ຂປລ
ຂປລ. ສາຍການບິນຫວຽດເຈັດ (Vietjet) ຂອງຫວຽດນາມ ຈະຂະຫຍາຍຖ້ຽວບິນກົງ ທີ່ເຊື່ອມຕໍ່ນະຄອນ ຫລວງຮ່າໂນ້ຍ ຂອງຫວຽດນາມ ຫາ ຮີໂຣຊີມາ ຂອງຢີ່ປຸ່ນ ແລະ ເມວເບີນ ຂອງອົດສະຕຣາລີ.
ຂປລ. ສາຍການບິນຫວຽດເຈັດ (Vietjet) ຂອງຫວຽດນາມ ຈະຂະຫຍາຍຖ້ຽວບິນກົງ ທີ່ເຊື່ອມຕໍ່ນະຄອນ ຫລວງຮ່າໂນ້ຍ ຂອງຫວຽດນາມ ຫາ ຮີໂຣຊີມາຂອງຢີ່ປຸ່ນ ແລະ ເມວເບີນ ຂອງອົດສະຕຣາລີ. ເສັ້ນທາງບິນກົງໃໝ່ນີ້ ຈະບໍລິການລູກຄ້າ ຢ່າງສະດວກສະບາຍ ແລະ ໃນລາຄາປະຢັດ, ທັງຊ່ວຍຕອບສະໜອງຄວາມຕ້ອງການໃນການເດີນທາງທີ່ເພີ່ມຂຶ້ນໃນທົ່ວພາກພື້ນ.
ພິທີເປີດເສັ້ນທາງບິນໃໝ່ໄດ້ຈັດຂຶ້ນໃນວັນທີ 07 ມີນາ 2024 ນີ້ ໂດຍມີທ່ານ ຟາມມິງ ນາຍົກລັດຖະມົນຕີຫວຽດນາມ ແລະ ການນຳທັງສອງປະເທດເຂົ້າຮ່ວມ. ເສັ້ນທາງບິນ ຮ່າໂນ້ຍ - ເມວເບີນ ຈະເລີ່ມໃຫ້ບໍລິການໃນວັນທີ 03 ມິຖຸນາ 2024, ອອກບິນອາທິດລະ 2 ຄັ້ງ ຄືວັນຈັນ ແລະ ວັນສຸກ ຈາກຮ່າໂນ້ຍ ຫາ ເມວເບີນໃນມື້ດຽວກັນ. ຖ້ຽວບິນຂາກັບອອກຈາກນະຄອນເມວເບິນໃນວັນອັງຄານ ແລະ ວັນເສົາ. ປັດຈຸບັນສາຍການບິນ Vietjet ມີຖ້ຽວບິນລະຫວ່າງ ຫວຽດນາມ ແລະ ອົດສະຕຣາລີ ຫລາຍກວ່າ 58 ຖ້ຽວຕໍ່ອາທິດ ໂດຍເຊື່ອມຕໍ່ການເດີນທາງລະຫວ່າງ ນະຄອນໂຮ່ຈີມິນ ແລະ 5 ເມືອງໃຫຍ່ຂອງອົດສະຕຣາລີ ຄື: Melbourne, Sydney, Brisbane, Perth ແລະ Adelaide, ໂດຍນຳໃຊ້ເຮືອບິນທີ່ທັນສະໄໝລະດັບໂລກ ເຊັ່ນ: A330 ແລະ A321.
ພ້ອມດຽວກັນ ສາຍການບິນ Vietjet ຈະເປີດຖ້ຽວບິນໂດຍກົງລະຫວ່າງຮ່າໂນ້ຍ ແລະ ຮີໂຣຊີມາເລີ່ມແຕ່ວັນທີ 12 ພຶດສະພາ 2024. ຖ້ຽວບິນໃໝ່ນີ້ແມ່ນເປັນເສັ້ນທາງການບິນກົງທຳອິດຈາກເຂດ Chugoku ແລະ Shikoku ໄປຫວຽດນາມ. ເສັ້ນທາງ ຮ່າໂນ້ຍ - ຮິໂຣຊິີມາ ຈະບິນກັບອາທິດລະ 2 ຄັ້ງໃນວັນພະຫັດ ແລະ ວັນອາທິດ, ໃຊ້ເວລາປະມານ 4 ຊົ່ວໂມງ 30 ນາທີ. ການເປີດຖ້ຽວບິນກົງໃໝ່ນີ້ເເປັນການເພີ່ມຖ້ຽວບິນຂອງຫວຽດນາມ ແລະ ຍິປຸ່ນ ເປັນ 8 ຖ້ຽວບິນກົງ ໂດຍເຊື່ອມຕໍ່ບັນດາເມືອງໃຫຍ່ທີ່ສຸດຂອງຫວຽດນາມ ຄື: ຮ່າໂນ້ຍ ແລະ ນະຄອນໂຮ່ຈີມິນ ກັບບັນດາເມືອງໃຫຍ່ຂອງ ຍີ່ປຸ່ນ ເຊັ່ນ: ໂຕກຽວ, ໂອຊາກາ, ນາໂກຢາ, ຟູກຸໂອກະແລະ ຮີໂຣຊີມາ.
ເພື່ອສະເຫລີມສະຫລອງຖ້ຽວບິນໃໝ່, ສາຍການບິນ Vietjet ມອບປີ້ຍົນລາຄາປະຢັດເລີ່ມຕົ້ນພຽງແຕ່ 0 ໂດລາເທົ່ານັ້ນ (ບໍ່ລວມພາສີ ແລະ ຄ່າທຳນຽມ) ຕິດຕາມຂໍ້ມູນລະອຽດໄດ້ທີ່ເວັບໄຊ www.vietjetair.com ແລະ ແອັບມືຖື Vietjet Air, ນຳໃຊ້ໄດ້ທຸກເສັ້ນທາງຕ່າງປະເທດຂອງ ສາຍການບິນ Vietjet ໂດຍມີລາຄາພິເສດໃຫ້ຈັບຈອງໄດ້ທຸກວັນສຸກຕັ້ງແຕ່ວັນທີ 8 ມີນາ 2024, ເດີນທາງຕັ້ງແຕ່ວັນທີ 08 ມີນາ ຫາ 31 ທັນວາ 2024 (ບໍ່ລວມວັນພັກແລະ ລະດູການທ່ອງທ່ຽວ). ຈາກຮ່າໂນ້ຍນັກທ່ອງທ່ຽວສາມາດເດີນທາງໄປເມືຶອງອື່ນໆຂອງປະເທດໄດ້ຢ່າງສະດວກສະບາຍ ບໍ່ວ່າຈະເປັນ ເຫ້ວ, ດ່າໜັງ, ນະຄອນໂຮ່ຈິມິນ, ຍາຈາງ, ຟູກກວັກ ແລະ ສະຖານທີ່ທ່ອງທ່ຽວອີກຫລາຍແຫ່ງ. ພິເສດແມ່ນເສັ້ນທາງໃໝ່ທີ່ເຊື່ອມຕໍ່ວຽງຈັນ-ໂຮ່ຈິມິນ, ທີ່ຊ່ວຍສ້າງໂອກາດໃຫ້ນັກເດີນທາງທີ່ມີແຜນຈະເດີນທາງສາມາດເຊື່ອມຕໍ່ບັນດາຈຸດໝາຍປາຍທາງໃນທົ່ວພາກພື້ນອາຊຽນ ແລະ ອາຊີ-ປາຊີຟິກ.
KPL
