ຂປລ. ໃນນັ້ນ, ໄດ້ເຫັນດີເປັນເອກະພາບເລືອກເອົາ ທ່ານ ສອນໄຊ ສີພັນດອນ ນາຍົກລັດຖະມົນຕີຜູ້ເກ່ົາ ໄປດໍາລົງຕໍາແໜ່ງເປັນປະທານສະພາແຫ່ງຊາດຄົນໃໝ່ ແລະ ເລືອກເອົາທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ ຂຶ້ນເປັນນາຍົກລັດຖະມົນຕີຄົນໃໝ່. ໂອກາດນີ້, ທ່ານ ກອງແກ້ວ ໄຊສົງຄາມ ຮອງປະທານສະພາແຫ່ງຊາດ ໄດ້ອ່ານໜັງສືສະເໜີຂອງຄະນະປະຈຳສະພາແຫ່ງຊາດກ່ຽວກັບມາດຖານ, ເງື່ອນໄຂຂອງຜູ້ທີ່ຈະໄດ້ຮັບການເລືອກຕັ້ງເປັນປະທານສະພາແຫ່ງຊາດ ແລະ ນາຍົກລັດຖະມົນຕີຄົນໃໝ່ ກໍຄື ທ່ານ ສອນໄຊ ສີພັນດອນ ປະທານສະພາແຫ່ງຊາດ ແລະ ທ່ານ ສະເຫລີມໄຊ ກົມມະສິດ ນາຍົກລັດຖະມົນຕີຄົນໃໝ່ ຊຶ່ງທັງສອງທ່ານ ເປັນຜູ້ທີ່ມີມາດຖານເງື່ອນໄຂຄົບຖ້ວນ, ເປັນຜູ້ທີ່ມີຄວາມຮູ້ຄວາມສາມາດ, ມີວິໄສທັດຊ້ີນຳໃນການຫັນແນວທາງນະໂຍບາຍຂອງພັກເປັນກົດໝາຍຂອງລັດ, ສາມາດນຳພາ-ຊີ້ນຳຕິດຕາມກວດກາການຈັດຕັ້ງປະຕິບັດກົດໝາຍຂອງລັດ ແລະ ຕົງລົງບັນຫາສຳຄັນຕ່າງໆຂອງປະເທດຊາດ, ມີຄວາມຮູ້ ແລະ ກຳແໜ້ນເລິກເຊິ່ງລະບົບກົດໝາຍ, ລະບົບເສດຖະກິດ, ລະບົບການເມືອງ-ການປົກຄອງຂອງປະເທດ ແລະ ໄດ້ຮັບຄວາມເຊື່ອໝັ້ນ, ໄວ້ວາງໃຈຈາກພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ.

     ພ້ອມນີ້, ທ່ານປະທານສະພາແຫ່ງຊາດ ແລະ ນາຍົກລັດຖະມົນຕີຄົນໃໝ່ ໄດ້ສະແດງຄວາມຮູ້ບຸນຄຸນຢ່າງຈິງໃຈມາຍັງບັນດາສະມາຊິກສະພາແຫ່ງຊາດ ຊຸດທີ X ທີ່ໄດ້ໃຫ້ຄວາມເຊື່ອໝັ້ນ ແລະ ໄວ້ວາງໃຈເລືອກໃຫ້ດຳລົງຕຳແໜ່ງອັນມີກຽດ ແລະ ສຳຄັນນີ້. ພ້ອມທັງປະຕິຍານຕົນວ່າ: ຈະເຄົາລົບ ແລະ ປະຕິບັດຕາມລັດຖະທຳມະນູນ ແລະ ກົດໝາຍຢ່າງເຂັ້ມງວດ, ຈະຈົ່ງຮັກພັກດີ ຊື່ສັດບໍລິສຸດຕໍ່ປະເທດຊາດ ຕໍ່ມະຫາຊົນ, ຈະພ້ອມກັບການນຳຂອງພັກຂອງລັດ ເຮັດທຸກສ່ິງທຸກຢ່າງເພື່ອສ້າງເງື່ອນໄຂ ແລະ ຮັບປະກັນໃຫ້ປະເທດຊາດ ມີສະຖຽນລະພາບ, ມີຄວາມສະຫງົບປອດໄພ, ເສດຖະກິດ-ສັງຄົມ ໄດ້ຮັບການພັດທະນາຢ່າງບໍ່ຢຸດຢັ້ງ, ສືບຕໍ່ຍົກລະດັບຄຸນນະພາບຊີວິດຂອງມະຫາຊົນໃຫ້ນັບມື້ນັບດີຂຶ້ນ, ສືບຕ່ບູລະນະລະບອບປະຊາທິປະໄຕປະຊາຊົນໃຫ້ສົມບູນຂຶ້ນ ແລະ ສືບຕໍ່ຈັດ ຕັ້ງປະຕິບັດແນວທາງປ່ຽນແປງໃໝ່ຮອບດ້ານມີຫລັກການຂອງພັກ ເຂົ້າສູ່ລວງເລິກ ແລະ ເປັນຮູບປະທໍາ,  ພ້ອມທັງຈະປະຕິບັດນະໂຍບາຍການຕ່າງປະເທດສັນຕິພາບເອກະລາດແຫ່ງຊາດ ມິດຕະພາບ ແລະ ການຮ່ວມມື ເພື່ອການພັດທະນາຢູ່ໃນພາກພື້ນ ແລະ ໃນໂລກ.

ຂ່າວ: ທະນູທອງ; ພາບ: ອ່າຍຄຳ

KPL