ຂປລ
ໃນສະພາບທີ່ເສດຖະກິດມີຄວາຫຍຸ້ງຍາກ, ລັດຖະບານໄດ້ວາງຫລາຍມາດຕະການໃນການແກ້ໄຂ ຊຶ່ງມີທັງມາດຕະການເລັ່ງດ່ວນ ແລະ ມາດຕະການໄລຍະຍາວ.
*ໃນສະພາບທີ່ເສດຖະກິດມີຄວາຫຍຸ້ງຍາກ, ລັດຖະບານໄດ້ວາງຫລາຍມາດຕະການໃນການແກ້ໄຂ ຊຶ່ງມີທັງມາດຕະການເລັ່ງດ່ວນ ແລະ ມາດຕະການໄລຍະຍາວ. ໃນນັ້ນ , ການເປີດຈຳໜ່າຍບັດພັນທະບັດ ກໍເປັນອີກໜຶ່ງມາດຕະການ ທີ່ລັດຖະບານວາງອອກ ເພື່ອແກ້ໄຂບັນຫາເສດຖະກິດ ຊຶ່ງກໍໄດ້ມີການຈັດຕັ້ງປະຕິບັດເປັນງວດທີ 3 ແລ້ວ. ແຕ່ກໍຍັງມີກຸ່ມຄົນຈຳນວນໜຶ່ງບໍ່ເຂົ້າໃຈ ແລະ ເອົາບັນຫາດັ່ງກ່າວມາປັ່ນປ່ວນສັງຄົມ ໃຫ້ເກີດຄວາມເຂົ້າໃຈຜິດ ຕໍ່ແນວທາງຂອງລັດຖະບານ ຊຶ່ງຜ່ານມາກໍມີຫລາຍຄວາມຄິດເຫັນທີ່ແຕກຕ່າງ ຫລາຍສົມຄວນໃນສື່ສັງຄົມອອນລາຍ.
ແຕ່ແນວໃດກໍດີ ທາງທະນາຄານ ແຫ່ງ ສປປ ລາວ ກໍໄດ້ມີການຢັ້ງຢືນວ່າ: ການຈຳໜ່າຍພັນທະບັດເປັນອີກໜຶ່ງມາດຕະການ ກະຕຸ້ນເສດຖະກິດຂອງລັດຖະບານ ໃນໄລຍະທີ່ເກີດວິກິດການຫຍຸ້ງຍາກ ຊຶ່ງມາດຕະການນີ້ ຈະຊ່ວຍໃຫ້ເສດ ຖະກິດຟື້ນຕົວ ແລະ ກັບຄືນສູ່ສະພາບປົກກະຕິ. ແຕ່ຮູບການນີ້ຈະຊ່ວຍແກ້ໄຂ ໄດ້ຫລາຍໜ້ອຍແນວໃດ ແມ່ນຂຶ້ນກັບທຸກພາກສ່ວນ ຕ້ອງຊ່ວຍກັນປະກອບສ່ວນ ດ້ວຍການສັ່ງຈອງພັນທະບັດ ຊຶ່ງຈະໜ້ອຍ ຫລື ຫລາຍ ກໍແລ້ວແຕ່ຄວາມສາມາດ ທີ່ມີ. ການປະກອບສ່ວນຊື້ພັນທະບັດນີ້ ຍັງດີກວ່າ ເຮົາຈະໄປຕົກເຂົ້າວັງວົນສັງຄົມອອນລາຍ ທີ່ຕົວະຍົວະຫລອກລວງ ໃຫ້ມີການລົງທຶນແບບບໍ່ມີຕົວຕົນ ສຸດທ້າຍກໍເສຍຜົນປະໂຫຍດຂອງຕົນເອງ ໄປແບບບໍ່ໄດ້ຫຍັງ ດັ່ງບົດຮຽນທີ່ເຮົາພົບ ເຫັນ ໃນໄລຍະຜ່ານມາ.
ການລົງທຶນຜ່ານການສັ່ງຈອງພັນທະບັດຊ່ວຍລັດຖະບານ ທີ່ມີທະນາຄານ ແຫ່ງ ສປປ ລາວ ທີ່ເປັນອົງການຈັດຕັ້ງຂອງລັດຖະບານ ເປັນຜູ້ກຳກັບ ຖືວ່າເປັນເລື່ອງທີ່ດີ ນອກຈາກເພິ່ນກຳນົດດອກເບ້ຍ 15% ຕໍ່ປີແລ້ວ ທັງຮັບປະກັນ ຄວາມປອດໄພ ອີກດ້ານໜຶ່ງຍັງເປັນການປະກອບສ່ວນພັດທະນາ ແລະ ກອບກູ້ເສດຖະກິດຂອງຊາດ ໃຫ້ກັບຄືນວ່າເຂັ້ມແຂງຕື່ມອີກທາງໜຶ່ງ.
ໂດຍ: ສາວບ້ານໂນນ
KPL
