ຂປລ. ວັນທີ 15 ພຶດສະພາ 2024 ຜ່ານມາ, ໂຮງຮຽນວັດທະນະທໍາຊົນເຜົ່າກອງທັບ ເປີດກອງປະຊຸມສະພາສອບເສັງພາກຮຽນທີ II ປະຈຳສົກຮຽນ 2023-2024 ໂດຍການເປັນປະທານຂອງ ສະຫາຍ ພັນເອກ ເພັດສະໝອນ ວິລະວອນ ຫົວໜ້າການທະຫານ ໂຮງຮຽນວັດທະນະທຳຊົນເຜົ່າກອງທັບ, ມີຄະນະພັກ-ຄະນະອຳນວຍການ, 4 ຫ້ອງການ, 2 ກອງພັນ, ພະນັກງານ-ນັກຮົບ, ຄູອາຈານ ແລະ ແຂກຖືກເຊີນເຂົ້າຮ່ວມ.

ສະຫາຍ ພັນໂທ ນາງ ດາວັນ ສິມໃບມະນີ ຮອງຫົວໜ້າຫ້ອງສຶກສາ ໄດ້ຜ່ານແຜນການທວນຄືນ ການສອບເສັງພາກຮຽນທີ II ສົກຮຽນ 2023-2024  ເພື່ອເປັນການກວດກາຄືນ ການຈັດຕັ້ງການຮຽນ-ການສອນ ໃນໄລຍະສົກຮຽນທີ່ຜ່ານມາ, ການເລື່ອນຊັ້ນຮຽນຂອງນັກຮຽນຊັ້ນ ມ1, ມ5 ແລະ ມ6; ການປະຕິບັດຕາມຂັ້ນ ຕອນ-ບາດກ້າວການຮຽນ-ການສອນ ລະບົບສາມັນສຶກສາ ທີ່ກະຊວງສຶກສາທິການ ແລະ ກິລາວາງອອກ, ເປັນການ ວັດແທກ ແລະ ປະເມີນຜົນການຮຽນການສອນ ໃນໄລຍະຜ່ານມາ, ພ້ອມທັງຮັບປະກັນ ໃຫ້ບັ້ນດຳເນີນການຮຽນ-ການສອນ ມີຄວາມເປັນເອກະພາບ ໃນການຈັດຕັ້ງປະຕິບັດໂຄງການຫລັກສູດ ການຮຽນ-ການສອນ ປະຈຳສົກຮຽນ 2023-2024 ຂອງໂຮງຮຽນວັດທະນະທຳຊົນເຜົ່າກອງທັບ. ຈາກນັ້ນ ຍັງໄດ້ຜ່ານ ຂໍ້ຕົກລົງວ່າດ້ວຍການແຕ່ງຕັ້ງ ຄະນະຊີ້ນຳລວມ ແລະ ອະນຸກຳມະການສອບເສັງ, ຜ່ານມາດຖານ, ເງື່ອນໄຂ, ລະບຽບການສອບເສັງ ແລະ ການປະ ເມີນຜົນການສອບເສັງຂອງນັກຮຽນ, ຜ່ານຕາຕະລາງສອບເສັງ ພາກຮຽນທີ II ປະຈຳສົກຮຽນ 2023-2024.

ໂອກາດດັ່ງກາວ, ສະຫາຍ ພັນເອກ ເພັດສະໝອນ ວິລະວອນ ໄດ້ສະແດງ ຄວາມຍ້ອງຍໍຊົມເຊີຍຕໍ່ການຈັດ ຕັ້ງປະຕິບັດການຮຽນ-ການສອນ ໃນໄລຍະຜ່ານມາຈົນໄດ້ຜົນສຳເລັດ ແລະ ເນັ້ນໃຫ້ບັນດາຄະນະກຳມະການ, ອະນຸກຳມະການ ແລະ ພາກສ່ວນຮັບຜິດຊອບໃນການສອບເສັງຄັ້ງນີ້ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ ທີ່ຮັບມອບ ໝາຍໃຫ້ປະສົບຜົນສຳເລັດ, ຮັກສາຈັນຍາບັນ-ຈັນຍາທຳ, ຮັກສາຄວາມສະຫງົບໃຫ້ໃດ້ 100% ເພື່ອເຮັດໃຫ້ບັ້ນ ສອບເສັງຄັ້ງນີ້ ໄດ້ຮັບໝາກ ຜົນຕາມຄາດໝາຍທີ່ວາງໄວ້.

ຂ່າວ: ໂອລິນ ມິ່ງມີໄຊ

KPL