ຂປລ
ຄິດວ່າຫລາຍທ່ານຄົງໄດ້ສະເຫລີມສະຫລອງບຸນປີໃໝ່ລາວຢ່າງເບີກບານມ່ວນຊື່ນ ທັງໄດ້ໄປທ່ອງທ່ຽວຕາມຈຸດປະສົງຂອງໃຜລາວ, ບ່ໍວ່າການທ່ອງທ່ຽວທາງທຳມະຊາດ,ປະຫວັດສາດ ແລະ ທຳມະຊາດມາແລ້ວ.
*ຄິດວ່າຫລາຍທ່ານຄົງໄດ້ສະເຫລີມສະຫລອງບຸນປີໃໝ່ລາວຢ່າງເບີກບານມ່ວນຊື່ນ ທັງໄດ້ໄປທ່ອງທ່ຽວຕາມຈຸດປະສົງຂອງໃຜລາວ, ບ່ໍວ່າການທ່ອງທ່ຽວທາງທຳມະຊາດ,ປະຫວັດສາດແລະທຳມະຊາດມາແລ້ວ. ແຕ່ເຖິງຢ່າງໃດກໍຕາມໄລຍະນີ້ ສະພາບອາກາດໃນ ປະເທດລາວເຮົາຍັງສືບຕໍ່ຮ້ອນອົບເອົ້າ. ຂະນະທີ່ບາງທ້ອງຖິ່ນກໍ່ຖືກພາຍຸພັດຜ່ານອັນໄດ້ສົ່ງຜົນກະທົບ ບໍ່ໜ້ອຍຕໍ່ພື້ນຖານໂຄງລ່າງ,ເຮືອນ ຊານບ້ານຊ່ອງ.ອາກາດຮ້ອນອົບເອົ້າແບບນີ້,ມື້ນີ້ຜູ້ຂຽນຂໍແນະນຳແຫລ່ງທ່ອງທ່ຽວທຳມະຊາດ ທີ່ຜູ້ປະກອບການໄດ້ລົງທຶນຊື້ຕູບມາຕ້ັງໄວ້ຢູ່ແຄມນ້ຳຄອຍບໍລິການນັກທ່ອງທ່ຽວເຂົ້າມາທ່ຽວ, ມາພັກຜ່ອນ,ເຊິ່ງແຫລ່ງທ່ອງທ່ຽວແຫ່ງນ້ີກໍແມ່ນຫາດຫົກນັ້ນເອງໂດຍຕັ້ງຢູ່ ເມືອງຫລາແຂວງອຸດົມໄຊ ທີ່ມີສາຍນ້ຳໃສເຢັນບວກໃສ່ທິວທັດທຳມະຊາດສວຍງາມທີ່ຍັງລໍຄອຍທ່ານໄປສຳພັດດ້ວຍຕົນເອງ.
ເມືອງຫລາແຂວງອຸດົມໄຊເປັນໜຶ່ງໃນ 7 ເມືອງຂອງແຂວງ ທັງເປັນເມືອງໜຶ່ງທີ່ໄດ້ຮັບຄວາມນິຍົມຂອງນັກທ່ອງທ່ຽວພາຍໃນ ແລະ ຕ່າງປະເທດ. ບໍ່ວ່າຈະເປັນແຫລ່ງທ່ອງທ່ຽວທຳມະຊາດ, ວັດທະນະທຳແລະຖືວ່າມີຫລາກຫລາຍແຫລ່ງທ່ອງທ່ຽວທີ່ໜ້າສົນໃຈ. ຫາດຫົກ ເປັນອີກໜຶ່ງສະຖານທີ່ທ່ອງທ່ຽວທຳມະຊາດທີ່ສວຍງາມເຊິ່ງຫລາຍທ່ານຄົງໄດ້ໄປຮອດໄປເຖິງມາແລ້ວ ແລະ ກໍເຊື່ອວ່າຍັງມີຫລາຍໆທ່ານຍັງບໍ່ທັນໄດ້ໄປສຳພັດການບໍລິການແຂກກໍຄືນັກທ່ອງທ່ຽວມີຄືແນວໃດ?ດັ່ງນັ້ນ,ຈະພາທ່ານໄປຮູ້ຈັກກັບຜູ້ປະກອບການຢູ່ຫາດຫົກແຫ່ງ ນີ້ນຳກັນເລີຍ.