ຂປລ.ສາຂາທະນາຄານແຫ່ງ ສປປ ລາວ ພາກ​ກາງ ແຂວງ​ສະ​ຫວັນ​ນະ​ເຂດ (ທ​ຫລ.ສ​ຂ) ມີ​ພາ​ລະ​ບົດ​ບາດ​ໜ້າ​ທີ່ ໃນ​ການ​ຄຸ້ມ​ຄອງ​ມະ​ຫາ​ພາ​ກ ເສດຖະກິດດ້ານ​ເງິນ​ຕາ; ​ການ​ຄຸ້ມ​ຄອງ​ທະ​ນາ​ຄານ ແລະ ສະ​ຖາ​ບັນ​ການ​ເງິນ ກໍ​ຄື​ເປັນ​ທີ່​ປຶກ​ສາ​ດ້ານ​ເງິນ​ຕາ ໃຫ້​ອົງ​ການ​ປົກ​ຄອງ ຢູ່ 3 ແຂວງ​ພາກ​ກາງ ປະກອບມີ ແຂວງ​ສະ​ຫວັນ​ນະ​ເຂດ, ຄຳ​ມ່ວນ ແລະ ແຂວງ​ບໍ​ລິ​ຄຳ​ໄຊ.

ທ່ານ ວົງພະຈັນ ແສງສຸວັນ ຫົ​ວໜ້າສາຂາ ທ​ຫລ.ສ​ຂ ໃຫ້​ຮູ້ວ່າ: ໃນຕະຫລອດ 9 ເດືອນ ປີ 2022 ​ຜ່​ານ​ມາ ໄດ້ເອົາໃຈໃສ່ຕິດຕາມ ການຈັດຕັ້ງປະຕິບັດ ການດໍາເນີນນະໂຍບາຍ ອັດຕາແລກປ່ຽນ ຕາມກົນໄກຕະຫລາດ ທີ່ມີການຄຸ້ມຄອງລັດ ແນໃສ່ເພື່ອໃຫ້ອັດຕາແລກປ່ຽນ ມີການເໜັງຕີງສອດຄ່ອງ ກັບລະດັບດຸນຍະພາບ ທາງດ້ານເສດຖະກິດ-ເງິນຕາຫລາຍຂຶ້ນ ແລະ ຫລຸດຜ່ອນສ່ວນຕ່າງລະຫວ່າງ ອັດຕາແລກປ່ຽນຂອງທະນາຄານ ແລະ ຕະຫລາດນອກລະບົບລົງ; ໄດ້ສືບຕໍ່ຕິດຕາມກວດກາ ການກໍານົດອັດຕາແລກປ່ຽນ ຂອງບັນດາສາຂາ ທະນາຄານທຸລະກິດ ແລະ ຮ້ານແລກປ່ຽນເງິນຕາ ທີ່ເປັນຕົວແທນ ຂອງທະນາຄານທຸລະກິດ ທີ່ຢູ່ພາຍໃນຂອບເຂດຮັບຜິດຊອບ ຂອງຕົນຢ່າງໃກ້ຊິດ ໂດຍອີງໃສ່ລະບຽບຫລັກການທີ່ ທຫລ ໄດ້ກໍານົດອອກໃນແຕ່ລະວັນ. ແຕ່ເຖິງແນວໃດກໍຕາມ, ສະພາບປັດໄຈພາຍນອກ ຍັງສ້າງແຮງກົດດັນຕໍ່ເນື່ອງ ໃນສະພາບເງື່ອນໄຂ ພາຍໃນຫລາຍດ້ານ ທີ່ຍັງບອບບາງ ເຮັດໃຫ້ສ່ວນຕ່າງ ລະຫ່ວາງອັດຕາແລກປ່ຽນ ຂອງທະນາຄານ ແລະ ຕະຫລາດນອກລະບົບ ໄດ້ກວ້າງອອກຫລາຍ ແຕ່ໄລຍະເດືອນມີນາເປັນຕົ້ນມາ ຈາກທີ່ເຄີຍໄດ້ແຄບ ເຂົ້າມາຢູ່ໃນລະດັບຕໍ່າກວ່າ 2%; ໄດ້ຕິດຕາມລາຄາສິນຄ້າຢ່າງໃກ້ຊິດ (ໂດຍການລົງເກັບກໍາ ລາຄາສິນຄ້າທີ່ກະທົບໄວຕໍ່ ຊີວິດ​ການເປັນຢູ່ ຕາມທ້ອງຕະຫລາດປະຈໍາອາທິດ ໂດຍລາຍງານໃຫ້ກົມນະໂຍບາຍ ທ​ຫລ ເພື່ອໃຫ້ສາມາດເຫັນໄດ້ເຖິງ ທິດທາງສາເຫດ ການປ່ຽນແປງຂຶ້ນລົງ ຂອງດັດຊະນີລາຄາ ເພື່ອຕິດຕາມສະພາບ ໂດຍປະສານສົມທົບກັບ ພາກສ່ວນກ່ຽວຂ້ອງຢ່າງໃກ້ຊິດ.

