*ສປປ ລາວ ອາດຕິດໜຶ່ງໃນ 4 ຂອງ 10 ປະເທດສະມາຊິກອາຊຽນ ທີ່ມີທ່າອ່ຽງຈະສົ່ງອອກໝາກຖົ່ວລຽນຫລາຍທີ່ສຸດໃນອະນາຄົດອັນໃກ້, ກະຊວງກະສິກໍາ ແລະ ປ່າໄມ້ໄດ້ເປີດເຜີຍຜົນສໍາຫລວດການນໍາໃຊ້ເນື້ອທີ່ປູກໝາກຖົ່ວລຽນເພີ່ມຂຶ້ນ ແບບກ້າວກະໂດດ. ຕາມຂໍ້ມູນສະຖິຕິຂອງພະແນກກະສິກໍາ ແລະ ປ່າໄມ້ ໃນແຕ່ລະແຂວງໄດ້ເປີດເຜີຍວ່າປັດຈຸບັນນ້ີທົ່ວປະເທດລາວມີຜູ້ປະກອບການທັງຄົນລາວ ແລະ ຕ່າງປະເທດປູກຖົ່ວລຽນກວມເອົາເນື້ອທີ່ຢ່າງໜ້ອຍ 3 ພັນກວ່າເຮັກຕາ ໃນນັ້ນມີລາວ, ຫວຽດນາມ ແລະ ຈີນ ໂດຍສ່ວນໃຫຍ່ແມ່ນປູກໃນເຂດພາກກາງ ແລະ ພາກໃຕ້ຂອງລາວເຊັ່ນ: ແຂວງບໍລິຄໍາ, ຈໍາປາສັກ, ສາລະວັນ, ເຊກອງ, ອັດຕະປື ແລະ ແຂວງອື່ນໆ.

     ປັດຈຸບັນ ນີ້, ທ່າອ່ຽງການປູກຢາງພາລາຄ່ອຍຫລຸດໜ້ອຍຖອຍລົງແລ້ວເພາະມັນໃຫ້ຜົນຜະລິດໄລຍະຍາວ ແລະ ໃຊ້ເຄມີຂ້ອນຂ້າງຫລາຍ, ສ່ວນມັນຕົ້ນຍັງເປັນສິນຄ້າກະສິກໍາໄດ້ຮັບຄວາມນິຍົມເປັນອັນດັບທີ 1 ສໍາລັບຊາວລາວ ແຕ່ກໍມີຜົນກະທົບເຊັ່ນກັນ ເຮັດໃຫ້ດິນເສື່ອມຄຸນນະພາບໄວ.ເຖິງຢ່າງໃດກໍດີຕະຫລາດຮອງຮັບຜົນຜະລິດກະສິກໍາເຊັ່ນ: ມັນຕົ້ນນັ້ນຍັງແມ່ນຕະຫລາດຈີນ, ຫວຽດນາມ ແລະ ໄທ ສ່ວນຕະຫລາດຮອງຮັບຜົນຜະລິດໝາກຖົ່ວລຽນນັ້ນຄື ສປ ຈີນ ເປັນຕະຫລາດໃຫຍ່.ຫລ້າສຸດກະຊວງອຸດສາຫະກໍາ ແລະ ການຄ້າໄດ້ລາຍງານວ່າ: ມູນຄ່າການສົ່ງອອກສິນຄ້າທັງໝົດ ປະຕິບັດໄດ້ປະມານ 594 ລ້ານໂດລາສະຫະລັດ, ເພີ່ມຂຶ້ນ 12%  ທຽບໃສ່ເດືອນກຸມພາຜ່ານມາ. ໃນນີ້, ສິນຄ້າສົ່ງອອກຫລັກປະກອບມີ: ມັນຕົ້ນ 78 ລ້ານໂດລາສະຫະລັດ; ຄໍາປະສົມ, ຄຳແທ່ງ 56 ລ້ານໂດລາສະຫະລັດ; ແຮ່ທອງ 51 ລ້ານໂດລາສະຫະລັດ; ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ 33 ລ້ານໂດລາສະຫະລັດ; ແປ້ງມັນຕົ້ນ 31 ລ້ານໂດລາສະຫະລັດ; ຢາງພາລາ 24 ລ້ານໂດລາສະຫະລັດ; ເຍື່ອໄມ້ ແລະ ເສດເຈ້ຍ 24 ລ້ານໂດລາສະຫະລັດ; ແລະ ນໍ້າຕານ 23 ລ້ານໂດລາສະຫະລັດ.ສ່ວນສິນຄ້ານໍາເຂົ້າຕົ້ນຕໍ: ມູນຄ່າການນຳເຂົ້າສິນຄ້າທັງໝົດ ປະຕິບັດໄດ້ ປະມານ 675 ລ້ານໂດລາສະຫະລັດ, ເພີ່ມຂຶ້ນ 18% ທຽບໃສ່ເດືອນກຸມພາຜ່ານມາ. ໃນນີ້, ສິນຄ້ານໍາເຂົ້າຫລັກປະກອບມີ: ນ້ຳມັນກາຊວນ 105 ລ້ານໂດລາສະຫະລັດ; ພາຫະນະທາງບົກ (ນອກຈາກລົດຈັກ, ລົດໄຖ) 56 ລ້ານໂດລາສະຫະລັດ; ອຸປະກອນກົນຈັກ (ນອກຈາກເຄື່ອງກົນຈັກພາຫະນະ) 53 ລ້ານໂດລາສະຫະລັດ; ເຄ່ືອງໄຟຟ້າ ແລະ ອຸປະກອນໄຟຟ້າ 38 ລ້ານໂດລາສະຫະລັດ; ເຫລັກ ແລະ ເຄື່ອງເຮັດດ້ວຍເຫລັກ, ເຫລັກກ້າ 37 ລ້ານໂດລາສະຫະລັດ; ຊິ້ນສ່ວນອໄຫລ່ລົດ (ລວມທັງຢາງ, ແວ່ນ, ໂສ້...) 25 ລ້ານໂດລາສະຫະລັດ; ນໍ້າມັນແອັດຊັງ-ແອັດຊັງພິເສດ 24 ລ້ານໂດລາສະຫະລັດ; ເຄື່ອງ ໃຊ້ທີ່ເຮັດດ້ວຍປາລາສຕິກ 24 ລ້ານໂດລາສະຫະລັດ; ຜະລິດຕະພັນເຄມີປະສົມສໍາເລັດຮູບ 15 ລ້ານໂດລາສະຫະລັດ ແລະ ອາລູມີນຽມ ແລະ ເຄື່ອງທີ່ເຮັດດ້ວຍອາລູມີນຽມ 4 ລ້ານໂດລາສະຫະລັດ.ປະເທດສົ່ງອອກຕົ້ນຕໍ 5 ອັນດັບ: ປະເທດ ທີ່ ສປປ ລາວ ສົ່ງອອກ ຫລາຍ 5 ອັນດັບປະກອບມີ: ຈີນ ປະມານ 206 ລ້ານໂດລາສະຫະລັດ, ໄທ ປະມານ 152 ລ້ານໂດລາ ສະຫະລັດ, ຫວຽດນາມ ປະມານ 125 ລ້ານໂດລາສະຫະລັດ, ອົດສະ ຕາລີ ປະມານ 38 ລ້ານ ໂດລາສະ ຫະລັດ ແລະ   ອາເມລິກາ ປະມານ 11 ລ້ານໂດລາສະຫະລັດ.ປະເທດນໍາເຂົ້າຕົ້ນຕໍ 5 ອັນດັບ: ປະເທດ ທີ່ ສປປ ລາວ ນໍາເຂົ້າຫລາຍ 5 ອັນດັບປະກອບມີ: ໄທ ປະມານ 311 ລ້ານໂດລາສະຫະລັດ, ຈີນປະມານ 253 ລ້ານໂດລາສະຫະລັດ, ຫວຽດນາມ ປະມານ 38 ລ້ານ ໂດລາສະຫະລັດ, ອາເມລິກາ 20 ລ້ານໂດລາສະຫະລັດ ແລະ ຍີ່ປຸ່ນ ປະມານ 8 ລ້ານ ໂດລາສະຫະລັດ. 