ທ່ານນາງຫລ້າສີລາພອນເຈົ້າ ຂອງຮ້ານຕູບຫາດຫົກເລົ່າສູ່ຟັງ ວ່າ:ສຳລັບຄວາມເປັນມາຂອງຫາດ ຫົກໂດຍເລີ່ມແຕ່ປີ2021ເປັນຕົ້ນມາແມ່ນໄດ້ເປີດບໍລິການໃຫ້ແຂກ ຫລືນັກທ່ອງທ່ຽວເຂົ້າມາທ່ຽວຊົມ, ມາສຳພັດກັບທິວທັດທຳມາດ,ອາບນ້ຳ,ມາພັກກຜ່ອນຢ່ອນອາລົມກັບອາກາດບໍລິສຸດສົດຊື່ນເຊິ່ງການບໍລິການກໍມີຕູບຕັ້ງຕາມແຄມນ້ຳ ເພື່ອໃຫ້ນັກທ່ອງທ່ຽວໄດ້ນັ່ງຊົມທຳມະຊາດ,ກິນ-ດື່ມ,ພັກຜ່ອນໂດຍທາງ ຮ້ານກໍມີອາຫານຕາມສັ່ງເຊິ່ງກໍມີອາຫານພິເສດທຳມະຊາດຂອງທ້ອງຖິ່ນຕື່ມອີກ ນັ້ນກໍຄືປິ້ງປານ້ຳທາກ ແລະ ຈືນ,ທອດແມງໄມ້ຕາມລະດູການ.
ຂະນະທີ່ລະດູໜາວກໍແມ່ນມົກໄຄ ຕິດພັນກັບສິ່ງທີ່ຂາດບໍ່ໄດ້ນັ້ນກໍແມ່ນສົ້ມຜັກກຸ່ມ. ຂະນະທີ່ແຂກ ທີ່ມາທ່ຽວມີກໍສາມາດເອົາອາຫານຂອງຕົນເອງມາແຕ່ງກິນກໍໄດ້ພຽງແຕ່ເສຍຄ່າບໍລິການເລັກໆໜ້ອຍໆ ໃຫ້ທາງຮ້ານເທົ່ານັ້ນ.ນອກຈາກນີ້, ການບໍລິການຂອງຮ້ານກໍຍັງສາມາດຮອງຮັບແຂກທີ່ມາເປັນທັງຄອບຄົວ,ມາເປັນທິມງານ,ພະນັກງານຫ້ອງການມາເປັນທິມກໍສາມາດຮອງຮັບໄດ້.ນອກຈາກທີ່ກ່າວມານັ້ນແລ້ວ, ທ່ານນາງຫລ້າສີອາພອນຍັງເລ່ົາຕື່ມວ່າ:ທາງຮ້ານເຮົາຍັງມີການບໍລິການເຊົ່າເຕັ້ນນອນຍາມກາງຄືນ ຄົບຊຸດຕື່ມອີກຫລືແຂກທີ່ສະດວກກໍສາມາດເອົາເຕັ້ມມາກາມເອງກໄດ້ ແລະ ນີ້ກໍແມ່ນພາບບັນຍາກາດຢູ່ຫາດຫົກຂອງເມືອງຫລາແຂວງອຸດົມໄຊທີ່ຍັງລໍຄອຍທ່ານຜູ້ມັກທ່ຽວຊົມທິວທັດທຳມະຊາດໄປສຳພັດດ້ວຍຕົວທ່ານເອງ.ແນວໃດກໍດີການທ່ອງທ່ຽວທາງທຳມະຊາດຈະໄດ້ຮັບຄວາມສົນໃຈ ຈາກນັກທ່ອງທ່ຽວກໍຕໍ່ເມື່ອທຳມະຊາດຢູ່ແຫ່ງນັ້ນໆໄດ້ຖືກປົກປັກຮັກສາໃຫ້ມີຄວາມອຸດົມສົມບູນໄປດ້ວຍປ່າໄມ້,ສັດສາວາສິ່ງຕ່າງໆ.ດັ່ງນັ້ນ, ພວກເຮົາຕ້ອງພ້ອມກັນເປັນເຈົ້າການຮ່ວມກັນຮັກສາ,ປ້ອງກັນທຳມະຊາດໃຫ້ຫລາຍຂຶ້ນໂດຍສະເພາະໄຟໄໝ້ລາມປ່າ,ການທຳລາຍປ່າໄມ້ຊະຊາຍ,ການລ່າເນື້ອແລະອື່ນໆ.
ໂດຍ:ເຂົ້າຈານນໍ້າ
KPL