ສຳຜັດຜາຈ້ອງເທິງພູເຂົ້າຄວາຍ

20/02/2024 09:29
Email Print 1656
ຂປລ ພະພຸດທະຮູບ ແລະ ຮອຍຕີນພະບາດທີ່ເຊື່ອງຊ້ອນໃນປ່າໄມ້ສົນ- ໄມ້ແປກນັບຫລາຍຮ້ອຍປີພວມກາຍເປັນແຫລ່ງທ່ອງທ່ຽວທ່ີໜ້າ ສົນໃຈ ສໍາລັບນັກທ່ອງທ່ຽວເພື່ອ ເຂົ້າໄປສໍາຜັດກັບຄວາມມະຫັດສະຈັນ.

     *ພະພຸດທະຮູບ ແລະ ຮອຍຕີນພະບາດທີ່ເຊື່ອງຊ້ອນໃນປ່າໄມ້ສົນ- ໄມ້ແປກນັບຫລາຍຮ້ອຍປີພວມກາຍເປັນແຫລ່ງທ່ອງທ່ຽວທ່ີໜ້າສົນໃຈ ສໍາລັບນັກທ່ອງທ່ຽວເພື່ອເຂົ້າໄປສໍາຜັດກັບຄວາມມະຫັດສະຈັນ. ເມື່ອບໍ່ດົນມານີ້, ນັກທ່ອງທ່ຽວໄດ້ພາກັນໄປຫລິ້ນຜາຈ້ອງ ຕັ້ງຢູ່ເທິງອຸທະຍານແຫ່ງຊາດ ພູເຂົາຄວາຍ ເປັນອີກໜຶ່ງຈຸດຊົມວິວທີ່ກໍາລັງລໍຖ້າທ່ານ ແລະ ເຂົ້າໄປຄົ້ນຫາຄວາມງົດງາມທີ່ທໍາມະຊາດສ້າງຂຶ້ນເອງ. ການຂ້ຶນໄປຊົມຄວາມສວຍງາມຂອງພາບທໍາມະຊາດ, ພະພຸດທະຮູບ ແລະ ປ່າໄມ້ສົນຢູ່ເທີງຜາຈ້ອງ ແມ່ນຈະຂຶ້ນໄປໄດ້ສະເພາະໃນໄລ ຍະລະດູແລ້ງ, ຈຸດເດີນທາງຖ້າຂຶ້ນ ໃກ້ບໍລິເວນວັດເທບພະວົງ ພູເຂົາຄວາຍ ຈະໃຊ້ເວລາຂຶ້ນ ປະມານ 2 ຊົ່ວໂມງ ແຕ່ຕ້ອງຍ່າງ ແລະ ຜ່ານ ຜາຫີນ, ສໍາລັບກຸ່ມນັກທ່ອງທ່ຽວ ໃໝ່ ອາດໃຊ້ເວລາປະມານ 4-5 ຊົ່ວໂມງກໍ່ເປັນໄດ້. ລະດັບຄວາມຍາກຂອງການຍ່າງຂຶ້ນພູ: ປານກາງ-ຍາກ ລະຫວ່າງທາງຍ່າງຂຶ້ນ ທ່ານຈະຜ່ານ 4 ເຂດ: ເຂດປ່າດົງດິບ, ເຂດພູຄ້ອຍຊັນ, ເຂດປ່າໂຄກ (ໄມ້ແປກ) ແລະ ເຂດປ່າພະລານຫີນ.

