາກນ້ັນ ນາງ ນິດ ແລະ ຜົວ ຍັງໄດ້ເຂົ້າຮ່ວມຝຶກອົບຮົມເຕັກນິກການປູກ-ການລ້ຽງທີ່ຈັັດໂດຍໂຄງການ ທລຍ ໂດຍສົມທົບກັບຫ້ອງການກະສິກໍາ ແລະ ປ່າໄມ້ເມືອງ. ຫລັງຈາກນັ້ນ ຄອບຄົວ ນາງ ນິດ ໄດ້ກູ້ຢືມເງິນຈາກກອງທຶນ ກຊກ ຈໍານວນ 5.000.000 ກີບ ເພື່ອລົງທຶນຊ້ືໝູນ້ອຍ ຈໍານວນ 10 ໂຕ ມາລ້ຽງ (ລາຄາໝູນ້ອຍ ໂຕລະ 500.000- 600.000 ກີບ) ເປັນໄລຍະ 15- 30 ມື້ ເພື່ອໃຫ້ນໍ້າໜັກເພີ່ມຂຶ້ນ ແລ້ວ ຂາຍອອກປະມານ 850.000 ກີບ ຕໍ່ໂຕ. ໃນ 1 ປີ ຄອບຄົວ ນາງ ນິດ ໄດ້ຊື້ໝູນ້ອຍເຂົ້າມາລ້ຽງແລ້ວຂາຍອອກ 9 ຄັ້ງ ໂດຍໄດ້ກໍາໄລທັງໝົດ 20.250.000 ກີບ ຕໍ່ປີ. ນອກຈາກນີ້, ຄອບຄົວ ນາງ ນິດ ຍັງໄດ້ລ້ຽງໄກ່ໂດຍສາມາດສ້າງລາຍຮັບເຂົ້າສູ່ຄອບຄົວໄດ້ 10.000.000 ກີບຕໍ່ປີ, ລວມລາຍຮັບຈາກການລ້ຽງໝູ ແລະ ໄກ່ ແມ່ນ 30.250.0000 ກີບ/ປີ. ການສ້າງລາຍຮັບຈາກການລ້ຽງໝູ ແລະ ໄກ່ ຂອງຄອບຄົວ ນາງ ນິດ ໄດ້ກາຍເປັນແບບຢ່າງໃຫ້ຄອບຄົວອື່ນ ແລະ ສາມາດເປັນບ່ອນຮຽນຮູ້ພາຍໃນບ້ານພຽງດ້າງ ແລະ ບ້ານໃກ້ຄຽງ.

ໂດຍ: ຈັນທີ ສີລິເດດ ທລຍ ເມືອງຄໍາ

KPL