ນວ ສຳເລັດການຄັດເລືອກຕົວແທນ ນັກຮຽນເກັ່ງເຂົ້າຮ່ວມແຂ່ງຂັນລະດັບຊາດ

01/04/2024 15:09
Email Print 645
ຂປລ ຂປລ. ພະ​ແນ​ກສຶກສາ​ທິການ ​ແລະ ກິລາ ນະຄອນຫລວງວຽງຈັນ (ນວ) ສຳ​ເລັດ​ການ​ຄັດ​ເລືອກ​ຕົວ​ແທນ​ນັກຮຽນ​ເກັ່ງ ເຂົ້າຮ່ວມການສອບເສັງລະດັບຊາດ ໃນເດືອນເມສາ 2024.



ຂປລ. ພະ​ແນ​ກສຶກສາ​ທິການ ​ແລະ ກິລາ ນະຄອນຫລວງວຽງຈັນ (ນວ) ສຳ​ເລັດ​ການ​ຄັດ​ເລືອກ​ຕົວ​ແທນ​ນັກຮຽນ​ເກັ່ງ ເຂົ້າຮ່ວມການສອບເສັງລະດັບຊາດ ໃນເດືອນເມສາ
2024. ​ໃນ​ນັ້ນ, ຊັ້ນ ປ5 ວິຊາ ຄະນິດສາດ ໄດ້ອັນດັບທີ 1 ຈໍານວນ 2 ຄົນ ຄື: ທ້າວ ສອນມີໄຊ ແສງຄຳຢອງ ຈາກໂຮງຮຽນປະຖົມ ສິນໄຊ ແລະ ທ້າວ ໄຊຍະພອນ ຄົດສຸດີ ຈາກ​ໂຮງຮຽນປະຖົມປາຖະໜາ; ວິຊາພາສາລາວ ອັນດັບ 1 ນາງ ຫົງທອງ ອິນສິຊຽງລາຍ ຈາກ​ໂຮງຮຽນປະຖົມຊະນະພົນ ແລະ ວິຊາວິທະຍາສາດ ແລະ ສິ່ງແວດລ້ອມ ອັນດັບ 1 ນາງ ວານິດາ ອິນທະວົງ ຈາກ​ໂຮງຮຽນປະຖົມປາຖະໜາ. ສ່ວນຊັ້ນ ມ4 ວິຊາ ພາສາລາວ-ວັນນະຄະດີ ໄດ້ອັນດັບທີ 1 ນາງ ປາຢົງ ທ່າວເຈີດຈິງ, ວິຊາຄະນິດສາດ ​ແມ່ນນາງ ປາວີນາ ໄຊຍະເດດ ທັງສອງມາຈາກໂຮງຮຽນ ມສ ປາຖະໜາ, ວິຊາ ຟີຊິກສາດ ​ແມ່ນ ນາງ ສຸພະພອນ ສີສົມ ຫວັງ ຈາກ ມສ ວຽງຈັນ ແລະ ວິຊາ ເຄມີສາດ ນາງ ທິດາວັນ ໄຊຍະສຸກ ຈາກ ມສ ພອນສະຫວັນ ຊົນເຜົ່າ ​ແລະ ຊັ້ນ ມ7 ວິຊາ ພາສາລາວ-ວັນນະຄະດີ ໄດ້ອັນດັບທີ 1 ທ້າວ ທະວີຊັບ ຈັນທະສັກ  ຈາກ ມສ ພອນສະຫວັນ-ຊົນເຜົ່າ, ວິຊາຄະນິດສາດ  ທ້າວ ລັດຕະນະໄຕສັນ ແກ້ວດາລາ ແລະ ວິຊາ ຟີຊິກສາດ ທ້າວ ໂພພິທັກ ໄພສານ ທັງສອງມາຈາກ ມສ ວຽງຈັນ ແລະ ວິຊາເຄມີສາດ ທ້າວ ອານຸພາບ ລາດຊະວົງ ຈາກ ມສ ພອນສະຫວັນ.




ພິທີສະຫລຸບການສອບເສັງແຂ່ງຂັນນັກຮຽນເກັ່ງ ຂັ້ນນະຄອນຫລວງວຽງຈັນ (ນວ) ຈັດຂຶ້ນວັນທີ
29 ມີນາ 2024 ຜ່ານ​ມາ ໂດຍມີ ທ່ານ ສົມພອນ ສອນດາລາ ຫົວໜ້າພະແນກສຶກສາທິ ການ ແລະ ກິລາ ນວ, ມີຄະນະຜູ້ບໍລິຫານການສຶກສາ, ຜູ້ອຳນວຍໂຮງຮຽນ, ພ້ອມດ້ວຍຄູ-ອາຈານ ພໍ່ແມ່ຜູ້ປົກ ຄອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

​ໃນ​ພິທີ, ທ່ານ ຂັນໄຊ ແສງສຸນີ ຫົວໜ້າຂະແໜງສາມັນ ພະແນກສຶກສາທິການ ແລະ ກິລາ ນວ ໄດ້ລາຍງານຜົນການສອບເສັງນັກຮຽນເກັ່ງລະດັບ ນວ ສົກຮຽນ 2023-2024 ວ່າ: ການແຂ່ງຂັນໄດ້ກໍານົດວິທີການ ແລະ ຂັ້ນຕອນເປັນ 3 ຂັ້ນ ແຂ່ງຂັນລະດັບໂຮງຮຽນ ໄດ້ເລີ່ມແຂ່ງຂັນນັບແຕ່ເດືອນ ທັນວາ 2023, ລະດັບເມືອງ ໄດ້ມອບໃຫ້ຫ້ອງການສຶກສາທິການ ແລະ ກິລາ ເມືອງ ເປັນຜູ້ຈັດຕັ້ງສອບເສັງຫົດບົດສອບເສັງ ຊັ້ນ ປ5, ມ4 ແລະ ມ7 ແມ່ນພະແນກສຶກສາທິການ ແລະ ກິລາ ນວ ສອບເສັງເອກະພາບກັນທົ່ວ ນວ ສຳເລັດໃນວັນທີ 9 ກຸມພາ 2024. ພາຍຫລັງສອບເສັງຄັດເລືອກຂັ້ນເມືອງແລ້ວ, ຫ້ອງການສຶກສາທິການ ແລະ ກິລາ ເມືອງ ໄດ້ຄັດເລືອກນັກຮຽນ ເພື່ອເປັນຕົວແທນເຂົ້າຮ່ວມການສອບເສັງຂັ້ນ ນວ ວິຊາລະ 5 ນ້ອງ ​ໂດຍອີງຕາມສະພາບຄວາມເປັນຈິງຂອງແຕ່ລະເມືອງ ແຂ່ງຂັນລະດັບ ນວ (ຮອບຊີງຊະນະເລີດ) ໄດ້ຈັດການສອບເສັງຂຶ້ນ ໂດຍມີນັກຮຽນສອບເສັງທັງໝົດ 665 ຄົນ, ຍິງ 357 ຄົນ, ຈັດເປັນ 26 ຫ້ອງ, ສອບເສັງໃນວັນທີ 1 ມີນາ 2024 ທີ່ ໂຮງຮຽນ ມ ປາຍ ມິດຕະພາບວຽງຈັນ-ໂຮຈິມິງ.

KPL

ຂ່າວອື່ນໆ

ads
ads

Top