ໃນພິທີ, ສະຫາຍ ນາງ ຟອງສະໝຸດ ອັ່ນລາວັນ ໄດ້ຜ່ານບົດລາຍງານການເມືອງ ໂດຍໄດ້ຍົກໃຫ້ເຫັນຜົນງານການນຳພາຊີ້ນຳທີ່ພົ້ນເດັ່ນຫຼາຍດ້ານຂອງຄະນະພັກໃນໄລຍະ 5 ປີຜ່ານມາ (2021–2026) ໂດຍສະເພາະແມ່ນວຽກງານເສນາທິການໃຫ້ແກ່ປະທານປະເທດ ແລະ ຮອງປະທານປະເທດ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຕາມລັດຖະທໍາມະນູນ ແລະ ກົດໝາຍ, ນຳພາປັບປຸງການຈັດຕັ້ງ, ພັກພະນັກງານ ໃຫ້ມີຄວາມເຂັ້ມແຂງເປັນກ້າວໆມາ. ພ້ອມກັນນັ້ນ, ຍັງຍົກໃຫ້ເຫັນຈຸດດີ, ຈຸດອ່ອນ ແລະ ບົດຮຽນທີ່ຖອດຖອນໄດ້, ພ້ອມທັງກຳນົດທິດທາງແຜນການສູ້ຊົນໃນຊຸມປີຕໍ່ໜ້າ. ນອກນີ້ ຜູ້ແທນກອງປະຊຸມຍັງໄດ້ຮັບຟັງການຜ່ານຮ່າງແຜນພັດທະນາຫ້ອງວ່າການສໍານັກງານປະທານປະເທດ ໃນ 5 ປີຕໍ່ໜ້າ (2026-2030) ສະເໜີໂດຍສະຫາຍ ຂຸນສຸວັນ ສຸທຳມະວົງ ກຳມະການຄະນະບໍລິຫານງານພັກ ຫ້ອງວ່າການສຳນັກງານປະທານປະເທດ. ພ້ອມນັ້ນ, ກໍໄດ້ມີການປະກອບຄຳຄິດຄຳເຫັນຈາກອົງການຈັດຕັ້ງມະຫາຊົນ ແລະ ຕາງໜ້າໜ່ວຍພັກ.

ກອງປະຊຸມໃຫຍ່ຄັ້ງນີ້, ຍັງໄດ້ຮັບຟັງການຜ່ານບົດສຳຫຼວດການນຳພາລວມຂອງຄະນະບໍລິຫານງານພັກ ຫ້ອງວ່າການສໍານັກງານປະທານປະເທດ ຊຸດເກົ່າ ແລະ ບັນດາສະມາຊິກພັກ ໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່ ເພື່ອສືບຕໍ່ນຳພາ-ຊີ້ນຳວຽກງານຮອບດ້ານຂອງຫ້ອງວ່າການສຳນັກງານປະທານປະເທດ ໃນໄລຍະໃໝ່ ໃຫ້ມີຜົນສໍາເລັດຍິ່ງໃຫຍ່ກວ່າເກົ່າ. ກອງປະຊຸມໄດ້ມີການປ່ອນບັດເລືອກຕັ້ງເອົາຄະນະບໍລິຫານງານພັກ ຫສປທ ຊຸດໃໝ່ ຊຶ່ງມີຜູ້ສະໝັກເລືອກຕັ້ງ 9 ສະຫາຍ, ເລືອກເອົາ 7 ສະຫາຍ, ກອງປະຊຸມຄັ້ງປະຖົມມະລືກຂອງຄະນະພັກ ຊຸດໃໝ່ ໄດ້ປ່ອນບັດຄັດເລືອກເອົາເລຂາ, ຮອງເລຂາຄະນະບໍລິຫານງານພັກ ແລະ ປະທານກວດກາພັກ ໂດຍເອກະພາບເຫັນດີເລືອກເອົາສະຫາຍ ນາງ ຟອງສະໝຸດ ອັ່ນລາວັນ ເປັນເລຂາຄະນະບໍລິຫານງານພັກ ຫສປທ, ສະຫາຍ ອິນທະປັນຍາ ຂຽວວົງພະຈັນ ເປັນຮອງເລຂາຄະນະບໍລິຫານງານພັກ ຫສປທ, ສະຫາຍ ຂຸນສຸວັນ ສຸທຳມະວົງ ເປັນປະທານກວດກາພັກ, ສະຫາຍ ພອນສະຫວັນ ພວງພິດົກ ແລະ ສະຫາຍ ນາງ ສຸກດາວັນ ເດດວົງສອນ ເປັນຮອງປະທານກວດກາພັກ, ສະຫາຍ ນາງ ອຳມະລີ ຈັນທະພອນ, ສະຫາຍ ສົມພຽງ ແກ້ວວິເສດ ເປັນກຳມະການພັກ, ສະຫາຍ ວັນທອງ ນາກກະເສນ ເປັນກຳມະການພັກ.

ຕອນທ້າຍ, ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳອັນເລິກເຊິ່ງຈາກສະຫາຍ ພົອ ວິໄລ ຫຼ້າຄຳຟອງ ໄດ້ເນັ້ນໜັກໃຫ້ຄະນະບໍລິຫານງານພັກຊຸດໃໝ່, ສະມາຊິກພັກທຸກສະຫາຍເສີມຂະຫຍາຍມູນເຊື້ອຄວາມສາມັກຄີ, ຍົກສູງຄວາມຮັບຜິດຊອບການເມືອງ, ຈັດຕັ້ງປະຕິບັດໜ້າທີ່ວຽກງານເສນາທິການ ແລະ ບໍລິຫານໃຫ້ມີປະສິດທິພາບ ແລະ ປະສິດທິຜົນສູງສຸດ.

ກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ຫ້ອງວ່າການສຳນັກງານປະທານປະເທດ ໄດ້ຮັບຮອງເອົາມະຕິກອງປະຊຸມໃຫຍ່ ດ້ວຍຄວາມເປັນເອກະພາບ ແລະ ໄດ້ປິດລົງໃນວັນດຽວກັນ ດ້ວຍຜົນສຳເລັດອັນຈົບງາມ.

KPL