ຂປລ
*ນາງ ແພວາ ມິຊາໂຕະ ພິລາພັນເດຊ ນັກກິລາຍິມນາສຕິກ ປະຫວັດສາດຄົນທຳອິດຂອງ ສປປ ລາວ ໄດ້ເປີດປະສົບການໃໝ່ ໃນການເຂົ້າຮ່ວມ ຍິມນາສ ຕິກ ປະເພດລີລາລະດັບໂລກ ຄັ້ງທຳອິດ ລາຍການ Rhythmic Gymnastics World Championships ຄັ້ງທີ 40 ທີ່ຈັດຂຶ້ນໃນລະຫວ່າງວັນທີ 23-28 ສິງຫາ ຜ່ານມາ ທີ່ເມືອງ ບາເລນເຊຍ ປະເທດແອັດສະປາຍ, ໂດຍລາຍການດັ່ງກ່າວ ມີນັກກິລາ ຈຳນວນ 232 ຄົນ ຈາກ 62 ປະເທດ ເຂົ້າຮ່ວມຊີງໄຊ.
*ນາງ ແພວາ ມິຊາໂຕະ ພິລາພັນເດຊ ນັກກິລາຍິມນາສຕິກ ປະຫວັດສາດຄົນທຳອິດຂອງ ສປປ ລາວ ໄດ້ເປີດປະສົບການໃໝ່ ໃນການເຂົ້າຮ່ວມ ຍິມນາສຕິກ ປະເພດລີລາລະດັບໂລກ ຄັ້ງທຳອິດ ລາຍການ Rhythmic Gymnastics World Championships ຄັ້ງທີ 40 ທີ່ຈັດຂຶ້ນໃນລະຫວ່າງວັນທີ 23-28 ສິງຫາ ຜ່ານມາ ທີ່ເມືອງ ບາເລນເຊຍ ປະເທດແອັດສະປາຍ, ໂດຍລາຍການດັ່ງກ່າວ ມີນັກກິລາ ຈຳນວນ 232 ຄົນ ຈາກ 62 ປະເທດ ເຂົ້າຮ່ວມຊີງໄຊ.
ພາຍຫລັງສະຫະພັນຍິມນາສຕິກແຫ່ງຊາດລາວ (LGF) ໄດ້ຮັບການຢືນຢັນຈາກສະຫະພັນຍິມນາສຕິກໂລກ (FIG) ຢ່າງເປັນທາງການ ສາມາດສົ່ງນັກກິລາຍິມນາສຕິກທີມຊາດລາວ ກໍຄື ນາງ ແພຣວາ ມິຊາໂຕະ ພິລາພັນເດດ ນັກກິລາຍິມນາສະຕິກ ປະເພດຍິມນາສຕິກລີລາ (Rhythmic Gymnastics) ໄດ້ຮັບສິດເຂົ້າຮ່ວມການແຂ່ງ ຂັນ ລາຍການຍິມນາສຕິກ ຊີງແຊັມໂລກ ລາຍການ 40TH FIG RHYTHMIC GYMNASTICS WORLD CHAMPIONSHIPS 2023 ທີ່ເມືອງບາເລນເຊຍ ປະເທດແອັດສະປາຍ ລະຫວ່າງວັນທີ 23-28 ສິງຫາ 2023 ເພື່ອຄັດເລືອກນັກກິລາຮ່ວມງານ ກິລາໂອແລມປິກສາກົນ (Olympic Paris 2024) ທີ່ປະເທດຝຣັ່ງ. ສຳລັບຜົນ ງານຂອງ ນາງ ແພວາ ມິຊາໂຕະ ພິລາພັນເດຊ ລວມທຸກອຸປະກອນ All round result ໄດ້ 71 ຄະແນນ ໄດ້ອັນດັບທີ 77 ຈາກທັງໝົດ 82 ຄົນເຂົ້າຮ່ວມ, ຄະແນນສະແດງລີລາກັບໝາກບານ (Ball) ໄດ້ 24.050 ຄະແນນ ອັນດັບ 74, ສະແດງປະກອບບ້ວງ (Hoops) ໄດ້ 22.300 ຄະແນນ ອັນດັບ 80, ສະແດງປະກອບໄມ້ຫລິ້ນມາຍາກົນ (Clubs) ໄດ້ 23.950 ຄະແນນ ອັນດັບ 75 ແລະ ສະແດງປະກອບຣິບບິນ (Ribbon) ໄດ້ຄະແນນ 23.000 ອັນດັບ 72.
ການເຂົ້າຮ່ວມແຂ່ງຂັນໃນລະດັບໂລກຄັ້ງທຳອິດຂອງ ນາງ ແພວາ ໄດ້ເພີ່ມປະສົບການໃໝ່ ສ້າງແຮງບັນດານໃຈທີ່ດີໃຫ້ແກ່ນັກກິລາລາວ ເພື່ອມຸ້ງໝັ້ນພັດທະນາຕົນເອງຕໍ່ໄປ, ດ້ວຍເງື່ອນໄຂ ແລະ ທ່າແຮງຂອງສະຫະພັນ ຍິມນາສຕິກແຫ່ງຊາດລາວ ຍາມໃດກໍໃຫ້ການສະໜັບສະໜູນ ນັກກິລາໄດ້ເຄື່ອນໄຫວຝຶກແອບແຂ່ງຂັນ ຢ່າງຕໍ່ເນື່ອງ ບວກກັບຄວາມເອົາໃຈໃສ່ ຝຶກຝົນຕົນເອງຂອງນັກກິລາ ເຊື່ອວ່າ: ນາງ ແພວາ ຈະກາຍເປັນນັກກິລາລະດັບແຖວໜ້າ ຂອງພາກພື້ນ ແລະ ສາກົນ ໃນອະນາຄົດ.
KPL
