ຂປລ. ເຮືອເຄິ່ງສູດຊາຍ ບ້ານໂນນມີໄຊ ຊະນະເລີດໃນການແຂ່ງຂັນຊ່ວງເຮືອ ເຮືອປະເພນີ ແຂວງເຊກອງ ປະຈຳປີ 2023, ຮອງຊະນະເລີດ ໄດ້ແກ່ເຮືອຊາວໜຸ່ມແຂວງເຊກອງ ແລະ ອັນດັບ 3ໄດ້ແກ່ເຮືອບ້ານປາກໂທນ. ສຳລັບປະເພດເຮືອປະເພນີຍິງ ຊະນະເລີດໄດ້ແກ່ເຮືອບ້ານໂມ, ຮອງຊະນະເລີດໄດ້ແກ່ເຮືອ ບ້ານປາກໂທນ ແລະ ອັນກັບ 3 ໄດ້ແກ່ເຮືອບ້ານວັດຫລວງ. ສ່ວນລາງວັນເຮືອງາມ ໄດ້ແກ່ເຮືອຂົງເຂດວັດທະນະທຳ-ສັງຄົມ.
  ບຸນຊ່ວງເຮືອປະເພນີ ແຂວງເຊກອງ ປະຈຳປີ 2023 ໄດ້ຈັດຂຶ້ນ ແລະ ສຳເລັດລົງ ວັນທີ 3 ທັນວາ 2023 ຜ່ານມາ ທີ່ທ່າບັກ ແຂວງເຊກອງ ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
   ທ່ານ ວົງເດືອນ ຈັນທະບຸກຊຽງ ເຈົ້າເມືອງລະມາມ ກ່າວວ່າ: ການຈັດງານບຸນຊ່ວງເຮືອປະເພນີໃນຄັ້ງນີ້ ເພື່ອເປັນການອະນຸລັກຮັກສາ, ເສີມຂະຫຍາຍມູນເຊື້ອທາງດ້ານວັດທະນະທຳ ແລະ ຮີດຄອງປະເພນີອັນດີງາມ ຂອງປະຊາຊົນບັນດາເຜົ່າແຂວງເຊກອງ ທັງເປັນການເຕົ້າໂຮມຄວາມສາມັກຄີທົ່ວປວງຊົນໃຫ້ແໜ້ນແຟ້ນຍິ່ງຂຶ້ນ, ເສີມຂະຫຍາຍສາຍພົວພັນເພື່ອນມິດກັບບ້ານໃກ້ເຮືອນຄຽງ ກໍຄືບັນດາເມືອງ ແລະ ແຂວງ ທີ່ມີຊາຍແດນຕິດຈອດກັບເມືອງລະມາມ, ພ້ອມທັງເປັນການກະຕຸ້ນເສດຖະກິດ ໃນສົ່ງເສີມໃຫ້ມີການແລກປ່ຽນຊື້-ຂາຍ ສິນຄ້າ ໂດຍສະເພາະ ຜະລິດຕະພັນກະສິກຳ-ຫັດຖະກຳ ພາຍໃນ, ເຄື່ອງອຸປະໂພກ-ບໍລິໂພກ ແລະ ອື່ນໆ ຕິດພັນກັບການສົ່ງເສີມກິລາປະເພດເຮືອຊ່ວງ ແລະ ການທ່ອງທ່ຽວແບບຍືນຍົງ. ການຈັດບຸນຊ່ວງເຮືອປະເພນີ ປະຈຳປີ 2023 ແມ່ນຢູ່ໃນໄລຍະທີ່ທົ່ວ ປວງຊົນລາວ ພວມສະເຫລີມສະຫລອງວັນສໍາຄັນທາງປະຫວັດສາດຂອງຊາດ ຄື: ວັນຊາດ ຄົບຮອບ 48 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 103 ປີ ຄຽງຄູ່ກັບກິດຈະກຳ ສົ່ງເສີມການທ່ອງທ່ຽວພາຍໃນ ຕິດພັນກັບການກະກຽມເປີດປີທ່ອງທ່ຽວລາວ 2024 ທີ່ຈະມາເຖິງໃນມໍ່ໆນີ້ ເພື່ອໃຫ້ມີນັກທ່ອງທ່ຽວເຂົ້າມາທ່ຽວຊົມ, ສຶກສາວັດທະນະທຳ ຮີດຄອງປະເພນີອັນດີງາມຂອງແຂວງເຊກອງ ໃຫ້ຫລາຍຂຶ້ນ.
  ບຸນຊ່ວງເຮືອປະເພນີ ໃນຄັ້ງນີ້, ມີເຮືອຊ່ວງເຂົ້າຮ່ວມແຂ່ງຂັນທັງໝົດ 12 ລຳ, 15 ຄະນະ, ຍິງ 3 ຄະນະ ພ້ອມດ້ວຍນັກກິລາເຮືອຊ່ວງຫລາຍກວ່າ 300 ຄົນເຂົ້າຮ່ວມ. ສຳລັບລາງວັນຊະນະເລີດໄດ້ຮັບຂັນ 1 ໜ່ວຍ ພ້ອມດ້ວຍເງິນສົດ 15 ລ້ານກີບ, ຮອງຊະນະເລີດ ໄດ້ຮັບລາງວັນເງິນສົດ 10 ລ້ານກີບ, ອັນດັບ 3 ໄດ້ຮັບລາງວັນເງິນສົດ 7 ລ້ານກີບ.

ຂ່າວ: ພຸດທະສອນ,

KPL