ຂປລ
ທ່ານ ເຊີເກ ລາຟໂຣຟ ລັດຖະມົນຕີ ກະຊວງການຕ່າງປະເທດ ຣັດເຊຍ ໄດ້ກ່າວອະພິປາຍທົ່ວໄປ ໃນກອງປະຊຸມ ສະມັດຊາໃຫຍ່ ອົງການສະຫະປະຊາຊາດ ສະໄໝທີ 81 ວ່າ: ເຖິງເວລາແລ້ວ ທີ່ຕ້ອງແກ້ໄຂບັນຫາແກນກາງ ຂອງຕາເວັນອອກກາງ ນັ້ນຄື: ການຮັບປະກັນ ໃຫ້ແກ່ການສ້າງຕັ້ງ ປະເທດ ປາແລັດສະຕິນ ບົນພື້ນຖານມະຕິ ຫລາຍສະບັບ ຂອງອົງການສະຫະປະຊາຊາດ.
ຂປລ.ວິທະຍຸ ໂທລະພາບ ສູນກາງຈີນ, ເມື່ອບໍ່ດົນມານີ້, ທ່ານ ເຊີເກ ລາຟໂຣຟ ລັດຖະມົນຕີ ກະຊວງການຕ່າງປະເທດ ຣັດເຊຍ ໄດ້ກ່າວອະພິປາຍທົ່ວໄປ ໃນກອງປະຊຸມ ສະມັດຊາໃຫຍ່ ອົງການສະຫະປະຊາຊາດ ສະໄໝທີ 81 ວ່າ: ເຖິງເວລາແລ້ວ ທີ່ຕ້ອງແກ້ໄຂບັນຫາແກນກາງ ຂອງຕາເວັນອອກກາງ ນັ້ນຄື: ການຮັບປະກັນ ໃຫ້ແກ່ການສ້າງຕັ້ງ ປະເທດ ປາແລັດສະຕິນ ບົນພື້ນຖານມະຕິ ຫລາຍສະບັບ ຂອງອົງການສະຫະປະຊາຊາດ. ທ່ານ ເຊີເກ ລາຟໂຣຟ ຊີ້ໃຫ້ເຫັນວ່າ: ສະພາຄວາມໝັ້ນຄົງ ອົງການສະຫະປະຊາຊາດ ໄດ້ຮັບຮອງເອົາ ແຜນສັນຕິພາບ ຢູ່ເຂດກາຊາ ເມື່ອປະມານ 1 ປີກ່ອນ, ແຕ່ສັນຕິພາບຍັງບໍ່ທັນບັນລຸໄດ້ເທື່ອ ໃນເຂດກາຊາ, ຍັງມີຜູ້ອາຍຸສູງ, ແມ່ຍິງ ແລະ ເດັກນ້ອຍເສຍຊີວິດ, ສະຖານະການດ້ານມະນຸດສະທຳຍັງຮ້າຍແຮງຄືເກົ່າ, ອິດສະຣາແອນ ພວມຂະຫຍາຍຈຸດຕັ້ງຖິ່ນຖານ ຢູ່ຝັ່ງຕາເວັນຕົກ ຂອງແມ່ນ້ຳຈໍແດນ, ເຮັດໃຫ້ສະຖານະການ ຮ້າຍແຮງຂຶ້ນຢ່າງຕໍ່ເນື່ອງ. ທ່ານ ເຊີເກ ລາຟໂຣຟ ໄດ້ເຕືອນວ່າ: ຫາກສະຖານະການແບບນີ້ ຍັງສືບຕໍ່, ຈະບໍ່ສາມາດສ້າງຕັ້ງປະເທດ ປາແລັດສະຕິນໄດ້, ຖ້າບໍ່ສາມາດສ້າງຕັ້ງປະເທດ ປາແລັດສະຕິນໄດ້, ອິດສະຣາແອນ ກໍຈະຜະເຊີນກັບ ໄພຂົ່ມຂູ່ ດ້ານຄວາມໝັ້ນຄົງ ຕະຫລອດໄປ ເຊັ່ນດຽວກັນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