     ຄໍາມີບ່ອນວ່າທ່ານຈະໄປເບິ່ງຫຍັງ? ຕອບທີ່ໄດ້ໄປສໍາຜັດສິ່ງດັ່ ນີ້: ຕາເວັນຂຶ້ນ ແລະ ຕາເວັນຕົກດິນສວຍງາມຫລາຍ;  ໄປສໍາພັດໝອກ ແລະ ອາກາດເຢັນ; ໄປຕັ້ງເຕັ້ນນອນຢູ່ພະລານຫີນຫ; ໄປນະມັດສະການ ບູຊາພະພຸດທະຮູບຫລວງປູພຸດທະບາຣະມີ ຕັ້ງສູງເດັ່ນ ເປັນສະຫງ່າເທິງໂງ່ນຫີນ; ໄປເບິ່ງຮອຍພະບາດ; ໄປເບິ່ງວິວ ແລະ ແສງສີຂອງນະຄອນຫລວງວຽງຈັນ ໃນຍາມຄໍາຄືນ;  ໄປຟັງສຽງນົກສຽງແມງໄມ້ຮ້ອງມ່ວນຫູ; ໄປເລາະຊົມປ່າໂຄກ ແລະ ພະລານຫີນໃຫຍ່ ຮູບຊົງຫລາຍແບບແປກຕາ; ໄປນັ່ງສະມາທິສະ ຫງົບສະຕິອາລົມ ແລະ ອື່ນໆ ເນື່ອງຈາກເປັນເຂດອຸທະຍານແຫ່ງຊາດສໍາຄັນຢ່າງຍິ່ງ ສະນັ້ນພວກເຮົ ຄວນຊ່ວຍກັນປົກປັກຮັກສາປ່າໄມ້, ບໍ່ຖິ້ມຂີ້ເຫຍື້ອຊະຊາຍ, ບໍ່ຕັດເອົາເປືອກໄມ້ແປກມາດັງໄຟ, ບໍ່ຄວນຮ້ອງລໍາທໍາເພັງສ້າງສຽງດັງເກີນ, ບໍ່ຄວນນໍາເອົາເຄື່ອງປ່າຂອງດົງອອກມາເປັນຕົ້ນ.

     ສິ່ງສໍາຄັນການເດີນທາງຄວນມີຜູ້ນໍາທາງ ຫລື ຮູ້ທາງ ເພື່ອບໍ່ໃຫ້ຫລົງທາງ; ຄວນກຽມນໍ້າດື່ມ ແລະ ອາຫານໄປນໍາ ເພາະຢູ່ເທິງບໍ່ໃຫ້ຜູ້ໃຫ້ບໍລິການຄ້າຂາຍ ແລະ ແຫລ່ງນໍ້າຢ່າງພຽງພໍ. ຜາຈ້ອງແມ່ນໜຶ່ງໃນສະຖານທີ່ທ່ອງທ່ຽວສໍາຄັນໂດຍນາຍົກລັດຖະມົນຕີໄດ້ໄດ້ອອກດໍາລັດເລກທີ 733/ນຍ ລົງວັນທີ 30 ທັນວາ 2021 ວ່າດ້ວຍການສ້າງຕັ້ງອຸທິຍານແຫ່ງຊາດພູເຂົາຄວາຍ ເພື່ອຄຸ້ມຄອງ, ປົກປັກຮັກສາພູມສັນຖານທີ່ເປັນຜາຫີນສູງ ແລະ ຄຸ້ມຄອງຊີວະນາໆພັນຮວມທັງສັດປ່າ ແລະ ເຄື່ອງປ່າຂອງດົງ ທີ່ມີຄວາມສໍາຄັນທາງດ້ານການທ່ອງທ່ຽວຕາມທິດສີຂຽວ. ອຸທິຍານແຫ່ງຊາດພູເຂົາຄວາຍ ມີເນື້ອທີ່ເກືອບ 200,000 ເຮັກຕາ, ກວມເອົາພື້ນທີ່ສ່ວນໜຶ່ງຂອງເມືອງ ໄຊທານີ ແລະ ເມືອງປາກງື່ມ ນະຄອນຫລວງວຽງຈັນ ໃນເນື້ອທີ່ 22,000 ເຮັກຕາ, ຂອງເມືອງທຸລະຄົມ ແລະ ເມືອງແກ້ວອຸດົມ ແຂວງ ວຽງຈັນ ໃນເນື້ອທີ່ 38,000 ປາຍ ເຮັກຕາ, ຂອງເມືອງລ້ອງຊານ ແລະ ເມືອງຮົ່ມ ແຂວງໄຊສົມບູນ ໃນເນື້ອທີ່24,000 ປາຍເຮັກຕາ, ຂອງເມືອງທ່າພະບາດ ແຂວງບໍລິຄໍາໄຊ ໃນເນ້ືອທ່ີ 107,600 ປາຍເຮັກຕາ.

ໂດຍ: ເກີດຂວັນໃຈ ມາລີຈັນສີ

KPL

ຂ່າວອື່ນໆ

ads
ads

Top