ຂປລ. ສະມາຄົມມິດຕະພາບ ລາວ-ຢຍລະມັນ ແລະ ສະຖານທູດເຢຍລະມັນ ຮ່ວມກັບ ອົງການການປົກຄອງແຂວງຈຳປາສັກ ຈັດພິທີມອບ-ຮັບ ການປັບປຸງອາຄານ ໂຮງຮຽນປະຖົມບ້ານນາຂາມ ເມືອງປະທຸມພອນ ໃນວັນທີ 25 ກັນຍາ 2023 ຜ່ານມາ, ຕ່າງໜ້າມອບໂດຍ ທ່ານ ນາງ ອາເນັດ ຄະໂນບັອກ (Annette Knobloch), ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສສ ເຢຍລະມັນ ປະຈຳ ສປປ ລາວ ແລະ ຮັບໂດຍ ທ່ານ ບຸນຖອງ ສຸພາວົງ ຮອງເຈົ້າເມືອງປະທຸມພອນ ໂດຍມີ ທ່ານ ໂສມ ບຸດຕະວົງ ຮອງເຈົ້າແຂວງຈຳປາສັກ, ທ່ານ ຄໍາລຽນ ພົນເສນາປະທານສະມາຄົມມິດຕະພາບ ລາວ-ເຢຍລະມັນ, ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມ.

ໂຮງຮຽນປະຖົມສົມບ້ານນາຂາມ ເມືອງປະທຸມພອນ ແຂວງຈຳປາສັກ ໄດ້ຮັບການສ້າງຕັ້ງແຕ່ປີ 1980 ໂດຍແມ່ນທຶນຂອງລັດຖະບານລາວ (ແບບເຄິ່ງຖາວອນໃນເມື່ອກ່ອນ), ມີ 3 ຫ້ອງຮຽນ, 3 ຫ້ອງນໍ້າ, ມາຮອດ ປີ 2023 ເກີດມີໄພທຳມະຊາດ ລົມພາຍຸ ເຮັດໃຫ້ໂຮງຮຽນດັ່ງກ່າວ ເກີດມີຜົນເສຍຫາຍພໍສົມຄວນ ແລະ ບໍ່ສາມາດນໍາໃຊ້ເຂົ້າໃນການຮຽນ-ການສອນໄດ້. ເມື່ອເຫັນໄດ້ຄວາມຈຳເປັນດັ່ງກ່າວ, ສະຖານເອກອັກຄະລັດຖະທູດເຢຍລະມັນ ປະຈໍາລາວ ຈຶ່ງໄດ້ໃຫ້ການຊ່ວຍເຫລືອງົບປະມານ 116 ລ້ານກີບ ແລະ ພໍ່ແມ່ປະຊາຊົນບ້ານນາຂາມ ປະກອບສ່ວນ 65 ລ້ານ​ກວ່າກີບ, ລວມມູນຄ່າການສ້ອມແປງທັງໝົດ 181 ລ້ານ​ກວ່າກີບ ໂດຍມອບໃຫ້ສະມາຄົມມິດຕະ ພາບ ລາວ-ເຢຍລະມັນ ເປັນຜູ້ຈັດຕັ້ງປະຕິບັດ ແລະ ປັບປຸງສ້ອມແປງ ສຳເລັດໃນທ້າຍເດືອນສິງຫາ 2023.

ໃນພິທີ, ທ່ານຮອງເຈົ້າເມືອງປະທຸມພອນ ໄດ້ຕາງໜ້າໃຫ້ຄູ-ອາຈານ, ພໍ່ແມ່ປະຊາຊົນ ແລະ ນັກຮຽນ ສະແດງຄວາມຂອບໃຈ ມາຍັງສະຖານເອກອັກຄະລັດຖະທູດ ເຢຍລະມັນ ປະຈຳ ລາວ ກໍຄື ລັດຖະບານເຢຍລະມັນ ແລະ ປະຊາຊົນເຢຍລະມັນ ທີ່ເຫັນຄວາມສໍາຄັນ ແລະ ສະໜັບສະໜູນຊ່ວຍເຫລືອ ດ້ານການສຶກສາ ຢູ່ ສປປ ລາວ ຢ່າງຈິງໃຈຕະຫລອດມາ ເຮັດໃຫ້ນັກຮຽນໄດ້ຮັບ ການສຶກສາໃນເງື່ອນໄຂທີ່ດີ, ຖືເປັນການປະກອບສ່ວນສໍາຄັນ ເຂົ້າໃນການພັດທະນາພື້ນຖານ ໂຄງລ່າງດ້ານການສຶກສາ ຢູ່ ສປປ ລາວ ໂດຍສະເພາະແມ່ນ ແຂວງຈຳປາສັກ, ທັງເປັນການປະກອບ ສ່ວນເຂົ້າໃນການເສີມຂະຫຍາຍ ສາຍພົວພັນອັນດີງາມຂອງ ສອງປະເທດ ແລະ ປະຊາຊົນສອງຊາດ ລາວ-ເຢຍລະມັນ ໃຫ້ນັບມື້ໄດ້ຮັບການພັດທະນາ ແລະ ເສີມຂະຫຍາຍສູ່ບາດກ້າວໃໝ່. ພ້ອມນີ້, ຍັງໃຫ້ຄຳໝັ້ນສັນຍາວ່າ ຈະປົກປັກຮັກສາ ແລະ ຈະນຳໃຊ້ອາຄານໂຮງຮຽນດັ່ງກ່າວ ໃຫ້ໝັ້ນຄົງຍາວນານ ແລະ ເກີດຜົນປະໂຫຍດສູງສຸດ.

ຂ່າວ-ພາບ: ຄຕພ

KPL