ຂປລ
ຂປລ. ໃນໂອກາດຕິດຕາມ ທ່ານນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ເດີນທາງຢ້ຽມຢາມ ສສ ຫວຽດນາມ ຢ່າງເປັນທາງການ ໃນລະຫວ່າງວັນທີ 6-7 ມັງກອນ 2024, ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ), ພ້ອມດ້ວຍຄະນະ ແລະ ນັກທຸລະກິດ ໄດ້ເຂົ້າຮ່ວມກອງປະຊຸມຮ່ວມມືລົງທຶນລາວ-ຫວຽດ
ຂປລ. ໃນໂອກາດຕິດຕາມ ທ່ານນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ເດີນທາງຢ້ຽມຢາມ ສສ ຫວຽດນາມ ຢ່າງເປັນທາງການ ໃນລະຫວ່າງວັນທີ 6-7 ມັງກອນ 2024, ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ), ພ້ອມດ້ວຍຄະນະ ແລະ ນັກທຸລະກິດ ໄດ້ເຂົ້າຮ່ວມກອງປະຊຸມຮ່ວມມືລົງທຶນລາວ-ຫວຽດ ໂດຍການເປັນປະທານຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປລາວ ແລະ ທ່ານ ຟ່າມ ມິງຈິງ ນາຍົກລັດຖະມົນຕີເເຫ່ງ ສສ. ຫວຽດນາມ
ໃນພາກບ່າຍຂອງວັນທີ 7 ມັງກອນ 2024, ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ຮ່ວມກັບ ສະມາຄົມນັກທຸລະກິດຫວຽດນາມ ຈັດງານ Lunch Networking ລະຫວ່າງນັກທຸລະ ກິດລາວ ແລະ ຫວຽດນາມ ຈຸດປະສົງເພື່ອພົບປະ ໂອ້ລົມແລກປ່ຽນ ດ້ານການດຳເນີນທຸລະກິດ ແລະ ເພື່ອເປັນການປຶກສາຫາລື ຊອກຫາຊ່ອງທາງ ຫລື ກາລະໂອກາດ ໃນການຮ່ວມທຸລະກິດຮ່ວມກັນ ໃຫ້ນັບມື້ນັບແໜ້ນແຟ້ນ, ເລິກເຊິ່ງ ແລະ ມີປະສິດທິຜົນ ໂດຍສະເພາະແມ່ນຂະແໜງການຄ້າ, ການລົງທຶນ, ໂລຈິສຕິກ, ພະລັງງານ-ບໍ່ແຮ່ ທ່ອງທ່ຽວ, ກະສິກຳ, ການບໍລິການ ແລະ ອື່ນໆ.
ໂອກາດນີ້, ທ່ານ ອຸເດດ ສຸວັນນະວົງ ປະທານ ສຄອຊ ໄດ້ມີຄໍາເຫັນສະເໜີໃຫ້ ທຸລະກິດທັງສອງຝ່າຍ ຮ່ວມມືກັນໃນຂະແໜງດັ່ງກ່າວ, ພ້ອມກັນພັດທະນາ ໂດຍຕ່າງຝ່າຍຕ່າງໄດ້ຮັບຜົນປະໂຫຍດ, ປະກອບສ່ວນສຳຄັນ ໃນການສ້າງເສດຖະກິດ-ສັງຄົມ ທັງສອງ ປະເທດໃຫ້ນັບມື້ ນັບຂະຫຍາຍຕົວ ເຊິ່ງ ສຄອຊ ຈະຊ່ວຍຊຸກຍູ້ສົ່ງເສີມ ອຳນວຍຄວາມສະດວກໃຫ້ແກ່ ຫົວໜ່ວຍທຸລະກິດຢ່າງເຕັມທີ່, ພ້ອມ ກັນນັ້ນກໍໄດ້ສະເໜີລັດຖະບານ ທັງສອງປະເທດ ຊ່ວຍສະໜັບສະໜູນ ທາງດ້ານນະໂຍບາຍຕ່າງໆ ເພື່ອເອື້ອອຳນວຍ ການດຳເນີນທຸລະກິດ ໃຫ້ປະກົດຜົນເປັນຈິງ ແລະ ມີປະສິດທິຜົນ.
ຂ່າວ: ສຄອຊ
KPL