   ມູນຄ່າການນໍາເຂົ້າ ແລະ ສົ່ງອອກ ປະຈໍາເດືອນ ມີນາ ປີ 2024 ແມ່ນຍັງບໍ່ລວມເອົາມູນຄ່າການນໍາເຂົ້າ ແລະ ສົ່ງອອກໄຟຟ້າ (ສໍາລັບມູນຄ່າການນຳເຂົ້າ ແລະ ສົ່ງອອກໄຟຟ້າ ພວກເຮົາຈະເອົາລົງພາຍຫລັງທີ່ເກັບກໍາຕົວເລກສະຖິຕິໄດຄົບຖ້ວນ ແລະ ຊັດເຈນແລ້ວ).ແຕ່ເຖິງແນວໃດກໍດີສິນຄ້າປະເພດກະສິກໍາຖືວ່າ ຍັງຄອງຕະຫລາດສົ່ງອອກເປັນສ່ວນໃຫຍ່ເປັນຕົ້ນສະບຽງອາຫານ, ສປປ ລາວຈະກາຍ ເປັນທາງຜ່ານການລໍາລຽງຂົນສົ່ງສິນຄ້າໂດຍຜ່ານເສັ້ນທາງລົດໄຟ ລາວ-ຈີນ ເຊິ່ງຈະກໍ່ໃຫ້ເກີດມີແລວເສດຖະກິດໃໝ່, ຜູ້ປະກອບການໃໝ່, ອຸດສາຫະກໍາໃໝ່ ແລະ ສະຖານທີ່ບໍລິການຕ່າງໆຕາມແລວເສັ້ນທາງລົດໄຟລະຫວ່າງ ລາວ, ຈີນ, ໄທ, ອາຊຽນ, ຕາເວັນອອກກາງ ແລະ ເອີຣົບໃນອະນາຄົດ.

ໂດຍ: ເກີດຂວັນໃຈ ມາລີຈັນສີ

KPL