ຂປລ. ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ຮ່ວມກັບອົງການ ການປົກຄອງແຂວງໄຊຍະບູລີ ໄດ້ຈັດພິທີມອບ-ຮັບ ອາຄານໂຮງຮຽນ ປະຖົມສົມບູນໄຊຍະບູລີ, ເມືອງໄຊຍະບູລີ ໃນວັນທີ 19 ກັນຍາ 2022 ​ໂດຍ​ມີ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນ ຕ່າງປະເທດສູນກາງພັກ, ທ່ານ ຫລີ ບຸນຄໍ້າ ປະທານສະມາຄົມ ລາວ-ໄທ ເພື່ອມິດຕະພາບ, ທ່ານ ກຽດຕິຄຸນ ຊາດປະເສີດ, ປະທານສະມາຄົມ ໄທ-ລາວ ເພື່ອມິດ ຕະພາບ, ທ່ານ ສົມບັດ ເພັງພະຈັນ,ກົງສຸນໃຫຍ່ແຫ່ງ ສປປ ລາວ ປະຈຳ ຂອນແກ່ນ ຣາຊະອານາຈັກໄທ, ມີເຈົ້າເມືອງໄຊຍະບູລີ ​ແລະ ພາກສ່ວນ​ກ່ຽວ​ຂ້ອງ ເຂົ້າຮ່ວມ.

ໃຫ້ກຽດກ່າວມອບໂຮງຮຽນດັ່ງກ່າວ ໂດຍ ທ່ານ ນາງ ວະຣາທິບ ສຸພະຊະວະໂຣດ, ອັກຄະຣາຊະທູດທີ່ປຶກສາ, ສະຖານເອກອັກຄະຣາຊະທູດແຫ່ງ ຣາຊະອານາຈັກໄທ ປະຈຳ ສປປ ລາວ ແລະ ຕາງໜ້າຮັບ ໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ.

ໂຮງຮຽນປະຖົມສົມບູນໄຊຍະບູລີ ແມ່ນໂຮງຮຽນມິດຕະພາບ ລາວ-ໄທ, ໄທ-ລາວ  ແຫ່ງທີ 11, ທັງເປັນສັນຍາລັກ ຂອງການສ້າງຕັ້ງ ສາຍພົວພັນການທູດ ລາວ-ໄທ ຄົບ ຮອບ 70 ປີ ​ໂດຍໄດ້ຮັບການສະໜັບສະໜູນ ງົບປະມານການກໍ່ສ້າງ ຈາກກະຊວງການຕ່າງປະເທດ ແຫ່ງຣາຊະອານາຈັກໄທ (ສະມາຄົມ ໄທ-ລາວ ເພື່ອມິດຕະພາບ) ຈຳນວນ 2 ຫລັງ 10 ຫ້ອງຮຽນ, ຫ້ອງການຄູ 1 ຫລັງ, ຫ້ອງນ້ຳ 2 ຫລັງ (10 ຫ້ອງ) ປະ ກອບເຄື່ອງ ເຟີນິເຈີຄົບຊຸດ ແລະ ປັບປຸງເດີ່ນພາຍໃນໂຮງຮຽນ ລວມມູນຄ່າທັງໝົດ 7 ລ້ານບາດ ໂດຍມອບໃຫ້ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ຮ່ວມກັນຈັດຕັ້ງປະຕິບັດ ແລະ ສ້າງສຳເລັດແຕ່ທ້າຍປີ 2020, ແຕ່ເນື່ອງຈາກ ມີສະພາບການແຜ່ລະບາດ ຂອງພະຍາດໂຄວິດ-19 ຈຶ່ງບໍ່ສາມາດຈັດພິທີ ມອບ-ຮັບ ຕາມວັນເວລາທີ່ກຳນົດໄວ້.

​ໂອກາດ​ນີ້, ທ່ານ ເຈົ້າແຂວງໄຊຍະບູລີ ໄດ້ຕາງໜ້າໃຫ້ຄູອາຈານ, ພໍ່ແມ່ປະຊາ ຊົນ ແລະ ນັກຮຽນ ສະແດງຄວາມຂອບໃຈມາຍັງ ກະຊວງການຕ່າງປະເທດ ແຫ່ງຣາຊະອານາຈັກໄທ ກໍຄື ລັດຖະບານ ແລະ ປະຊາຊົນໄທ ໂດຍສະເພາະສະມາຄົມ ໄທ-ລາວ ເພື່ອມິດຕະພາບ ທີ່ເຫັນຄວາມສໍາຄັນ ແລະ ສະໜັບສະໜູນຊ່ວຍເຫລືອ ດ້ານການສຶກສາ ຢູ່ ສປປ ລາວ ຢ່າງຈິງໃຈຕະຫລອດມາ ເຮັດໃຫ້ນັກຮຽນໄດ້ຮັບ ການສຶກສາໃນເງື່ອນໄຂທີ່ດີ, ຖືເປັນການ ປະກອບສ່ວນສຳຄັນ ເຂົ້າໃນການພັດທະນາພື້ນຖານ ໂຄງລ່າງດ້ານການສຶກສາ ຢູ່ແຂວງໄຊຍະບູລີ. ພ້ອມທັງໃຫ້ຄຳໝັ້ນສັນຍາວ່າຈະນຳໃຊ້, ປົກປັກຮັກສາອາຄານ ໂຮງຮຽນດັ່ງກ່າວ ໃຫ້ໝັ້ນຄົງຍາວນານ ແລະ ມີປະສິດ ທິພາບສູງສຸດ.

ການຊ່ວຍເຫລືອດັ່ງກ່າວ ຍັງເປັນການປະກອບສ່ວນເຂົ້າໃນ ການເສີມຂະຫຍາຍ ສາຍພົວພັນອັນດີງາມຂອງ ສອງປະເທດ ແລະ ປະຊາຊົນສອງຊາດ ລາວ-ໄທ ໃຫ້ນັບມື້ໄດ້ຮັບ ການພັດທະນາ ແລະ ເສີມຂະຫຍາຍ ສູ່ບາດກ້າວໃໝ່.

KPL