ຂປລ. ພັກປະຊາຊົນປະຕິວັດລາວ ມີ 3 ອົງປະກອບ ທີ່ສຳຄັນຄື: ພັກເຮົາປະກອບດ້ວຍຫລັກການພື້ນຖານ ຂອງລັດທິມາກ-ເລນິນ; ພັກເຮົາສ້າງຂຶ້ນດ້ວຍໂຄງປະກອບການຈັດຕັ້ງຂອງພັກ ທີ່ໜັກແໜ້ນ, ໝັ້ນຄົງ ຕາມຫລັກການ ແລະ ທິດສະດີມາກ-ເລນິນ; ພັກເຮົາມີສະມາຊິກພັກ ທີ່ປະກອບດ້ວຍຊົນຊັ້ນຫລັກຂອງສັງຄົມ.
   ສະຫາຍ ທອງ​ລຸນ ສີ​ສຸ​ລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ໂອ້ລົມ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ຜ່ານມາວ່າ: ພັກເຮົາປະກອບດ້ວຍຫລັກການພື້ນຖານ ຂອງລັດທິມາກ-ເລນິນ ນັບແຕ່ເລີ່ມກໍ່ສ້າງພັກເປັນຕົ້ນມາ ແລະ ຕໍ່ມາພວກເຮົາ ໄດ້ຮັບເອົາແນວຄິດໄກສອນ ພົມວິຫານ ເຂົ້າເປັນສ່ວນປະກອບສຳຄັນຕື່ມເຕັມເຂົ້າເປັນເນື້ອແທ້ ແລະ ຫລັກມູນຂອງພັກ, ພັກເຮົາບໍ່ເຄີຍລັງເລ, ຄອນແຄນ ໃນການຢຶດຖືເອົາສິ່ງເຫລົ່ານີ້ ເປັນແນວຄິດທິດສະດີຂອງພັກ ນັບແຕ່ມື້ສ້າງຕັ້ງຈົນເທົ່າທຸກວັນນີ້; ພ້ອມກັນນີ້, ພັກເຮົາສ້າງຂຶ້ນດ້ວຍໂຄງປະ ກອບການຈັດຕັ້ງຂອງພັກ ທີ່ໜັກແໜ້ນ, ໝັ້ນຄົງ ຕາມຫລັກການ ແລະ ທິດສະດີມາກ-ເລນິນ ​ເຊິ່ງມີການປະດິດສ້າງເປັນແຕ່ລະໄລຍະ, ພັກເຮົາຮັບຮູ້ວ່າ ທິດສະດີ ມາກ-ເລນິນ ບໍ່ແມ່ນ ຄໍາພີ, ຕ້ອງມີການປະດິດສ້າງ. ນອກຈາກນີ້, ພັກເຮົາມີສະມາຊິກພັກ ທີ່ປະກອບດ້ວຍຊົນຊັ້ນຫລັກ ຂອງສັງຄົມ ຄື: ກມະກອນ, ຊາວກະສິກອນ, ນັກຮຽນຮູ້ປັນຍາຊົນປະຕິວັດ ທີ່ເປັນພົນລະເມືອງລາວ ທີ່ກ້າວໜ້ານັບມື້ນັບເຕີບໃຫຍ່ ຂະຫຍາຍຕົວຢູ່ໃນພັກເຮົາຕະຫລອດມາ.
   ສະຫາຍ ທອງ​ລຸນ ສີ​ສຸ​ລິດ ຍັງ​ໄດ້​ເນັ້ນ​ຕື່ມ​ວ່າ:  3 ອົງປະກອບດັ່ງກ່າວນັ້ນ, ແມ່ນຈຸລັງຂອງພັກເຮົາ ແລະ ຈຸລັງນີ້ ປະກອບເປັນພັກປະຊາຊົນປະຕິວັດລາວ, ພັກເດີນຕາມລັດທິມາກ-ເລນິນ, ພັກນີ້ເຕີບໃຫຍ່ຂຶ້ນມາ ແລະ ນຳພາປະຊາຊົນເຮົາຕໍ່ສູ້ກອບກູ້ເອົາເອກະລາດ, ອຳນາດອະທິປະໄຕຂອງຊາດ ແລະ ສືບຕໍ່ນຳພາ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຈົນເທົ່າທຸກວັນນີ້. ພັກປະຊາຊົນປະຕິວັດລາວ ອາດຈະມີອັນຄ້າຍຄື ແລະ ມີອັນແຕກຕ່າງ ຈາກພັກກອມມູນິດ ແລະ ພັກກຳມະກອນ ຂອງປະເທດອື່ນໆ, ແຕ່ສິ່ງສຳຄັນ ພັກເຮົາໄດ້ເຕີບໃຫຍ່ຂຶ້ນດ້ວຍທາດແທ້ອັນບໍ່ປ່ຽນແປງ, ໜັກແໜ້ນຕໍ່ຫລັກການພື້ນຖານ, ປັບປຸງໃຫ້ແທດເໝາະກັບກາລະເທສະ, ຄ່ອງຕົວທາງດ້ານການວາງນະໂຍບາຍ, ສະດຸ້ງໄວທາງດ້ານການຊີ້ນຳປະຕິບັດ, ຜ່ານຜ່າໄດ້ທຸກເຫດການທີ່ຫລໍ່ແຫລມ, ສັບສົນ ທີ່ກະທົບຕໍ່ລະບົບແນວຄິດ, ຈິດໃຈ ຂອງພັກ. ການຜ່ານຜ່າໄດ້, ຜ່ານພົ້ນໄດ້ສິ່ງຕ່າງໆ ທີ່ກ່າວມານັ້ນ ຈຶ່ງເຮັດໃຫ້ພັກເຮົາ ໄດ້ຮັບການຍອມຮັບຈາກປະຊາຊົນ, ເປັນພັກທີ່ຍອມຮັບຈາກບັນດາພັກການເມືອງ ຂອງທົ່ວໂລກ (ນັບທັງພັກກຳອຳນາດ ຫລື ພັກບໍ່ກຳອຳນາດ ຂອງປະເທດຕ່າງໆ ທີ່ມີລະບົບການເມືອງ ທີ່ແຕກຕ່າງໃນທົ່ວໂລກ).

KPL