ຂປລ
ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ວັນທີ 26 ມີນາ ຜ່ານມາ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ຕ້ອນຮັບ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ພ້ອມຄະນະ ໃນໂອກາດມາເຄື່ອນໄຫວຢ້ຽມຢາມ
ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ວັນທີ 26 ມີນາ ຜ່ານມາ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ຕ້ອນຮັບ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ພ້ອມຄະນະ ໃນໂອກາດມາເຄື່ອນໄຫວຢ້ຽມຢາມ, ຕິດຕາມ ແລະ ຊຸກຍູ້ວຽກງານຂົງເຂດໄອຍະການ ຢູ່ແຂວງເຊກອງ.
ໂອກາດນີ້, ທ່ານ ເຫລັກໄຫລ ສີວິໄລ ໄດ້ກ່າວຕ້ອນຮັບ ແລະ ຕີລາຄາສູງຕໍ່ການມາເຄື່ອນໄຫວເຮັດວຽກຢູ່ແຂວງເຊກອງ ຂອງຫົວໜ້າອົງການໄອຍະການປະຊາຊົນສູງສຸດ ຄັ້ງນີ້, ເປັນການຮັດແໜ້ນຄວາມສາມັກຄີ ລະຫວ່າງ ແຂວງເຊກອງ ກັບອົງການໄອຍະການປະຊາຊົນສູງສຸດ ໃຫ້ນັບມື້ແໜ້ນແຟ້ນຍິ່ງຂຶ້ນ. ພ້ອມນີ້, ຍັງໄດ້ລາຍງານຜົນສໍາເລັດການເຄື່ອນໄຫວວຽກງານໄອຍະການ ໃນໄລຍະຜ່ານມາ ພ້ອມທັງສະເໜີໃຫ້ອົງການໄອຍະການປະຊາຊົນສູງສຸດ ສືບຕໍ່ນໍາພາ-ຊີ້ນໍາ ແລະ ສ້າງຄວາມເຂັ້ມແຂງ, ຄວາມຮູ້ຄວາມສາມາດດ້ານກົດໝາຍ, ຍົກລະດັບດ້ານວິຊາການ ໂດຍສະເພາະວຽກງານການຄຸ້ມຄອງຕິດຕາມກວດກາ, ວຽກງານສືບສວນ-ສອບສວນ, ການສັ່ງຟ້ອງຜູ້ຖືກຫາ ແລະ ວຽກງານຈັດຕັ້ງປະຕິ ບັດຄໍາຕັດສິນຂອງສານໃຫ້ມີປະສິດທິພາບ, ປະສິດທິຜົນ, ໂປ່ງໃສ, ຮັບປະກັນຄວາມຍຸຕິທໍາ ເພື່ອເຮັດໃຫ້ສັງຄົມມີຄວາມສະຫງົບສຸກ.
ພ້ອມກັນນີ້, ທ່ານ ໄຊຊະນະ ໂຄດພູທອນ ໄດ້ແຈ້ງຈຸດປະສົງມາເຄື່ອນໄຫວວຽກ ແລະ ເຂົ້າພົບການນໍາຂອງແຂວງເຊກອງຄັ້ງນີ້ ເພື່ອເປັນການຕິດຕາມ, ຊຸກຍູ້ວຽກງານວິຊາສະເພາະຂົງເຂດໄອຍະການ ແລະ ສະແດງຄວາມຂອບໃຈຕໍ່ການນໍາແຂວງ ທີ່ໄດ້ເອົາໃຈໃສ່ນໍາພາ-ຊີ້ນໍາ ເຮັດໃຫ້ການເຄື່ອນໄຫວວຽກງານຕ່າງໆ ຂອງອົງການໄອຍະການປະຊາຊົນ ມີຜົນສໍາເລັດຫລາຍດ້ານທີ່ພົ້ນເດັ່ນ. ພ້ອມນີ້, ຍັງສະເໜີໃຫ້ການນໍາແຂວງຈັດຫາບ່ອນເຮັດວຽກ (ຫ້ອງການອົງການໄອຍະການເຂດ); ປະກາດສ້າງຕັ້ງອົງການໄອຍະການເຂດ ແລະ ຈັດແບ່ງພະນັກງານ-ລັດຖະກອນ ທີ່ມີຄວາມຮູ້ທາງດ້ານກົດໝາຍບັນຈຸສັບຊ້ອນເຂົ້າໃນຕໍາແໜ່ງງານຕ່າງໆຂອງ ອົງການໄອຍະການເຂດ ຕາມຄວາມເໝາະສົມ ແນໃສ່ພັດທະ ນາວຽກງານອົງການໄອຍະການປະຊາຊົນ ໃຫ້ເຕີບໃຫຍ່, ເຂັ້ມແຂງ ແລະ ປະຊາຊົນໄດ້ເຂົ້າເຖິງຂະບວນການຍຸຕິທໍາຫລາຍຂຶ້ນ.
ຂ່າວ-ພາບ: ສັນຍາ
KPL
