ຂປລ. ໃນວາລະດຳເນີນກອງປະຊຸມ ສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ວັນທີ 16 ພະຈິກ 2023 ໂດຍການເປັນປະທານຂອງ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ ໄດ້ສືບຕໍ່ສຸມໃສ່ປະກອບ ຄຳຄິດຄຳເຫັນໃສ່ຮ່າງກົດໝາຍ ວ່າດ້ວຍການຮັກສາ ສຸຂະພາບຂັ້ນຕົ້ນສະບັບສ້າງໃໝ່ ທີ່ສະເໜີໂດຍ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ເຊິ່ງກົດໝາຍສະບັບນີ້, ຖ້າໄດ້ຮັບການຮັບຮອງ ແລະ ປະກາດໃຊ້ຈະເປັນບ່ອນອີງອັນສຳຄັນ ໃນການເຄື່ອນໄຫວວຽກງານ ການຮັກສາສຸຂະພາບຂັ້ນຕົ້ນຖືກຕ້ອງ ແລະ ສອດຄ່ອງກັບແນວທາງນະໂຍບາຍ, ກົດໝາຍ, ມີຄວາມເປັນລະບົບ, ຄ່ອງຕົວ, ມີປະສິດທິພາບ ແລະ ປະສິດທິຜົນ, ທັງເຮັດໃຫ້ລະບົບສາທາລະນະສຸກຂັ້ນຮາກຖານ ມີຄວາມເຂັ້ມແຂງ, ກົນໄກໃນການຄຸ້ມຄອງ, ຕິດຕາມກວດກາ ແລະ ພັດທະນາ ໄດ້ຮັບການປັບປຸງ ແລະ ພັດທະນາ ໃຫ້ມີຄຸນນະພາບດີຂຶ້ນ.

ຜ່ານການປະກອບຄຳເຫັນ ຂອງສະມາຊິກສະພາແຫ່ງຊາດ ຢ່າງກົງໄປກົງມາ ແລະ ມີແນວຄິດສ້າງສັນ ເຊິ່ງໂດຍລວມແລ້ວ ແມ່ນເຫັນດີເປັນເອກະພາບ ຕໍ່ໂຄງສ້າງ ແລະ ເນື້ອໃນຂອງກົດໝາຍ ແຕ່ຍັງມີ ສສຊ ບາງເຂດເລືອກຕັ້ງ ສະເໜີໃຫ້ຕັດອອກ, ຕື່ມໃສ່ ບາງຄຳສັບ, ບາງເນື້ອໃນ ຢູ່ບາງໝວດ, ບາງມາດຕາ ເປັນຕົ້ນ ມາດຕາ 2 ການຮັກສາສຸຂະພາບຂັ້ນຕົ້ນ, ສສຊ ສະເໜີໃຫ້ປັບປຸງ, ສັບຊ້ອນ ແລະ ຕັດອອກບາງປະໂຫຍກ ທີ່ມີເນື້ອໃນຊ້ຳຊ້ອນອອກ ເພື່ອໃຫ້ມີ ຄວາມກະທັດຮັດ ແລະ ເຂົ້າໃນງ່າຍ, ພ້ອມທັງ ໃຫ້ອະທິບາຍຄຳສັບເຂົ້າຕື່ມ ເປັນຕົ້ນ ສາທາລະນະສຸກຂັ້ນພື້ນຖານ, ສຸຂະພາບ ຫລື ລະບົບສາທາລະນະສຸກ ເພື່ອໃຫ້ມີຄວາມສະດວກໃນການ ຈັດຕັ້ງປະຕິບັດ ເນື່ອງຈາກວ່າ ກົດໝາຍສະບັບນີ້ ຕິດພັນກັບຮາກຖານປະຊາຊົນ. ອີກບັນຫາໜຶ່ງທີ່ ສສຊ ໃຫ້ຄວາມສົນໃຈຫລາຍ ໃນມາດຕາ 10 ອາສາສະໝັກສາທາລະນະສຸກບ້ານ ເຊິ່ງ ສສຊ ສະເໜີໃຫ້ກຳນົດເນື້ອໃນ ໃຫ້ມີຄວາມລະອຽດຊັດເຈນ ໂດຍສະເພາະ ການກຳນົດ ອາສາສະໝັກບ້ານ ຕໍ່ຈຳນວນປະຊາຊົນ ຄວນກຳນົດແນວໃດ ແລະ ໃຫ້ສັບຊ້ອນບາງປະໂຫຍກ ເພື່ອເຮັດໃຫ້ເນື້ອໃນມີຄວາມຊັດເຈນ ແລະ ມີຄວາມສະດວກໃນການຈັດຕັ້ງປະຕິບັດຕົວຈິງ ແລະ ໃນມາດຕາ 13 ສິດ ແລະ ໜ້າທີ່ຂອງ ອາສາສະໝັກ ສາທາລະນະສຸກບ້ານ ສສຊ ສະເໜີ ໃຫ້ເບິ່ງຄືນໜ້າທີ່ຂອງອາສາສະໝັກສາທາລະນະສຸກບ້ານ ເພື່ອໃຫ້ສອດຄ່ອງກັບ ການປະຕິບັດວຽກງານຕົວຈິງ ໃນປັດຈຸບັນ.

