* ສປປ ລາວໄດ້ຮັບການຍົກຍ້ອງ ແລະ ໄດ້ຮັບການຄັດເລືອກໃຫ້ເປັນປະເທດທີ່ດີສຸດໃນໂລກຄວນໄປຢ້ຽມຢາມ ແລະ ສໍາຜັດສໍາລັບປີ 2024. ອີງຕາມວາລະສານ ແລະ ເວັບໄຊຊີອີໂອສາກົນ (CEOworld) ໄດ້ເຜີຍແຜ່ຂໍ້ມູນສະຖິຕິໃນວັນທີ 15 ເມສາ 2024 ຜ່ານມານີ້ ໂດຍຕັ້ງຄໍາຖາມ ແລ ອະທິບາຍວ່າ: ມີທ່ານໃດບໍມັກຄວາມຄິດຂອງການສຳຫລວດສະຖານທີ່ໃໝ່ໆ ແລະ ພົບກັບຄົນໃໝ່? ພວກເຮົາໝັ້ນໃຈວ່າທຸກຄົນທ່ີເຮັດ, ການເລືອກປາຍທາງຂອງເຂົາເຈ້ົາອາດຂ້ຶນກັບຄວາມມັກຂອງໃຜມັນເຊັ່ນວ່າ: ຫາດຊາຍ, ພູຜາປ່າດົງ, ປະຫວັດສາດ, ວັດທະນະທໍາ, ການຊື້ເຄື່ອງ ແລະ ອື່ນໆທີ່ແຕກຕ່າງກັນ ເຊິ່ງຂໍ້ມູນທັງໝົດເຫລົ່ານັ້ນ ເພື່ອຊ່ວຍທ່ານຕັດສິນໃຈເລືອກຈະໄປສໍາຜັດກ່ຽວກັບສະຖານທີ່ພັກຜ່ອນຕ່ໍໄປຂອງທ່ານ ສະນ້ັນ ວາລະສານ ຊີອີໂອສາກົນ (CEOWORLD) ຈິ່ງໄດ້ລວບລວມບັນຊີລາຍຊື່ຂອງປະເທດທີ່ດີສຸດຈະໄປຢ້ຽມຢາມຄັ້ງໜຶ່ງໃນຊີວິດຂອງທ່ານ.

    ບັນຊີລາຍຊື່ດັ່ງກ່າວມານັ້ນປະກອບມີຫລາຍສະຖານທີ່ທ່ອງທ່ຽວ ແລະ ການຈັດອັນດັບແມ່ນອີງໃສ່ຄໍາຄິດເຫັນຂອງຜູ້ອ່ານຫລາຍກວ່າ 295.000 ຄົນ ເພື່ອເຮັດໃຫ້ຄົນມີ ສ່ວນຮ່ວມໃນການສໍາຫລວດຂໍ້ມູນ ອອກມາໄດ້ຮັບຜົນດີສຸດ. ສະເພາະ ສປປ ລາວ ແມ່ນໜຶ່ງ ໃນບັນດາ 10 ປະເທດສະມາຊິກອາຊຽນ, ກັບປະຊາກອນມີພຽງ 7 ລ້ານກວ່າຄົນ ເຊິ່ງປະເທດບໍ່ມີຊາຍແດນດ້ານໃດຕິດຈອດກັບທະເລ ແຕ່ເຕັມໄປດ້ວຍສິ່ງມະຫັດສະຈັນ ແລະ ໜ້າຄົ້ນຫາທີ່ຕ່ືນເຕ້ັນສໍາລັບການທ່ອງທ່ຽວດ້ານທໍາມະຊາດ, ປະຫວັດສາດ, ວັດທະນະທໍາ ແລະ ວິຖີຊີວິດຂອງຄົນລາວ ຍັງຕິດພັນກັບທໍາມະຊາດ ນອກຈາກນັ້ນຍັງມີແຫລ່ງມໍລະດົກໂລກທີ່ຄວນໄປສໍາຜັດດ້ວຍຕາເຊັ່ນ: ມໍລະດົກໂລກຫລວງພະບາງ, ຜາສາດຫີນວັດພູຈໍາປາສັກ, ທົ່ງໄຫຫີນຊຽງຂວາງ.

   ພ້ອມດຽວກັນນັ້ນບັນຫາພື້ນຖານໂຄງລ່າງເສັ້ນທາງລົດໄຟ, ເຮືອນພັກ, ໂຮງແຮມ ແລະ ອື່ນໆທີ່ມີມາດຕະຖານສາມາດເອື້ອອໍານວຍຄວາມສະດວກສະບາຍ, ມີຄວາມປອດໄພ ແລະ ສະຫງົບດີໃຫ້ນັກທ່ອງທ່ຽວສາມາດເດີນທາງໄປມາໄດ້ໂດຍປັດສະຈາກຄວາມກັງວົນ; ແລະ ສິ່ງສໍາຄັນໜຶ່ງປະຊາຊົນລາວບັນດາເຜົ່າ ແຕ່ເໜືອຮອດໃຕ້ມີນິໃສຍິ້ມແຍ້ມແຈມໃສ ແລະ ເປັນມິດຕໍ່ແຂກຄົນ. ດ້ວຍຫລາຍປັດໃຈຕ່າງໆກ່ຽວພັນກັນນັ້ນເຮັດໃຫ້ວາລະສານຊີອີໂອສາກົນໄດ້ຈັດອັນດັບ ແລະ ຄັດເລືອກເອົາປະເທດທີ່ທ່າແຮງບົ່ມຊ້ອນໃຫ້ເປັນປະເທດທີ່ດີສຸດໃນໂລກຄວນໄປຢ້ຽມຢາມ ແລະ ສໍາຜັດສໍາລັບປີ 2024 ເຊິ່ງ ສປປ ລາວ ແມ່ນຕິດໃນອັນດັບທີ 5 ໃນອາຊຽນ ໂດຍຮອງຈາກໄທ, ອິນໂດເນເຊຍ,  ຟິລິບປິນ, ຫວຽດນາມ ແລະ ເປັນອັນດັບທີ 53 ໃນໂລກ.

ໂດຍ: ເກີດຂວັນໃຈ ມາລີຈັນສີ

KPL