ຂປລ. ສຳນັກ​ຂ່າວ ​ເອ​ເອຟພີ ລາຍ​ງານ​ຈາກ ນະຄອນຫລວງ ​ແວນ​ລິງ​ຕັນ ປະ​ເທດ ນູ​ແວນ​ເຊ​ລັງ ​ເມື່ອ​ວັນ​ທີ 7 ທັນວາ​ ວ່າ: ​ແອຣ ນູ​ແວນ​ເຊ​ລັງ ຊຶ່ງ​ເປັນ ​ສາຍ​ການບິນ ​ແຫ່ງ​ຊາດ​ ຂອງ ນູ​ແວນ​ເຊ​ລັງ ໄດ້ສັ່ງ​ຊື້​ ເຮືອບິນ​ ໄຟຟ້າ “ອາ​ເລີຍ” (ALIA) ຈາກ ​ບໍລິສັດ ​ເບ​ຕາ ​ເຕັກ​ໂນ​ໂລ​ຊີ ຊຶ່ງ​ເປັນ​ ຜູ້​ຜະລິດ ດ້ານ​ການບິນ ​ແລະ ອາ​ວະ​ກາດ ​ໃນ​ສ.ອາ​ເມ​ລິ​ກາ.

​          ເຮືອບິນ​ລຳ​ດັ່ງກ່າວ ຄາດ​ວ່າ ​ຈະ​ເຂົ້າ​ຮ່ວມ ​ສາຍ​ການບິນ ​ແອຣ ນູ​ແວນ​ເຊ​ລັງ ​ໂດຍ​ໃນ​ເບື້ອງ​ຕົ້ນ ຈະ​ໃຫ້​ບໍລິການ ຂົນ​ສົ່ງ ພັດສະດຸ ​ແລະ ຈົດໝາຍ ພາຍ​ໃນ ​ປະ​ເທດ ພຽງ​ຢ່າງ​ດຽວ, ​ໂດຍ​ຜ່ານ​ ການ​ຮ່ວມ​ມື ກັບ​ ບໍລິສັດ​ໄປສະ​ນີ ນູ​ແວນ​ເຊ​ລັງ​ໂພສ. ໂດຍ​ຕັ້ງ​ເປົ້າ​ໝາຍ​ ຈະ​ເປັນ ​ສາຍ​ການບິນ ​ແຫ່ງ​ທຳ​ອິດ​ໃນ​ໂລກ ທີ່​ໃຊ້​​ ເຮືອບິນ​ ລຸ້ນ​ໃໝ່ ​ທາງດ້ານການ​ຄ້າ . ທ່ານນາງ ຮານນີຟິນ ປະທານເຈົ້າໜ້າທີ່ ຝ່າຍຄວາມໝັ້ນຄົງ ຂອງ ບໍລິສັດນີ້ ກ່າວວ່າ ສາຍການບີນນີ້ ຍັງບໍ່ໄດ້ກຳນົດ ວັນໃຫ້ບໍລິການ ຖ້ຽວບິນ ສຳລັບຜູ້ໂດຍສານ ດ້ວຍເຮືອບີນໄຟຟ້າລຳນີ້.

​          ນອກນັ້ນ ​ແອຣ ນູ​ແວນ​ເຊ​ລັງ ຍັງ​ຖະ​ແຫລ​ງ​ວ່າ: ​ເຮືອບິນ ອາ​ເລີຍ ມີ​ຄວາມ​ຍາວ ​ປະມານ 12 ​ແມັດ ​ແລະ ມີ​ນໍ້າໜັກ 3 ​ໂຕນ, ສາມາດ ບິນ​ໄດ້ ​ໄລຍະ​ທາງ  480 ກິ​ໂລ​ແມັດ ​ໃນ​ການບິນ​ ທົດ​ລອງ​ ຖ້ຽວດຽວ , ​ໂດຍ​ມີ ​ຄວາມໄວ​ສູງ​ສຸດ ລວມມີ 270 ກິ​ໂລ​ແມັດ ຕໍ່​ຊົ່ວ​ໂມງ ​ແລະ ບິນ​ໄດ້ ​ລະດັບ ​ຄວາມ​ສູງ​ ເຖິງ 3.000 ​ແມັດ​ ເທິງ​ໜ້າດິນ. ຂະນະ​ທີ່ ​ເຮືອບິນ​ ໄຟຟ້າ​ ລຳ​ນີ້ ສາມາດ ສາກ​ແບັດ​ເຕີ​ຣີ​ເຕັມ ໃນ​ໄລຍະ ​ເວລາ​ປະມານ 1 ຊົ່ວ​ໂມງ ​ແລະ ສາມາດ ບິນ​ຂຶ້ນ-​ລົງຈອດ​ໄດ້ ຄື​ກັບ ​ເຮືອບິນ​ທົ່ວ​​ໄປ./.

KPL