ຂປລ. ວິທະຍຸກະຈາຍວຽງ ຫວຽດນາມ: ເມື່ອບໍ່ດົນມານີ້, ການ​ສົ່ງ​ອອກ ​ເພີ່ມ​ຂຶ້ນ​ສູງ ຢ່າງ​ຕໍ່​ເນື່ອງ ​ນັບ​ແຕ່​ ຕົ້ນ​ປີ 2026 ມາ​ຮອດ​ ປະ​ຈຸ​ບັນ ເຮັດໃຫ້ ການ​ສົ່ງ​ອອກ​ ໃນໄລຍະ 8 ເດືອນ​​ ໃນຕົ້ນ​ປີ 2026 ຂອງ ຫວຽດ​ນາມ ບັນ​ລຸ 374 ຕື້ໂດລາ ສະຫະລັດ, ເທົ່າ​ກັບ ​ເກືອບ 80% ຂອງ ວົງ​ເງິນ​ ການສົ່ງ​ອອກ​ ທັງໝົດໃນ​ປີ 2025. ໃນ​ນັ້ນ, ​ມີ​ໝວດ​ສິນ​ຄ້າ ​ໄດ້​ລື່ນ​ກາຍ​ ຕົວ​ເລກ 100 ຕື້ໂດລາ ສະຫະລັດ.

ຕາມ​ຕົວ​ເລກ ຈາກ​ ກົມ​ແຜນ​ການ, ການ​ເງິນ ແລະ ຄຸ້ມ​ຄອງ ວິສາ​ຫະ​ກິດ ( ກະ​ຊວງ​ ອຸດ​ສາ​ຫະ​ກຳ ​ການ​ຄ້າ ຫວຽດ​ນາມ) ລະບຸວ່າ:  ການ​ສົ່ງ​ອອກ ຍັງ​ເພີ່ມ​ຂຶ້​ນ​ ຢ່າງຕໍ່​ເນື່ອງ ນັບ​ແຕ່ ​ຕົ້ນ​ປີ ​ຮອດ ປະ​ຈຸ​ບັນ ໂດຍສະເພາະ ຂະແໜງ ອຸດ​ສາ​ຫະ​ກຳ​ປຸງ​ແຕ່ງ ແລະ ການຜະ​ລິດ. ໝວດ​ສິນ​ຄ້າ ດັ່ງກ່າວ ໄດ້​ບັນ​ລຸ​ 324,5 ຕື້ໂດລາ ສະຫະລັດ, ກວມ​ເອົາ 86,8% ຂອງ ຍອດ​ວົງ​ເງິນ​ສົ່ງ​ອອກ - ນໍາ​ເຂົ້າ. ໂດຍສະ​ເພາະ​ ໝວດ​ສິນ​ຄ້າ​ ຄອມ​ພິວ​ເຕີ, ຜະ​ລິດ​ຕະ​ພັນ ​ເອ​ເລັ​ກ​ໂຕ​ນິກ ແລະ ເຄື່ອ​ງ​ອາ​ໄຫລ່​ ​ປະ​ມານ 100.5 ຕື້ໂດລາ ສະຫະລັດ.

ນອກຈາກນັ້ນ, ໝວດ​ສິນ​ຄ້ານີ້​ ເປັນຫລັກ ​ໃນ​ບັນ​ດາ​ ຜະ​ລິດ​ຕະ​ພັນ​ ອຸດ​ສາ​ຫະ​ກຳ ​ສົ່ງ​ອອກ​, ສົ່ງ​ຜົນ​ສະ​ທ້ອນ​ ເຖິງ​​ ດຸນ​ການ​ຄ້າ ແລະ ກາ​ນ​ເຕີບ​ໂຕລວມ​ ຂອງ​ ຂະ​ແໜງ​ອຸດ​ສາ​ຫະ​ກຳ ຫວຽດ​ນາມ. ໂດຍການ ​ສົ່ງ​ອອກ​ ໃນ​ເດືອນມິ​ຖຸ​ນາ, ກໍ​ລະ​ກົດ ແລະ ສິງ​ຫາ ໄດ້ສືບ​ຕໍ່ ​ສ້າງ​ຕົວເລກ ສະ​ຖິ​ຕິ​ ຢ່າງ​ຕໍ່​ເນື່ອງ, ໃນ​ນັ້ນ, ເດືອນສິງ​ຫາ ບັນ​ລຸ 54,23 ຕື້ໂດລາສະຫະລັດ, ເຊິ່ງ​ເປັນຕົວ​ເລກ ​ສູງ​ສຸດ ​ເມື່ອທຽບໃສ່ໄລຍະຜ່ານມາ./

KPL