ຕໍ່ກັບການປະກອບຄຳຄິດຄຳເຫັນຂອງ ສສຊ ຄະນະຮັບຜິດຜິດຊອບສ້າງຮ່າງກົດໝາຍດັ່ງກ່າວ, ຈະນຳເອົາເນື້ອໃນໃຈຄວາມ ໄປປັບປຸງ ເພື່ອເຮັດໃຫ້ຮ່າງກົດໝາຍ ມີຄວາມຄົບຖວນ, ສົມບູນ ສາມາດນຳໄປຈັດຕັ້ງປະຕິບັດ ໄດ້ຢ່າງມີປະສິດ ທິພາບ ແລະ ປະສິດທິຜົນ.

ກົດໝາຍວ່າດ້ວຍການຮັກສາສຸຂະພາບຂັ້ນຕົ້ນ ສະບັບສ້າງໃໝ່ ພາຍຫລັງຖືກຮັບຮອງ ແລະ ມີຜົນບັງຄັບໃຊ້ ຈະເຮັດໃຫ້ໃຫ້ປະຊາຊົນລາວບັນດາເຜົ່າ ເຂົ້າເຖິງການບໍລິການດ້ານ ສາທາລະນະສຸກ ໄດ້ຢ່າງທົ່ວເຖິງ, ສ້າງເງື່ອນ ໄຂໃຫ້ທຸກຄົນ ເປັນເຈົ້າການໃນການເບິ່ງແຍງ, ດູແລ ແລະ ຮັກສາສຸຂະພາບດ້ວຍຕົນເອງ ໃຫ້ມີສຸຂະພາບດີ, ມີອາຍຸຍືນ, ຫລຸດຜ່ອນການເຈັບເປັນ ແລະ ການເສຍຊີວິດ. ພ້ອມທັງ ເຮັດໃຫ້ ຊຸມຊົນມີຄວາມເຊື່ອໝັ້ນ, ເປັນເຈົ້າການ ແລະ ມີສ່ວນຮ່ວມຢ່າງຫ້າວຫັນ ໃນການຮັກສາສຸຂະພາບຂັ້ນຕົ້ນ ໂດຍສະເພາະ ຢູ່ເຂດຫ່າງໄກສອກຫລີກ ແລະ ທຸລະກັນດານ ໃນຂອບເຂດທົ່ວປະເທດ ໂດຍບໍ່ປະປ່ອຍ ໃຜຜູ້ໜຶ່ງໄວ້ເບື້ອງຫລັງ ເພື່ອບັນລຸການປົກຄຸມສຸຂະພາບທົ່ວປວງຊົນ ແລະ ການພັດທະນາແບບຍືນຍົງ.

ຂ່າວ: ທະນູທອງ

KPL