ພ້ອມ​ດຽວ​ກັ​ນນັ້ນ; ທ​ຫລ.ສ​ຂ ໄດ້ເອົາໃຈໃສ່ໃນການຈໍາ​ໜ່າຍພັນທະບັດ ທຫລ ສະກຸນເງິນກີບ ທີ່ສາຂາທະ ນາຄານທຸລະກິດ ເປັນຜູ້ຈຳໜ່າຍໃຫ້ແກ່ປະຊາຊົນ, ພະນັກງານ, ທະຫານ, ຕຳຫລວດ ເຊິ່ງມາຮອດປະຈຸບັນ ສາ ມາດບັນລຸໄດ້ທັງໝົດ 610,68 ຕື້ກີບ ໃນ 3 ແຂວງພາກກາງ. ພັນທະບັດ ທຫລ ແມ່ນໜຶ່ງໃນປະເພດ ຫລັກຊັບທີ່ມີຄວາມໝັ້ນຄົງ ແລະ ປອດໄພ ພ້ອມໃຫ້ຜົນຕອບແທນທີ່ດີທີ່ສຸດ, ເປັນເຄື່ອງມືນະໂຍບາຍເງິນຕາ ຂອງທະນາຄານກາງ ທີ່ນໍາໃຊ້ເພື່ອຄຸ້ມຄອງປະລິມານເງິນ ໃນຂອດຈໍລະຈອນໃຫ້ດຸ່ນດ່ຽງ ກັບລະບົບເສດຖະກິດ ປະກອບສ່ວນເຂົ້າໃນ ການຮັກສາສະຖຽນລະພາບ ທາງດ້ານເງິນຕາແຫ່ງຊາດ.

ທ​ຫລ.ສ​ຂ ໄດ້ຍົກສູງບົດບາດ ໃນການຄຸ້ມຄອງ ແລະ ແກ້ໄຂຮ້ານແລກປ່ຽນເງິນຕາ ໃຫ້ຮັດກຸມຫລາຍຂຶ້ນ ແລະ ມີຜົນສັກສິດຢ່າງແທ້ຈິງ ດ້ວຍການຄຸ້ມຄອງທຸລະກິດ ແລກປ່ຽນເງິນຕາ ຜ່ານລະບົບທະນາຄານທຸລະກິດ ຕາມແຈ້ງການ ຂອງຫ້ອງການ ທ​ຫລ ສະບັບເລກທີ 175/ຫກ, ລົງວັນທີ 17ກັນຍາ 2021 ຊຶ່ງເບື້ອງຕົ້ນ ມີທັງໝົດ 48 ຮ້ານ, ແຕ່ປັດຈຸບັນ 32 ຮ້ານແລກປ່ຽນຖືກຖອນ ໃບອະນຍຸາດ ບໍ່ໃຫ້ເປັນຕົວແທນ ຂອງທະນາຄານທຸລະກິດ. ນອກ​ນັ້ນ, ທ​ຫລ.ສ​ຂ ຍັງ​ເອົາ​ໃຈ​ໃສ່​ໃນການຊຸກຍູ້ ໃຫ້​ທະ​ນາ​ຄານ​ທຸ​ລ​ະ​ກິດ ແລະ ສະ​ເພາະ​ກິດ ເພື່ອສະໜອງແຫລ່ງທຶນ ເຂົ້າໃນ​ການສົ່ງເສີມ ວິສາຫະກິດຂະໜາດນ້ອຍ ແລະ ກາງ (SMEs) ແລະ ບ້ານສາມສ້າງ ໃນ 3 ແຂວງພາກກາງ​ ຊຶ່​ງມາ​ຮອດເດືອນ 09/2022 ປະຕິບັດໄດ້ທັງໝົດ 57 ຫົວ​ໜ່ວຍທຸ ລະກິດ ​ໃນວົງເງິນອະນຸມັດທັງ​ຈຳນວນ 100 ຕື້ກີບ ແລະ ມີຍອດເຫລືອ ຈຳນວນ 45,75 ຕື້ກີບ(SMEs 3%ແລະ ແຫລ່ງທຶນ SMEs ອື່ນໆ);

ສຳ​ລັບການປ່ອຍສິນເຊື່ອ​ ເຂົ້າ​ໃນບ້ານສາມສ້າງ ຂອງທະນາຄານນະໂຍບາຍ ສາຂາສະຫວັນນະເຂດ ມີຂອບເຂດເຄື່ອນໄຫວຢູ່ ແຂວງສະຫວັນນະເຂດ ແລະ ຄຳມ່ວນ ໂດຍສິນເຊື່ອໄດ້ເຂົ້າເຖິງ ​ປະ​ຊາ​ຊົນກວມເອົາ 11 ເມືອງ, 1 ນະຄອນ ເທົ່າກັບ 48%, ສາມສ້າງ 25 ເມືອງ, 55 ບ້ານ ກວມເອົາ 47,83% (115ບ້ານ) ໃນນີ້; ມີບ້ານທຸກຍາກ 2 ບ້ານ; ຈັດຕັ້ງກຸ່ມກູ້ຢືມໄດ້ 553 ກຸ່ມ, ປະຊາຊົນເຂົ້າເຖິງແຫລ່ງທຶນ 3.816 ຄອບຄົວ, ລາຍບຸກຄົນ 11 ຄົນ, ເທົ່າກັບ 13,30%, ຄອບຄົວທຸກຍາກ 213 ຄອບຄົວ ເທົ່າກັບ 22,45% ແລະ ໃນ​ຂະ​ນະ​ນີ້ ທ​ຫລ. ສ​ຂໄດ້ຍົກສູງຄວາມຮັບຜິດຊອບ ໃນຈັດຕັ້ງປະຕິບັດ ໜ້າທີ່ການເມືອງຂອງຕົນ ໄດ້ເປັນຢ່າງດີ ອັນເຮັດໃຫ້ສະພາບ ເສດຖະກິດ-ສັງຄົມ ຢູ່ສາມແຂວງພາກກາງ ມີສະເຖຍລະພາບ ແລະ ມີການຂະຫຍາຍຕົວ ໄປເທື່ອລະກ້າວ.

KPL