ຂປລ
ຂປລ. ທ່ານ ນາງ ລັດສະໝີ ໄຊຍະວົງ ຄະນະອຳນວຍການ ໂຮງຮຽນ ສີວິໄລ ນະຄອນຫລວງພະບາງ ໄດ້ໃຫ້ສຳພາດເມື່ອບໍ່ດົນມານີ້ວ່າ: ການໃຫ້ອາຫານທ່ຽງ ກັບອາຫານຫວ່າງ ສຳລັບເດັກພາຍໃນໂຮງຮຽນ ໄດ້ປະຕິບັດຕາມຫລັກ ໂພສະນາການ ເປັນຕົ້ນ ອາຫານທີ່ຄົບໝວດ-ໝູ່, ລວມມີຜັກ, ຊີ້ນ, ໄຂ່, ໝາກໄມ້, ນົມ ແລະ ອາຫານປະເພດທາດແປ້ງ
ຂປລ. ທ່ານ ນາງ ລັດສະໝີ ໄຊຍະວົງ ຄະນະອຳນວຍການ ໂຮງຮຽນ ສີວິໄລ ນະຄອນຫລວງພະບາງ ໄດ້ໃຫ້ສຳພາດເມື່ອບໍ່ດົນມານີ້ວ່າ: ການໃຫ້ອາຫານທ່ຽງ ກັບອາຫານຫວ່າງ ສຳລັບເດັກພາຍໃນໂຮງຮຽນ ໄດ້ປະຕິບັດຕາມຫລັກ ໂພສະນາການ ເປັນຕົ້ນ ອາຫານທີ່ຄົບໝວດ-ໝູ່, ລວມມີຜັກ, ຊີ້ນ, ໄຂ່, ໝາກໄມ້, ນົມ ແລະ ອາຫານປະເພດທາດແປ້ງ, ພ້ອມທັງມີການປະສານສົມທົບກັບ ພາກສ່ວນກ່ຽວຂ້ອງຂອງແຂວງ ແລະ ພໍ່ແມ່-ຜູ້ປົກຄອງ ເພື່ອຕິດຕາມສຸຂະພາບ ຂອງເດັກ ລວມທັງການແນະນຳໃຫ້ເດັກ ໄດ້ຮັບສານອາຫານທີ່ຖືກ ຕາມຫລັກໂພສະນາການ.
ໂຮງຮຽນ ສີວິໄລ ສ້າງຕັ້ງຂຶ້ນ 20 ກຸມພາ ປີ 2020 ຢູ່ບ້ານນາຫລວງ, ນະຄອນຫລວງພະບາງ ປັດຈຸບັນມີຄະນະອຳນວຍການທັງໝົດ 3 ຄົນ, ຍິງ 3 ຄົນ, ມີຄູສອນ 74 ຄົນ ຍິງ 71 ຄົນ ແລະມີນັກຮຽນທັງໝົດ 647 ຄົນ ຍິງ 336 ຄົນ, ໃນນີ້ ຊັ້ນລ້ຽງເດັກມີ 83 ຄົນ ຍິງ 40 ຄົນ, ຊັ້ນອະນຸບານ 241 ຄົນ ຍິງ 130 ຄົນ, ຊັ້ນປະຖົມ 323 ຄົນ ຍິງ 166 ຄົນ, ມີອາຄານຮຽນທັງໝົດ 2 ຫລັງ, ໃນນີ້ ຊັ້ນດຽວ 1 ຫລັງ ແລະ 3 ຊັ້ນ 1 ຫລັງເປັນອາຄານແບບຖາວອນ.
ທ່ານ ນາງ ລັດສະໝີ ໄຊຍະວົງ ກ່າວຕື່ມວ່າ: ສຳລັບໃນສົກຮຽນຜ່ານມາ, ໂຮງຮຽນ ສີວິໄລ ນະຄອນ ຫລວງພະບາງ ໄດ້ເປີດການຮຽນ-ການສອນ ລວມທັງໝົດ 26 ຫ້ອງຮຽນ ລວມມີຊັ້ນລ້ຽງເດັກ, ຊັ້ນອະນຸບານສຶກສາ ແລະຊັ້ນປະຖົມສຶກສາ. ໃນນັ້ນ ຊັ້ນລ້ຽງເດັກ ລວມມີ 5 ຫ້ອງ, ລວມມີເດັກອ່ອນ, ເດັກກາງ ແລະ ເດັກໃຫຍ່, ຊັ້ນອະນຸບານ ລວມມີ 12 ຫ້ອງຮຽນ, ມີຊັ້ນອະນຸບານ 1, 2 ແລະ ອະນຸບານ 3, ຊັ້ນປະຖົມລວມມີ 12 ຫ້ອງ, ມີຊັ້ນ ປ1 ຫາ ຊັ້ນ ປ5. ນອກຈາກການຮຽນຕາມ ຫລັກສູດການສຶກສາ ຂອງແຕ່ລະຊັ້ນຮຽນ, ໂຮງຮຽນຍັງໄດ້ລ້ຽງເຂົ້າທ່ຽງ ນັກຮຽນ 1 ຄາບ ພ້ອມທັງອາຫານຫວ່າງ ໃຫ້ເດັກ ແລະ ນັກຮຽນຕື່ມອີກ.
ຂ່າວ-ພາບ: ແຂວງຫລວງພະບາງ
KPL
