ຂປລ. ໂຄງການຊ່ວຍເຫລືອວຽກງານການຄ້າ ຂອງສະຫະພາບເອີຣົບ ພາຍໃຕ້ແຜນງານເຊື່ອມໂຍງ ພາກພື້ນອາຊຽນ-ສປປ ລາວ (ARISE Plus) ແລະ ກົມນະໂຍບາຍ ການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ ໄດ້ຈັດຊຸດຝຶກອົບຮົມ ຍົກ​ລະດັບ​ຄວາ​ມຮູ້ກ່ຽວກັບ “ການສ້າງຄວາມ​ເຂັ້ມ​ແຂງ ໃຫ້ແກ່ນັກເຈລະຈາການ​ຄ້າ ແລະ ການຈັດຕັ້ງປະຕິບັດ ສັນຍາການຄ້າ ດ້ານບໍລິການຂອງ ສປປ ລາວ”  ຂຶ້ນໃນລະຫວ່າງວັນທີ 1-2 ພະຈິກ 2022 ​ໂດຍມີຈຸດປະສົງປະກອບສ່ວນ ເຂົ້າໃນການຟື້ນຟູ ເສດຖະກິດຂອງລາວ ໂດຍການສະໜັບສະໜູນ ການເສີມສ້າງ ຄວາມສາມາດຂອງ ເຈົ້າໜ້າທີ່ການຄ້າ, ສ້າງຄວາມເຂັ້ມແຂງໃຫ້ພາກລັດ ແລະ ຈັດຕັ້ງປະຕິບັດບັນດາ ເຄື່ອງມືນະໂຍບາຍ, ພ້ອມດຽວກັນນັ້ນ ກໍ່ໃຫ້ພາກເອກະຊົນ ມີທັກສະໃນການຜະລິດ ທີ່ມີມູນຄ່າເພີ່ມສູງ ເພື່ອສົ່ງອອກຜະ​ລິດ​ຕະ​ພັນ.

     ການຝຶກອົບຮົມຄັ້ງ​ນີ້, ໄດ້ກວມເອົາຫົວຂໍ້ ແລະ ການສົນທະນາ ທີ່ຫລາກຫລາຍເຊັ່ນ: ຄວາມເຂົ້າໃຈກ່ຽວກັບ ການຄ້າທາງດ້ານການບໍລິການ; ຫລັກການໃນຂໍ້ຕົກລົງ ຂອງຫລາຍຝ່າຍ ແລະ ສັນຍາພາກພື້ນກ່ຽວກັບ ການຄ້າດ້ານການບໍລິການ; ລະບຽບພາຍໃນ ກ່ຽວກັບການບໍລິການ; ປະຕິບັດຕາມຄໍາໝັ້ນສັນຍາລະດັບພາກພື້ນ, ແລະ ຫົວຂໍ້ອື່ນໆທີ່. ຄຽງ​ຄູ່​ກັນ​ນັ້ນ, ການ​ເພີ່ມ​ທະວີ​ຄວາມ​ເຂົ້າ​ໃຈ ​ແລະ ​ຄວາມອາດ​ສາມາດ ຈະ​ປະກອບສ່ວນ​ເຂົ້າ​ໃນ ​ການ​ປະຕິບັດ​ບັນດາ​ຄຳ​ໝັ້ນ​ສັນຍາ​ ດ້ານ​ການ​ຄ້າ​ ການ​ບໍລິການ​ຢ່າງ​ເປັນ​ລະບົບ ​ແລະ ມີ​ປະສິດທິ​ຜົນໃນ​ລະຫວ່າງ ​ແລະ ພາຍຫລັງ​ການ​ເຈລະຈາ.

ຂະແໜງບໍລິການ ມີບົດບາດສຳຄັນ ໃນດ້ານການຜະລິດ ແລະ ການຊົມໃຊ້ ແລະ ສ້າງມູນຄ່າທີ່ເດັ່ນ ໃນການເຄື່ອນໄຫວ ເສດຖະກິດສ່ວນໃຫຍ່ ນອກນັ້ນ, ຂະແໜງ​ບໍລິການ​ເຊັ່ນ: ອຸດສາຫະກຳ​ການທ່ອງທ່ຽວ ຍັງ​ມີ​ບົດບາດ​ສົ່ງເສີມ ໃຫ້​ຂະແໜງ​ການ​ອື່ນໆ ​​ກ້າວ​ໄປ​ເຖິງ​ລະບົບ​ຕ່ອງ​ໂສ້​ມູນ​ຄ່າ, ເພື່ອເພີ່ມຊ່ອງ​ທາງ​ ໃຫ້​ແກ່​ການ​ສົ່ງ​ອອກ ​ແລະ ​ການ​ເຕີບ​ໂຕ​ຢ່າງ​ກວ້າງຂວາງ. ການ​ເພີ່ມ​ທະວີ ​ຄວາມ​ສາມາດ ​ແລະ ​ເພີ່ມ​ທະວີ​ຄວາມ​ເຂົ້າ​ໃຈ​ ຂອງ​ນັກ​ເຈລະຈາ​ ທາງດ້ານການ​ຄ້າ ​ຈາກ​ຂະ​ແໜງ​ການ​ທີ່​ກ່ຽວຂ້ອງ ແລະ ພາກສ່ວນ ທີ່​ເຂົ້າ​ຮ່ວມ​ການ​ເຈລະຈາ​ ດ້ານ​ການ​ຄ້າ ​ດ້ານ​ການ​ບໍລິການ​ ແມ່ນ​ມີ​ຄວາມ​ຈຳ​ເປັນ. ໂດຍສະເພາະ ແມ່ນການປະຕິບັດ ຕາມຄໍາໝັ້ນສັນຍາ ທາງດ້ານການຄ້າ ທີ່ ສປປ ລາວ ຮັບຮອງເອົາເຊັ່ນ: ອົງການການຄ້າໂລກ (World Trade Organization-WTO), ສັນຍາການຄ້າ ດ້ານການບໍລິການ ຂອງອາຊຽນ (ASEAN Trade in Service-ATISA) ແລະ ສັນຍາການຮ່ວມມື ເສດຖະກິດແບບຮອບດ້ານ ລະດັບພາກພື້ນ (Regional Comprehensive Economic Partnership-RCEP) ເປັນຕົ້ນ.

ຂ່າວ, ພາບ: ກະຊວງ ອຄ

KPL