*ນັກທ່ອງທ່ຽວພາຍໃນ ແລະ ຕ່າງປະເທດເລີ່ມຈອງເຮືອນພັກ, ໂຮງແຮມຢ່າງໜາແໜ້ນແລ້ວເພື່ອມາສະຫລອງບຸນປີໃໝ່ລາວ ໂດຍສ່ວນໃຫຍ່ແມ່ນັກທ່ອງທ່ຽວຈາກ ໄທ, ຈີນ, ອາເມລິກາ, ເອີຣົບ, ເກົາ ຫລີ ແລະ ຊາດອື່ນໆ ແລະ ຄາດວ່າໃນໄລຍະບຸນປີໃໝ່ລາວນີ້ຈະມີນັກທ່ອງທ່ຽວເຂົ້າມາຫລິ້ນເມືອງມໍລະດົກໂລກບໍ່ຕໍ່າກວ່າ 4 ແສນຄົນ.

    ພະແນກຖະແຫລງຂ່າວ,ວັດທະນະທໍາ ແລະ ທ່ອງທ່ຽວແຂວງ ໄດ້ລາຍງານຫວ່າງບໍ່ດົນມານີ້ວ່າ: ອໍານາດການປົກຄອງຂອງຕົນໄດ້ກະກຽມຄວາມພ້ອມຮອບດ້ານແລ້ວ ໂດຍສະເພາະໂຮງແຮມ, ເຮືອນພັກ, ຮ້ານອາຫານ, ບ່ອນຫົດສົ່ງ, ເສັ້ນທາງຍ່າງ, ທິດທາງບ່ອນແຫ່ນາງສັງຂານ, ສະ ຖານທີ່ບັນເທີງ ແລະ ອື່ນໆ, ຄາດວ່າໄລຍະບຸນປີໃໝ່ນີ້ຈະມີນັກທ່ອງທ່ຽວເຂົ້າມາຫລິ້ນພາຍໃນແຂວງບໍ່ຕໍ່າກວ່າ 4 ແສນຄົນ ເນື່ອງຈາກມີການລາຍງານຕົວເລກນັກທ່ອງທ່ຽວເຂົ້າຈັບຈອງຫ້ອງພັກເຫັນວ່າເລີ່ມໜາແໜ້ນຂຶ້ນນັບມື້ ແລະ ນັກທ່ອງທ່ຽວສ່ວນໃຫຍ່ແມ່ນຊາວໄທ, ຈີນ, ເອຣົບເດີນທາງຜ່ານເສັ້ນທາງລົດໄຟ ແລະ ເຮືອບິນ.ແນວໃດກໍດີບໍລິສັດທາງລົດໄຟ ລາວ-ຈີນ ຈຳກັດ ໄດ້ແຈ້ງວ່າເພື່ອອຳນວຍຄວາມສະດວກໃຫ້ແກ່ຜູ້ໂດຍສານ ແລະ ນັກທ່ອງທ່ຽວໃນການເດີນທາງຊ່ວງເທສະການປີໃຫມ່ລາວທີ່ຈະມາເຖິງ.

   ດ່ັງນ້ັນ, ບໍລິສັດທາງລົດໄຟລາວ-ຈີນ ຈຳກັດ ຈິ່ງໄດ້ເປີດຂາຍປີ້ລົດໄຟລ່ວງໜ້າເຖິງ 7 ມື້ ສຳລັບປີ້ວັນທີ 14-22 ເມສາ 2024. ນອກຈາກນ້ີ, ໃນບໍລິສັດທາງລົດໄຟລາວ-ຈີນ ຈຳກັດຍັງເປີດນຳໃຊ້ລົດໄຟ EMU ສອງຂະບວນຕໍ່ໃສ່ກັນໃນລະຫວ່າງວັນ ທີ 12-19 ເມສາ 2024 ສໍາລັບຖ້ຽວ C92/1 ແລະ C84/3 ໄປ-ກັບ ນະຄອນຫລວງວຽງຈັນ-ຫລວງພະບາງ ເພື່ອຕອບສະໜອງ ຄວາມຮຽກຮ້ອງຕ້ອງການໃນການເດີນທາງຂອງຜູ້ໂດຍສານຈຳນວນຫລວງຫລາຍ ໃນການເດີນທາງລະຫວ່າງສອງສະຖານີນີ້. ພ້ອມດຽວກັນນັ້ນ, ບໍລິສັດທາງລົດໄຟລາວ-ຈີນ ໄດ້ປັບຕາຕະລາງເດີນລົດບາງສະຖານີເພື່ອອຳນວຍຄວາມສະດວກໃນການເດີນທາງຂອງຜູ້ໂດຍສານຫລາຍຂຶ້ນ.

ໂດຍ: ເກີດຂວັນໃຈ ມາລີຈັນສີ

KPL